ކައުންސިލް އިންތިޚާބުގެ ޕްރައިމަރީ އަށް މި ސަރުކާރުން ދަނީ ހުރަސް އަޅަމުން: އެމްޑީޕީ

ލޯކަން ކައުންސިލް އިންތިޚާބުގައި އެމްޑީޕީގެ ފަރާތުން ވާދަކުރާނެ ކެންޑިޑޭޓުން ހޮވުމަށްޓަކައި ބާއްވާ ޕްރައިމަރީ އަށް މިސަރުކާރުން ހުރަސް އަޅަމުންދާ ކަމަށް އެމްޑީޕީން ބުނެފި އެވެ.

ހޯމަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ލޯކަލް ކައުންސިލް އިންތިޚާބުގެ ކަންކަން ވިލަރެސްކުރާ ކޮމިޓީ ގެ މުގައްރިރު އަދި ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު ވިދާޅުވީ އެމްޑީޕީގެ ޕްރައިމަރީ އަކީ އާދައިގެ ޕްރައިމަރީއެއް ނޫން ކަމަށާއި، އެއީ ވަރަށް ވާދަވެރިކަމާއެކު ކުރިއަށްދާ އިންތިޚާބެއް ކަމަށެވެ. އަދި މިހާރު ވެސް ވަރަށް ގަދައަށް ކެންޕޭންގެ ހަރަކާތްތައް ކުރިއަށްދާ ކަމަށް އޭނާ ވިދާޅުވި އެވެ. 

އަބަދުވެސް ޑިމޮކްރަސީގެ އުސޫލުން ޕްރައިމަރީތައް ބާއްވަނީ އެމްޑީޕީން ކަން ފާހަގަކުރައްވައި ފަލާހު ވިދާޅުވީ މި ޕްރައިމަރީ އަށް ސަރުކާރުން ވަރަށް ބޮޑަށް ހުރަސް އަޅަމުންދާ ކަމަށެވެ. އަދި ޕްރައިމަރީގައި ވޯޓުލާނަމަ ވަޒީފާއިން ކަނޑާލާނެ ކަމުގެ އިންޒާރު ވަރަށް ގިނަ މީހުންނަށް ދީފައިވާ ކަމަށް އޭނާ ވިދާޅުވި އެވެ. 

ޕްރައިމަރީ ބޭއްވުމަށް މަސައްކަތް ކުރަމުންދާއިރު މިއަދުގެ ސަރުކާރުން އަޅުގަނޑުމެންގެ ޕްރައިމަރީއަށް  ހުރަސް އެޅުމަށްޓަކައި ކަންކަން ކުރަމުން އެބަ ގެންދޭ. އަޅުގަނޑަށް ކޮންމެ ދުވަހަކު ވެސް އެތައް ބައިވަރު ކޯލެއް ލިބެމުން އެބަދޭ ތިމަންނަމެން ވޯޓުލާން ގޮސްފިއްޔާމުން ވެސް ވަޒީފާ ކަނޑާލާނެ ކަމުގެ އިންޒާރު އެބައާދޭ. ވަރަށް ގިނަ އެމްޑީޕީގެ މެންބަރުން ރާއްޖޭގެ އެކި ކުންފުނިތަކުގައި މަސައްކަތް ކުރޭ. އެ ކުދިންނަށް މަސައްކަތް ކުރުމުގެ ޖާގަ ލިބިފައި އެކުދީން އެކި ފަހަރުގެ މަތީން އެކި ކަންކަމުގައި ބައިވެރިވީމަ ދެފަހަރު އިންޒާރު ދީފައި އެއްފަހަރު އިންޒާރު ދީފައި  އެއްވެސް ހަރަކާތެއްގައި ބައިވެރިވެއްޖެ ކަމަށްވަންޏާ ވަޒީފާއިން ކަނޑާލާނެކަމުގެ ބިރު އެބަ ދައްކަމުން ގެންދޭ.

ރައްޔިތުން މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު

ފަލާހު ވިދާޅުވީ އެމްޑީޕީ ނޫން ފިކުރެއް ރާއްޖޭގެ ވެރިކަމަށް އަންނަ ކޮންމެ ފަހަރަކު ރައްޔިތުންނަށް ބިރު ދައްކާ ކަމަށެވެ. އެކަން މާޒީން ވެސް ފެނިފައިވާ ކަމަށާއި، ނަމަވެސް ބިރު ދައްކައިގެން ހާސިލް ކުރަން ބޭނުންވާ ނަތީޖާ މިއަދު ހާސިލް ނުކުރެވޭނެ ކަމަށް ފަލާހު ވިދާޅުވި އެވެ.

މީގެ އިތުރުން ފަލާހު ވިދާޅުވީ 16 ޖަނަވަރީ 2026 ވާ ހުކުރު ދުވަހު ބޭއްވުމަށް ހަމަޖެހިފައިވާ ޕްރައިމަރީގައި ޖުމްލަ 65 ވޯޓު ފޮއްޓެއް ބަހައްޓާނެ ކަމަށެވެ. އަދި މިހާރު ބައެއް ބަދަލުތައް އައިސްފައިވާ ކަމަށާއި، ކަލާފާނު ސްކޫލުގައި ބެހެއްޓުމަށް ހަމަޖެހިފައިވާ ވޯޓު ފޮށިތައް މަޖީދިއްޔާ ސްކޫލަށް ބަދަލު ކޮށްފައިވާ ކަމަށެވެ. އެގޮތުން ހިތަދޫ މޫލެކެޑެ، ފޭދޫ މާދެލަ، ފުވައްމުލަކު ސިޓީގެ ދޫޑިގަން އަދި ތިނަދޫ ސިޓީގެ ފޮށިތައް ބެހެއްޓިފައި ހުންނާނީ މަޖީދިއްޔާ ސްކޫލްގައި ކަމަށް އޭނާ ވިދާޅުވި އެވެ.