ސިންގަޕޫރުގެ މަޤުބޫލު މައިންޑް ޗެމްޕްސް ޕްރީ ސްކޫލް ރާއްޖޭގައި ހުޅުވައިފި

ސިންގަޕޫރުގެ ބެލެނިވެރިންގެ މެދުގައި މަޤުބޫލުކަން ހޯދާފައިވާ މައިންޑް ޗެމްޕްސް ޕްރީ ސްކޫލް ރާއްޖޭގައި ހުޅުވައިފި އެވެ.

މި ޕްރީ ސްކޫލް ހުޅުވާފައި ވަނީ އާދިއްތަ ދުވަހު އެވެ. މިއީ ރާއްޖޭގައި މައިންޑް ޗެމްޕްސްގެ ޕްރީ ސްކޫލެއް ހުޅުވި ފުރަތަމަ ފަހަރު ކަަމަށްވާއިރު، މި ޕްރީ ސްކޫލުގައި ދަރިވަރުންނަށް ގިނަ އިންތިޒާމު ތަކެއް ވަނީ ހަމަޖައްސައިފަ އެވެ.

މައިންޑް ޗެމްޕްސް ޕްރީ ސްކޫލުގައި ކިޔަވައި ދިނުމަށް ހަމަޖެހިފައި ވަނީ ޕްލޭ ގްރޫޕްގެ އިތުރުން، ނާސަރީ އަދި ކިންޑަ ގާޑަން އަށެވެ. އެގޮތުން ޕްލޭ ގްރޫޕް އަކީ 18 މަސް ދުވަހާއި، 30 މަސް ދުވަހުގެ ކުދިންނަށް ޚާއްސަ ކްލާސް ތަކެވެ. ނާސަރީގެ ތެރެެއިން އެން ވަން އަކީ، ތިން އަހަރުގެ ކުދިންނަށް ޚާއްސަ ކުލާހެވެ. އަދި އެން ޓޫ އަކީ ހަތަރު އަހަރުގެ ކުދިންނަށް ޚާއްސަ ކުލާހެވެ. 

މީގެ އިތުރުން ކޭ ވަން އަކީ އުމުރުން ފަސް އަހަރުގެ ކުދިންނަށް ޚާއްސަ ކުލާސްތައް ކަމަށްވާއިރު، ކޭ ޓޫ އަކީ އުމުރުން ހަ އަހަރުގެ ކުދިންނަށް ޚާއްސަ ކުލާސް ތަކެވެ. ފަސް ބުރިއަށް އިމާރާތް ކޮށްފައިވާ މި ޕްރީ ސްކޫލްގެ ގްރައުންޑް ފްލޯގައި ދަރިވަރުން ކުޅޭނެ އިންތިޒާމު ހަމަޖައްސާފައިވެ އެވެ. އަދި އެއް ވަނަ ފްލޯ އިން ފެށިގެން ހަތަރު ވަނަ ފްލޯ އަށް ވަނީ ކުލާސްތައް އިންތިޒާމު ކޮށްފަ އެެވެ.

ޕްރީ ސްކޫލްގެ ފަސް ވަނަ ފްލޯގައި ޖިމެއް ޤާއިމު ކޮށްފައިވާއިރު، މިއީ މައިންޑް ޗެމްޕްސް އިން ޚާއްސަ ކަމެއް ދީގެން ކުރިއަށް ގެންދާ ޖިމެކެވެ. އެގޮތުން އެއީ ނިއުރޯ މޫވްސް ޕްރޮގްރާމް ކުރިއަށް ގެންދަން ޚާއްސަ ކޮށްފައިވާ ޖިމަކަށްވާއިރު، އެ ޕްރޮގްރާމްގައި ހިމެނެނީ ދަރިވަރުންގެ ހަށިގަނޑުގެ ޙަރަކާތްތެރިކަން އިތުރު ކުރުމަށް ޚާއްސަ ޙަރަކާތް ތަކެވެ. މިއީ ވަކި މިންގަނޑެއްގެ ތެރެއިން ޓީޗަރުން ތަމްރީނު ވެގެން، އެކަމުގެ ޚާއްސަ ހުއްދަ އޮންނަ ޓީޗަރުންނަށް ކުރިއަށް ގެންދެވޭ ޕްރޮގްރާމް އެކެވެ.

ޕްރީ ސްކޫލްއާ ގުޅޭ ގޮތުން ވާހަކަ ދައްކަމުން ޕްރީ ސްކޫލްގެ ލީޑިން ޓީޗަރު ފާތިމަތު ސައީދު ވިދާޅުވީ، މައިންޑް ޗެމްޕްސްގެ ޕްރީ ސްކޫލް ރާއްޖޭގައި ހުޅުވިގެން ދިޔުމަކީ ވަރަށް އުފާވެރި ކަމެއް ކަމަށާއި، އެއީ އެތައް ބައެއްގެ ވަރަށް ބުރަ މަސައްކަތެއް ކަމަށެވެ. އަދި އެ ޕްރީ ސްކޫލް އިން ކިޔަވައިގެން މުޖުތަމައު އަށް ފައިދާ ވާނެ އެތައް ދަރިވަރުންނަށް ނިކުންނާނެ ކަމަށް އުންމީދު ކުރައްވާ ކަމަށް ވެސް ވިދާޅުވި އެވެ. 

މީގެ އިތުރުން އޭނާ ވިދާޅުވީ، މައިންޑް ޗެމްޕްސް ޕްރީ ސްކޫލްގެ ހުރިހާ ޓީޗަރުންނަކީ ވެސް ވަކި ތަމްރީނު ތަކެއް ފުރިހަމަ ކޮށްފައިވާ ޓީޗަރުން ކަމަށެވެ. އެގޮތުން އެ ޓީޗަރުން ވަނީ ސިންގަޕޫރަށް ގޮސް، މައިންޑް ޗެމްޕްސްގެ ތަމްރީނުތައް ފުރިހަމަ ކޮށްފައިވާ ކަމަށާއި، އޭގެ ފަހުން މައިންޑް ޗެމްޕްސްގެ ޓީމެއް ރާއްޖެ އައިސް ވެސް ޓީޗަރުން ތަމްރީނު ކޮށްފައިވާ ކަމަށް ވިދާޅުވި އެވެ.