ސައޫދީ އަރަބިއްޔާ އިން ޖަމަލަށް ޕާސްޕޯޓު ހަދައިދެނީ

ސައޫދީ އަރަބިއްޔާގެ ޖަމަލުގެ ސިނާއަތް ތަރުތީބުކޮށް، ޖަމަލުގެ މިލްކުވެރިކަމާއި އޭގެ ވަނަވަރު ދެނެގަތުމުގެ އިތުރުން، މި ދާއިރާ އިން ފޯރުކޮށްދޭ ހިދުމަތްތަކުގެ ފެންވަރު ރަނގަޅުކޮށް ބާޒާރުގެ އިތުބާރު ދެމެހެއްޓުމަށް އަމާޒުކޮށްގެން "ކެމަލް ޕާސްޕޯޓް" ނުވަތަ ޖަމަލު ޕާސްޕޯޓްގެ ނަމުގައި އާ ޕާސްޕޯޓެއް އަންގާރަ ދުވަހު އެ ގައުމުން ތައާރަފުކޮށްފި އެވެ.

މި މަޝްރޫއު އިފްތިތާހުކޮށްދެއްވީ ސައޫދީ އަރަބިއްޔާގެ މިނިސްޓަރ އޮފް އެންވަޔަރަންމަންޓް، ވޯޓަރ އެންޑް އެގްރިކަލްޗަރގެ ނައިބު މަންސޫރު އަލް މުޝައިތީ އެވެ. މިއީ އެ މިނިސްޓްރީގެ ދަށުން ހިންގާ "ނޭޝަނަލް ޕްރޮގްރާމް ފޯ ދަ ޑިވެލޮޕްމަންޓް އޮފް ދަ ލައިވްސްޓޮކް އެންޑް ފިޝަރީޒް ސެކްޓަރ" ގެ ދަށުން ކުރިއަށްގެންދާ މަސައްކަތްތަކުގެ ބައެއް ކަމަށް ރިޕޯޓު ކޮށްފައިވެ އެވެ.

މި އިސްނެގުމުގެ މައިގަނޑު މަގްސަދަކީ ޖަމާލާ ގުޅޭ މައުލޫމާތާއި، މިލްކުވެރިކަމާއި، ޖަމަލުގެ ނަސްލާއި ސިއްހީ ރެކޯޑުތައް އެއްތަނަކުން ބެލެހެއްޓޭނެ ރެގިއުލޭޓަރީ އަދި ޑިޖިޓަލް ނިޒާމެއް ގާއިމުކުރުން ކަމަށް ބުނެފައިވެ އެވެ. މީގެ ސަބަބުން ޖަމަލަށް ބޭނުންވާ ސިއްހީ ފަރުވާ ދިނުމުގައާއި، ބާޒާރުގެ ދެފުށް ފެންނަ މިންވަރު އިތުރުކުރުމުގެ އިތުރުން، ކަމާބެހޭ އިދާރާތަކުން މި ދާއިރާ ބެލެހެއްޓުމަށް ރަސްމީކޮށް އަމަލު ކުރާނެ އުސޫލެއް ގާއިމު ކުރުން ކަމަށް ސައުދީ ގެޒެޓް އިން ބުނެފައިވެ އެވެ.

ސައޫދީ ސަރުކާރުން ހާމަކުރި ގޮތުގައި، ޖަމަލުގެ ޕާސްޕޯޓަކީ އޭ ވަނަވަރު އަންގައިދޭ ފުރިހަމަ ލިޔުމެކެވެ. މީގެ ތެރޭގައި މައިކްރޯޗިޕް ނަންބަރާއި، ޕާސްޕޯޓް ނަންބަރާއި، ޖަމަލަށް ކިޔާ ނަމާއި، އުފަން ތާރީޚާއި، ނަސްލާއި، ޖިންސް ބަޔާންކުރުމުގެ އިތުރުން، ކުލަޔާއި، އުފަންވި ތަނާއި، ޕާސްޕޯޓް ދޫކުރި ތާރީޚާއި ތަން ހިމެނެއެވެ. އަދި ޖަމަލުގެ ވަނަވަރު ކަށަވަރުކުރުމަށްޓަކައި އޭގެ ދެ ފަރާތުން ނަގާފައިވާ ފޮޓޯވެސް މި ޕާސްޕޯޓުގައި ހިމެނެ އެވެ.

މީގެ އިތުރުން، މި ޕާސްޕޯޓުގައި ޖަމަލަށް ދީފައިވާ ވެކްސިންތަކުގެ ތަފްސީލު ހިމެނޭ ހާއްސަ ބައެއް ހިމެނެ އެވެ. މި ބައިގައި ވެކްސިން ދިން ޑޮކްޓަރުގެ ނަމާއި، ސޮޔާއި އަދި ރަސްމީ ތައްގަނޑު ޖަހާފައި ހުންނާނެ ކަމަށް ވެސް ރިޕޯޓު ކޮށްފައިވެ އެވެ.

މިނިސްޓްރީން ބުނި ގޮތުގައި، މި ފިޔަވަޅުގެ ސަބަބުން ޖަމަލު އެއްތަނުން އަނެއްތަނަށް ގެންދިއުމާއި، މިލްކުވެރިކަން ބަދަލުކުރުމާއި، ރަސްމީ ލިޔެކިޔުންތައް ތަރުތީބުކުރެވި، ޖަމަލު ގަނެވިއްކުމުގެ މުއާމަލާތްތައް ހަރުދަނާވެގެންދާނެ އެވެ. މީގެ ސަބަބުން ޖަމަލުގެ ވެރިފަރާތްތަކުގެ ހައްގުތައް ހިމާޔަތްކުރެވި، ބާޒާރުގައި މުއާމަލާތްކުރާ ފަރާތްތަކުގެ މެދުގައި އިތުބާރު ބޮޑުވެގެންދާނެ ކަމަށް ވެސް ބުނެފައިވެ އެވެ.