ދިރާސީ އަހަރު ބަދަލު ކުރުމުން އެންމެ ބޮޑު ގެއްލުމެއް ވާނީ ގްރޭޑް 8ގެ ކުދިންނަށް ކަމަށް ކުރީގެ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހްސާން ވިދާޅުވެއްޖެއެވެ.
އިހުސާން އެފަދައިން ވިދާޅުވީ ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.
އިހުސާން ވިދާޅުވީ އެންމެ ބޮޑު ކަންބޮޑުވުމަކީ ސަރުކާރުގެ ނިންމުމާއި ގުޅިގެން ދަރިވަރުންނަށް ލިބޭ ގެއްލުން ކަމަށެވެ. އިހުސާން ވިދާޅުވީ ދިރާސީ އާ އަހަރު ފަށާ ތާރީހު ބަދަލުކުރުމުން އެންމެ ބޮޑު ފައިދާ އެއް ވާނީ ގްރޭޑް 8ގެ ދަރިވަރުންނަށް ކަމަށް ބުނި ނަމަވެސް އެކަން އޮތީ އެހެން ނޫން ކަމަށެވެ. އިހުސާން ވަނީ 8ގެ ދަރިވަރުންނަށް ގެއްލުންވާނެ ކަމަށް ފާހަގަކުރައްވާ ސަބަބު ތަފްސީލްކޮށްދެއްވާފައެވެ.
މިހާރު ދަރިވަރުންގެ ކިޔެވުން ތަރުތީބުވެފައިވާ ގޮތުން، ރާއްޖޭގެ ކަރިކިއުލަމްގެ ތެރެއިން ދަރިވަރުންގެ ކިޔެވުން ކުރިއަށް ގޮސް ގްރޭޑް 8ގެ ފުރަތަމަ ޓާމް ނިމި، ދެ ވަނަ ޓާމް ފެށޭތަނުން ދަރިވަރުން ސްޓްރީމްކުރާ ކަމަށެވެ. އެހެންކަމުން ދަރިވަރުން ޖެހެނީ މިހާރު އެކުދިން ކިޔަވަމުންދާ އެއްޗެއް ހުއްޓާލާފައި ގްރޭޑް 9 ގައި އެކުދިން ކިޔަވަން ޖެހޭ ބައިތައް ފަށަން ކަމަށް އިހުސާން ވިދާޅުވިއެވެ. އެހެންކަމުން އެއީ އެއް ޓާމްގެ ކިޔެވުން ދޫކޮށްލުން ކަމަށް އިހުސާން ވަނީ ފާހަގަކުރައްވާފައެވެ.
އިހުސާން ވިދާޅުވީ އެ ނިންމުމަށް ތާއީދުކުރާ ބައެއް މުދައްރިސުން ވިދާޅުވާ ގޮތުން އެކުދިން ކޮމްބައިންޑް ސައިންސާއި، ކޮމްބައިންޑް ބިޒްނަސް ސްޓްރީމް ކިޔަވާނެ ކަމަށެވެ. އެހެންވީމަ އެމާއްދާތަކުގައި ހިމެނިފައި ހުރި ބައިތަކަކީ މިހާރު ވެސް އޯލެވަލްގައި ހިމެނޭ ބައިތައް ކަމަށް އެފަދަ ބޭބޭފުޅުން ވިދާޅުވާ ކަމަށެވެ. އެހެންވީމަ އެކުދިންނަށް އެކަމުގެ ސަބަބުން ގެއްލުމެއް ނުވާނެ ކަމަށް އެކަމަށް ތާއީދު ކުރާ ފަރާތްތަކުން ބުނަމުންދާ ކަމަށެވެ.
އެކަމާއި ގުޅޭގޮތުން އިހުސާން ވިދާޅުވީ އެ ދަރިވަރުން ކިޔަވަނީ ހަމައެކަނި ކޮމްބަައިންޑް ސައިންސްއާއި ކޮމްބައިންޑް ބިޒްނަސް ނޫން ކަމަށެވެ. އެ ކުދިން މެތަމެޓިކްސް، ދިވެހި އިސްލާމް، ސޯޝަލް ސްޓަޑީސް އަދި އެ ނޫން މާއްދާތައް ވެސް ގްރޭޑް 8 ގައި ކިޔަވާނެކަން އިހުސާން ފާހަގަކުރެއްވިއެވެ.
އެހެންކަމުން އެ މާއްދާތަކުގެ އަލީގައި އެމާއްދާތަކުން ކުދިންނަށް ލިބޭ މައުލޫމާތާއެކު އެކުދިން އިށީންނަ އިމްތިހާނަކުން އެކުދިންނަށް ނުކުންނަ ނަތީޖާއެއްގެ މައްޗަށް ރިޔާއަތް ކޮށްފައި އެކުދިން އަމިއްލައަށް ނިންމާނިންމުމެއް އެކުދިން ކުރިއަށްދާނި ސައިންސް ސްޓްރީމުންތޯ ނުވަތަ ބިޒްނަސް ސްޓްރީމުންތޯ. ނަމަވެސް މިއަދު މި ދިމާވި ކަމަކީ ޖެނުއަރީ މަސް ފެށުނުއިރުގަ އެކުދިންނަށް ނޭނގޭ ވާން މިއުޅެނީ ކިހިނެތް ކަމެއް. އެކުދިން ތިބީ ދެވަނަ ޓާމްގެ އިމްތިހާނަށް ތައްޔާރުވާން.އިހުސާން
އިހުސާން އިތުރަށް ވިދާޅުވީ ދަރިވަރުންނަށް އެކަށީގެންވާ ސްޓްރީމެއް ރަނގަޅަށް ޚިޔާރު ކުރެވޭނީ ދެވަނަ ޓާމްގެ އިމްތިހާން ހަދައި އޭގެ ނަތީޖާ ނުކުތީމަ ކަމަށެވެ. އެހެންނަމަވެސް އެ ފުރުސަތު އެކުދިންނަށް ނުލިބުނު ކަމަށް އިހުސާން ވަނީ ވިދާޅުވެފައެވެ. އެ ފުރުސަތު ނުލިބުމުން ސްޓްރީމެއް ޚިޔާރުކުރުމުގެ ނިންމުން ކުއްލިއަކަށް ނިންމަންޖެހުނީމަ އެކުދިން ގެ ނިންމުމަކީ ކުރިން ދެވަނަ ޓާރމްގެ އިމްތިހާނަށް ފަހު ނިންމި ނިންމުމާއި އެއްގޮތް ވާނެތޯ އިހުސާން ސުވާލު އުފެއްދެވިއެވެ. އެހެންކަމުން އެ އެފުރުސަތު ދަރިވަރުންނަށް ނުލިބުމުން އެއީ ވަރަށް ބޮޑު ގެއްލުމެއް ކަމަށް އިހުސާން ވަނީ ވިދާޅުވެފައެވެ.
ނިމިދިޔަ ސަރުކާރުން ކަރިކިއުލަމްގެ މުޅި މަންހަޖު ފަރުމާ ކޮށްފައި އޮތީ އެގޮތަށް ކަމަށާއި ގްރޭޑް 7،8 އެއީ އޯލަވަލް ކުދިން ކިޔަވާ މާއްދާތަކަށް ތައްޔާރުވުމަށްޓަކައި ބޭނުންވާ އަސާސީ ބައިތައް ހިމަނައިގެން އެކުލަވާފައިވާ ސިލަބަސްތަކެއް ކަމަށް ވެސް އިހުސާން ވިދާޅުވިއެވެ. އެހެންވީމަ އެ ގްރޭގްގައި ހިމެނޭ ބައިތައް ފުރިހަމަ ކުރުމުގެ ފުރުސަތު އެކުދިންނަށް ނުދީ ދެން އެކުދިން ކުރިއަށް އޮތް އޯލަވަލްގެ ސިލަބަސްތައް ކިޔަވަން ފެށުމަކީ ލިބޭ ބޮޑު ގެއްލުމެއް ކަމަށް އިހުސާން ވަނީ ވިދާޅުވެފައެވެ.
