ފުވައްމުލަކުން މަސްތުވާތަކެއްޗާއިއެކު މީހަކު ހައްޔަރުކޮށްފި
14 ސެޕްޓެމްބަރު 2017 | ބުރާސްފަތި 04:59މި މައްސަލައިގައި ހައްޔަރުކޮށްފައިވަނީ 44 އަހަރުގެ ދިވެހި ފިރިހެނެއް
ހައްޔަރުކުރި މީހާ ހުރި ސަރަޙައްދުން ފެނުނު މަސްތުވާތަކެތި
މަސްތުވާ ތަކެއްޗާއިއެކު ފުވައްމުލަކުން މީހަކު ހައްޔަރުކޮށްފިއެވެ.
ފުލުހުން ބުނީ، މި މައްސަލައިގައި ހައްޔަރުކުރީ، 44 އަހަރުގެ ދިވެހި ފިރިހެނެއް ކަމަށާ، އޭނާ ހައްޔަރުކުރީ، ފުލުހުންނަށް ލިބުނު ޖާސީސީ މައުލޫމާތާއި ގުޅިގެން، ހިންގި އޮޕަރޭޝަނެއްގައި ސެޕްޓެމްބަރު މަހުގެ 11 ވަނަ ދުވަހުގެ މެންދުރު 14:10 ހާއިރު ފުވައްމުލަކު ހޯދަޑު އަވަށުގެ ގާގަނޑު ސަރަޙައްދުން ކަމަށެވެ.
ފުލުހުން ބުނީ، ފުލުހުންގެ ބެލުމުގެދަށަށް އޭނާ ގެންގޮސް، އޭނާގެ ހަށިގަނޑާއި އޭނާ އެވަގުތު ހުރި ސަރަޙައްދު ބަލައިފާސްކުރިއިރު އެސަރަޙައްދުގައި ހުރި ވެލިފުންޏަކުން ފެނުނު ދެ ރަބަރު ޕެކެޓުގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 12 ސެލޯފިންކޮޅު ފެނިފައިވާ ކަމަށެވެ.
މި މައްސަލައިގައި ހައްޔަރުކޮށްފައިވާ މީހާގެ ބަންދާމެދު ގޮތެއް ނިންމުމަށް ފުވައްމުލަކު މެޖިސްޓްރޭޓް ކޯޓަށް ހާޟިރުކުރުމުން، މިނިސްޓްރީ އޮފް ހޯމްއެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް 5 ދުވަހުގެ މުއްދަތެއް ވަނީ ދީފައެވެ.
ފުލުހުން ބުނީ ފުވައްމުލަކު ޕޮލިސް ސްޓޭޝަނުން މި މައްސަލަ މިޙާރު ތަޙުޤީޤު ކުރަމުންދާ ކަމަށެވެ.
