ޝަމާހު ވަކިކުރިތާ 24 ގަޑި އިރު ނުވަނީސް އޭނާގެ މައްސަލަ އެއް އޭސީސީ އިން ބަލަން ފަށައިފި
ސްޓެލްކޯގެ ކުރީގެ މެނޭޖިންގ ޑިރެކްޓަރު ޝަމާހު ރަޝީދުގެ މައްސަލަ އެއް އޭސީސީ އިން އަންނަނީ ބަލަމުން. އޭނާގެ މައްސަލަ އެއް އޭސީސީ އިން ބަލަން ފަށާފައިވަނީ އޭނާ މަގާމުން ވަކިކުރިތާ 24 ގަޑި އިރު ނުވަނީސް.
ސްޓެލްކޯގެ ކުރީގެ މެނޭޖިން ޑިރެކްޓަރު އަހްމަދު ޝަމާހު ރަޝީދު | ސްޓެލްކޯ
ސްޓެލްކޯގެ މެނޭޖިންގެ ޑިރެކްޓަރު ކަމުން ޝަމާހު ރަޝީދު ވަކިކުރިތާ 24 ގަޑި އިރު ނުވަނީސް އޭނާ ގެ މައްސަލަ އެއް އޭސީސީ އިން ބަލަން ފަށައިފި އެވެ.
އޭސީސީގެ މީޑިއާ އޮފިޝަލް އައިޝަތު ސަމާ، ރާއްޖެއެމްވީ އަށް މައުލޫމާތު ދެއްވަމުން ވިދާޅުވީ ސްޓެލްކޯގެ ކުރީގެ މެނޭޖިންގ ޑިރެކްޓަރަކަށް ތުހުމަތު ކުރެވޭ މައްސަލަ އެއް އޭސީސީ އަށް ހުށަހަޅާފައިވާ ކަމަށެވެ. އޭސީސީ އަށް ހުށަހަޅާފައިވަނީ ސްޓެލްކޯގެ ކޮން އެމްޑީއެއްގެ މައްސަލަ އެއް ކަމަށް މީޑިއާ އޮފިޝަލް ވިދާޅެއް ނުވެ އެވެ.
ނަމަވެސް ރާއްޖެ އެމްވީ އަށް އެނގިފައިވާ ގޮތުގައި ހުށަހަޅާފައިވަނީ ޝަމާހުގެ މައްސަލަ އެކެވެ. އަދި އެ މައްސަލަ އޭސީސީ އިން އަންނަނީ ބަލަމުންނެވެ.
ސްޓެލްކޯގެ މެނޭޖިން ޑިރެކްޓަރު އަހްމަދު ޝަމާހު ރަޝީދު ވަކިކުރީ އާދީއްތަ ދުވަހު އެވެ. އޭނާ އެ މަގާމަށް އައްޔަން ކުރީ މިދިޔަ ސެޕްޓެމްބަރު މަހުގައި އޭރު އެ މަގާމުގައި ހުންނެވި ހުސައިން ފަހުމީ ވަކިކުރުމަށް ފަހު އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން (ޕީސީބީ) އިން އެކްސް ގައި ކުރި ޕޯސްޓެއްގައި ބުނީ ސްޓެލްކޯގެ އެމްޑީގެ މަގާމުންނާއި ޑިރެކްޓަރުންގެ ބޯޑުން ޝަމާހް ވަކިކޮށްފައިވާ ކަމަށެވެ.
ޝަމާހްއަކީ 2024 ވަނަ އަހަރު މިފްކޯގެ ސީއީއޯ ކަމުން ވެސް ވަކިކުރި ބޭފުޅެކެވެ. އޭނާ އެ މަގާމުން ވަކިކުރީ މެއި 21، 2024 ގަ އެވެ. ޝަމާހު މަގާމުން ވަކިކުރުމުގެ ކުރިން، ކޯޕަރޭޓް ގަވަރނަންސްއާ ގުޅޭ މައްސަލަތަކެއް ގައި އޭނާ ދެ ފަހަރެއްގެ މަތިން ސަސްޕެންޑުކުރި އެވެ. އެއަށްފަހު ސްޓެލްކޯގެ އެމްޑީ ކަމަށް އައްޔަން ކުރިތާ 4 މަސްތެރޭގައި ވަކި ކުރި އިރު އެ މަގާމަށް އައްޔަންކުރަނީ ކާކުކަމެއް މިހާތަނަށް ސާފުވެފައެއް ނުވެ އެވެ.
