ރައްޔިތުންގެ މަޖިލީހުގައި ވެރި މީހާ ވިދާޅުވާހާ ބަތަކަށް ރިހަ އަޅަންޏާ، މީޑިއާ ވެސް އާއްމުން ވެސް ބަސް ބުނާނެ!
6 ޖެނުއަރީ 2026 | އަންގާރަ 14:23ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިޚާބު އެކުގައި ބާއްވަން ގާނޫނު އަސާސީ އަށް އިސްލާހު ގެނައުމުގެ ބިލު ހޯމަ ދުވަހު މަޖިލީހަށް ހުށަހަޅައި ފުރަތަމަ ކިޔުން އިއްވައި އިބްތިދާއީ ބަހުސް ނިންމާލީ އަވަސް އަރުވާލައިގެން.
މުޅި މަޖިލީހުގެ ކޮމިޓީ ބައްދަލުވުމެއްގެ ތެރެއިން | ރައްޔިތުންގެ މަޖިލިސް
ހޯމަ ދުވަހު ފެނިގެން ދިޔަ މަންޒަރަކީ ޖަލްސާ ނިންމަވާލައްވަމުން މީޑިއާ އިން ޚަބަރު ގެނެސްފާނެ ގޮތަކާ މެދު މަޖިލީހުގެ ރައީސް އަބްދުއްރަހީމް އަބްދުﷲ ނިކަން ފިކުރު ބޮޑުވެގެން އުޅުއްވި މަންޒަރެވެ. ދައުރުން ބޭރުން ބޭއްވި ދެ ވަނަ ޖަލްސާ ފެށިތާ 20 ވަރަކަށް މިނިޓު ތެރޭ ނިންމާލަމުން މަޖިލީހުގެ މަސައްކަތެއް ނެތް ކަމަށް ބުނެވެން ނެތް ކަމަށް ދައްކަން ނިކަން މަސައްކަތް ކުރެއްވި އެވެެ.
ވެގެން އުޅޭ ގޮތް ރައްޔިތުންނަށް ނިކަން ސާފެވެ. ބޭނުމީ ވެރި މީހާ ރުއްސާށެވެ. އެކަމަކު މަޖިލީހުގެ މަސައްކަތެއް ނެތިގެން ޖަލްސާ ކުރުވާ ކަމަށް މީޑިއާ އިން ބުނެފާނެތީ އެކަމާއި މަޖިލީހުގެ ރައީސް އުޅުއްވަނީ ބިރުންނެވެ.
ރައްޔިތުންގެ މަޖިލިސް އިންތިޚާބާއި ރިޔާސީ އިންތިޚާބު އެކުގައި ބާއްވަން ގާނޫނު އަސާސީ އަށް ބަދަލު ގެނައުމަށް މުޅި ސަރުކާރު ކެކި އުތުރެނީ އެވެ. ހުށަހަޅާފައިވާ ބިލު 10 ދުވަސް ތެރޭ ދިރާސާ ކޮށް ނިންމުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީ އިންނިންމާފައިވާ އިރު އެ ބަދަލު ގެނައުން ދައުރު ފެށުމާއި ހަމަ އަށް ވެސް ފަސްކޮށްލުން ވީ ސަރުކާރަށް ނުކަތާ ވަރުގެ ކަމަކަށެވެ.
ދެ އިންތިޚާބު އެކުގައި ބޭއްވުމަށް ސަރުކާރުގެ ފަރާތުން ގާނޫނު އަސާސީ އަށް ގެންނަ އިސްލާހުގެ ބިލު މަޖިލިހަށް ހުށަހެޅި ހޯމަ ދުވަހު އެވެ. އަދި ބިލު ހުށަހަޅުއްވާފައި ވަނީ އިނގުރައިދޫ ދާއިރާގެ މެމްބަރު އިބްރާހިމް ފަލާހް އެވެ.
ހޯމަ ދުވަހުގެ ޖަލްސާގައި އެ ބިލުގެ ފުރަތަމަ ކިޔުން އިއްވުމަށް ފަހު ބިލުގެ އިބްތިދާއީ ބަހުސް ފަށާ ފަޓާސް ބަރި އެއް ހެން އެ މަސައްކަތް ކުރިއަށް ގެންދެވީ އެވެ. އަވަސް އަވަހަށް އެ ބަހުސް ނިންމުމަށް ފަހު ބިލު ބަލައިގަތުމަށް ފެނޭތޯ ވޯޓަށް އެހީ ވެސް ރާސްލާފައި ކަންކަން ނިންމާލާ އުސޫލުންނެވެ. އެހެންވީމަ އާއްމުން މަޖިލީހަށް ބަދު ބަސް ނުބުނާނެ ކަމަށް ހީކުރާނެ ޖާގަ އެއް ނެތެވެ.
މިހާ އަވަސް އަރުވާލައިގެން ކަންކަން ކުރަނީ ގައިމު ކުރަން ހުރި މަސައްކަތްތަކަށް އިސްކަން ދެއްވާތީ އެއް ނޫނެވެ. އެހެން ނޫން ނަމަ އާއްމުންނާއި ގުޅުން ހުރި ސުވާލުތަކަށް ޖަވާބު ދިނުމަށް ވަޒީރުން ހާޒިރުކުރާނެ އެވެ. މި މޭރުމުން ކަންކަން ކޮށް ރައްޔިތުންގެ މަޖިލީހުގައި ވެރި މީހާ ވިދާޅުވާހާ ބަތަކަށް ރިހަ އަޅަންޏާ، މީޑިއާ ވެސް އާއްމުން ވެސް ބަސް ބުނާނެ އެވެ.
