ލޭ ދޭ ފަރާތްތަކުގެ ދަފްތަރެއް ގާއިމް ނުކުރެވި ގިނަދުވަސް ވާތީ މިނިސްޓަރާ ސުވާލު ކުރަނީ

 ތެލަސީމިއާ ކުދިންނަށް ލޭ ދޭނެ ފަރާތްތަކުގެ ގޮތުގައި އެ ކުދިން ސެންޓަރަށް ތައާރަފު ކޮށްދޭ ފަރާތްތަކާ އެ ފަރާތްތަކުގެ ލޭ ގެ ތަފްސީލް ދަފްތަރެއް ގާއިމް ނުކުރެވި ގިނަ ދުވަސް ވާތީ އެކަމާ ގުޅޭގޮތުން ހެލްތު މިނިސްޓަރު އަބްދުﷲ ނާޒިމް އާ ސުވާލު ކުރަން ރައްޔިތުންގެ މަޖިލީހަށް ހުށަހަޅައިފި އެވެ.

މި ސުވާލު މިނިސްޓަރާ ކުރެއްވުމަށް ހުށަހެޅުއްވީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) އެވެ.

ކުޑޫ ވަނީ ސިއްހީ ޚިދުމަތް ދިނުުމުގެ ގާނޫނު އަދި ތެލަސީމިއާ ކޮންޓްރޯލް ކުރުމުގެ ގާނޫނުގައި ކަނޑައެޅިގެން ބަޔާން ކުރެވިފައި ވިޔަސް ސިއްހީ ޚިދުމަތް ދޭ މަރުކަޒުތަކުގައި ދޭ ލޭގެ ޚިދުމަތާ ބެހޭ ގައުމީ ނިޒާމު ގާއިމުކޮށް ތެލަސީމިއާ ކުދިންނަށް ލޭ ދޭނެ ފަރާތްތަކުގެ ގޮތުގައި އެ ކުދިން ސެންޓަރަށް ތައާރަފު ކޮށްދޭ ފަރާތްތަކާ އެ ފަރާތްތަކުގެ ލޭގެ ތަފްސީލް ދަފްތަރެއް ގާއިމް ނުކުރެވިގެން މިހާ ގިނަ ދުވަސް މި ދަނީ ކީއްވެ ތޯ މިނިސްޓަރާ ސުވާލު ކުރެއްވުމަށް ހުށަހަޅުއްވާފަ އެވެ. އަދި ލޭ ހޯދުމާ ދިނުމުގައި މިހާރު މި ދިމާވާ ދަތިތަކަށް ޒަމާނީ ހައްލެއް ނުގެނެވިގެން އުޅެނީ ކީއްވެ ތޯ ސުވާލު ކުރެއްވުމަށް ވެސް މެންބަރު ހުށަހަޅުއްވާފައި ވެ އެވެ. 

ކުޑޫ ވިދާޅުވީ ލޭގެ ޚިދުމަތާ ބެހޭ ގައުމީ ނިޒާމު ގާއިމުކޮށް ތެލަސީމިއާ ކުދިންނަށް ލޭ ދޭނެ ފަރާތްތަކުގެ ގޮތުގައި އެ ކުދިން ސެންޓަރަށް ތަޢާރުފުކޮށްދޭ ފަރާތްތަކާއި އެ ފަރާތްތަކުގެ ލޭގެ ތަފްސީލު ދަފްތަރެއް ގާއިމް ކުރެވިފައި ނުވާއިރު ލޭ ހޯދުމާއި ދިނުމުގައި މިހާރު މި ދިމާވާ ދަތިތަކަށް ޒަމާނީ ހައްލެއް ގެންނަން ޖެހޭ ކަމަށެވެ. 

މި ދުވަސްވަރު ލޭ ލިބުން ވަރަށް ބޮޑަށް ދަތިވެފައިވާތީ، ވީހާ ވެސް ގިނަ ފަރާތްތަކުން ލޭ ހަދިޔާ ކޮށްދިނުމަށް މޯލްޑިވްސް ބްލަޑް ސާވިސް އިން ވަނީ މިފަހުން ވެސް އިލްތިމާސް ކޮށްފަ އެވެ. 

އެމްބީއެސް އިން އާންމުކުރި ޕޯސްޓުގައި ވާ ގޮތުން ލޭ އެންމެ ބޭނުންވާ ގްރޫޕްތަކަކީ އޭ ޕޮޒިޓިވް، އޯ ޕޮޒިޓިވް، އޯ ނެގެޓިވް، ބީ ޕޮޒިޓިވް، ބީ ނެގެޓިވް އަދި އޭބީ ޕޮޒިޓިވް ގްރޫޕްގެ ލޭ އެވެ. މި ގްރޫޕްތަކުގެ ލޭ ހަދިޔާކުރުމަށް ބްލަޑް ސާވިސް އިން ވަކިން ހާއްސަ ކޮށް ވަނީ އެދިފަ އެވެ. 

ލޭ ހަދިޔާ ކުރަން ބޭނުންވާ ފަރާތްތަކުން ހުޅުމާލޭގައި ހުންނަ އޮރެންޖް ހިޔާއަށް އެ ގަޑިތަކުގައި ދިއުމުން ލޭ ހަދިޔާ ކުރެވޭނެ އެވެ. ނަމަވެސް ލޭ ހަދިޔާ ކުރެވޭނީ އުމުރުން 18 އަހަރު ވެފައިވާ މީހުންގެ ތެރެއިން 45 ކިލޯއަށް ވުރެ ބަރު މީހުންނަށެވެ.

ލޭ ހަދިޔާކުރަން ދާއިރު މަދުވެގެން ހަ ގަޑިއިރުގެ ނިދި ހަމަކުރުމަށާއި، އަދި ލޭ ހަދިޔާކުރަން ދިއުމުގެ އެއްގަޑިއިރު ކުރިން ކެއުމަށް ބްލަޑް ސާވިސް އިން އެދިފައިވެ އެވެ. 

ކޮންމެ ހަފްތާއެއްގެ ވެސް އާދިއްތަ ދުވަހުން ބުރާސްފަތި ދުވަހުގެ ނިޔަލަށް ހެނދުނު 8:00ން ރޭގަނޑު 8:00 އާ ހަމައަށް ލޭ ހަދިޔާ ކުރެވޭނެ ކަމަށް ބްލަޑް ސާވިސް އިން ބުނެފައިވެ އެވެ. ލޭ ހަދިޔާކުރުމަށް ބޭނުންވާ މީހުން މި ގަޑިތަކުގައި އޮރެންޖް ހިޔާއަށް ޒިޔާރަތްކުރުމަށް އެ އިދާރާއިން ގޮވާލައިފައިވެ އެވެ.

ލޭ ހަދިޔާކުރުމަކީ ފަރުވާއަށް ބޭނުންވާ މީހުންނަށް ދިރިހުރުމުގެ ފުރުސަތު ދިނުމުގެ ގޮތުން ކުރެވޭ މާތް ސަދަގާތެކެވެ. ލޭގެ ބޭނުންވާ ހާލަތްތަކުގައި ލޭ ލިބުން ދަތިވުމަކީ ފަރުވާ ދިނުމުގައި ބޮޑެތި ހުރަސްތަކެއް ކުރިމަތިވާ ކަމެކެވެ.