އެފް-15 ބޯޓުތައް މަރާމާތު ކުރުމަށް ސައުދީ އިން އެމެރިކާ އަށް ތިން ބިލިއަން ޑޮލަރު

ސައުދީ އަރަބިއްޔާ އިން ބޭނުންވާ އެފް-15 މަރުކާގެ ހަނގުރާމަ މަތީ ބޯޓުތައް މަރާމާތުކޮށް ބެލެހެއްޓުމަށް ބޭނުންވާ ތަކެތި ވިއްކުމަށް، ތިން ބިލިއަން އެމެރިކާ ޑޮލަރުގެ އެއްބަސްވުމެއް އެމެރިކާ އިން ފާސްކޮށްފި އެވެ. 

މިއީ ސައުދީގެ އަސްކަރީ ޤާބިލުކަން އިތުރު ކުރުމަށް އެމެރިކާ އިން ދޭ އެހީތެރި ކަމުގެ ދަށުން ކުރިއަށް ގެންދާ މުހިންމު މުއާމަލާތެއް ކަމަށް ފާހަގަވެފައިވެ އެވެ. 

އެމެރިކާގެ ޕެންޓަގަން އިން ނެރެފައިވާ ބަޔާނެއްގައި ބުނެފައި ވަނީ، އެ އެއްބަސްވުމުގެ ދަށުން ސައުދީގައި މަސައްކަތް ކުރުމަށް އެމެރިކާގެ މަދަނީ ކޮންޓްރެކްޓަރުން ނުވަތަ، އަސްކަރީ ސިފައިންގެ ކުޑަ ޓީމެއް އެ ޤައުމަށް ފޮނުވަން ޖެހިދާނެ ކަމަށެވެ. މި އެއްބަސްވުމުގެ ދަށުން ސައުދީ އިން ގަތުމަށް ހުށަހަޅާފައިވާ ތަކެތީގެ ތެރޭގައި ބޯޓު ތަކުގެ ސްޕެއާ ޕާޓްސް އާއި، މަރާމާތު ކުރުމަށް ބޭނުންވާ ސާމާނު އަދި ބޯޓު ތަކުގައި ބޭނުން ކުރާ ސޮފްޓްވެއާ އާއި އެއާ ގުޅޭ ޓެކްނިކަލް ލިޔެކިޔުންތައް ހިމެނެ އެވެ. 

މީގެ އިތުރުން ސައުދީގެ އަސްކަރިއްޔާގެ މުވައްޒަފުން ތަމްރީނު ކުރުމާއި، އިންޖިނިއަރިން އަދި ލޮޖިސްޓިކްސްގެ ދާއިރާ އިން އެމެރިކާ ސަރުކާރާއި، ކޮންޓްރެކްޓަރުންގެ ފަންނީ އެހީތެރިކަން ފޯރުކޮށްދިނުން ވެސް މި އެއްބަސްވުމުގައި ހިމެނެ އެވެ. ޕެންޓަގަން އިން ހާމަ ކޮށްފައިވާ ގޮތުގައި، މި ވިޔަފާރީގެ ސަބަބުން ގަލްފު ސަރަހައްދުގެ ސިޔާސީ ހަމަޖެހުމާއި، އިޤްތިޞާދީ ކުރިއެރުމަށް މަސައްކަތް ކުރާ، އަދި ނޭޓޯ އިން ބޭރުގައިވާ އެމެރިކާގެ މުހިންމު ބައިވެރިއެއް ކަަމަށްވާ ސައުދީ އަރަބިއްޔާގެ ސަލާމަތީ ކަންކަން ވަރުގަދަ ވެގެން ދާނެ އެވެ.

މި އެފް-15 ބޯޓު ތަކަކީ ސައުދީ އަރަބިއްޔާ އަށް ކުރިމަތިވާ މިހާރުގެ ނުރައްކާ ތަކާއި، ކުރި މަގުގައި ކުރިމަތި ވެދާނެ ނުރައްކާ ތަކުން ދިފާއު ވުމަށް އެ ޤައުމުން ބޭނުންވާ ކުރާ މުހިންމު ވަސީލަތެކެވެ. މި އެއްބަސްވުމަކީ އެމެރިކާގެ ޚާރިޖީ ސިޔާސަތާއި، ޤައުމީ ސަލާމަތާ ގުޅުން ހުރި މަޤުޞަދުތައް ޙާސިލު ކުރުމަށް މަގު ފަހި ވާނެ ކަމެއް ކަމަށް ވެސް، އެމެރިކާ އިން ބުނެފައިވެ އެވެ. 

މީގެ އިތުރުން ނިމިދިޔަ ހަފުތާގެ ފަހު ކޮޅު، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ވަނީ ސައުދީ އަށް 730 ޕެޓްރިއަޓް އެޑްވާންސްޑް ކެޕޭބިލިޓީ-3 ފެ މިސައިލް ވިއްކުމަށް ނުވަ ބިލިއަން އެމެރިކާ ޑޮލަރުގެ އެއްބަސްވުމެއް ފާސްކޮށްފަ އެވެ. ލޮކްހީޑް މާޓިން ކުންފުނިން އުފައްދާ މި މިސައިލް ތަކަކީ ބެލިސްޓިކް މިސައިލް އާއި، ކްރޫޒް މިސައިލް އަދި ޒަމާނީ ޑްރޯންތައް ދެނެގަނެ، ވައްޓާލުމުގެ ޤާބިލުކަން ލިބިފައިވާ ދުނިޔޭގެ އެންމެ ކުރިއަރާފައިވާ ދިފާއީ ނިޒާމު ތަކުގެ ތެރޭގައި ހިމެނޭ ވަސީލަތެކެވެ. 

ޕެންޓަގަން އިން ބުނި ގޮތުގައި، މި މިސައިލް ނިޒާމުގެ ސަބަބުން ސައުދީ އަރަބިއްޔާގެ އެއްގަމު ސިފައިންނާއި، އެ ގައުމުގައި ތިބި އެމެރިކާގެ ސިފައިން އަދި ސަރަހައްދީ ބައިވެރިންގެ ރައްކާތެރިކަން ކަށަވަރު ވެގެންދާނެ އެވެ.