ލޭ ލިބުން ދަތިވެއްޖެ ކަމަށް ބްލަޑް ސާވިސް އިން ބުނެފި
23 ޖެނުއަރީ 2026 | ހުކުރު 03:38ކޮންމެ ހަފްތާ އެއްގެ އާދިއްތަ ދުވަހުން ބުރާސްފަތި ދުވަހުގެ ނިޔަލަށް ހެނދުނު 8:00 އިން ރޭގަނޑު 8:00 އާ ހަމައަށް ހުޅުމާލޭގެ އޮރެންޖް ހިޔާއަށް ވަޑައިގެން ލޭ ހަދިޔާކުރެވޭނެ ކަމަށް ބްލަޑް ސާވިސް އިން ބުނެފަވޭ.
ލޭ ހަދިޔާ ކުރުމުގެ ކޭމްޕެއްގެ ތެރެއިން؛ މި ދުވަސްވަރު ލޭ ލިބުން ވަރަށް ބޮޑަށް ދަތިވުމުގެ ސަބަބުން، ވީހާ ވެސް ގިނަ ފަރާތްތަކުން ލޭ ހަދިޔާ ކޮށްދިނުމަށް މޯލްޑިވްސް ބްލަޑް ސާވިސް އިން ވަނީ ގޮވާލާފަ | ރާއްޖެއެމްވީ
މި ދުވަސްވަރު ލޭ ލިބުން ވަރަށް ބޮޑަށް ދަތިވެފައިވާތީ، ވީހާ ވެސް ގިނަ ފަރާތްތަކުން ލޭ ހަދިޔާ ކޮށްދިނުމަށް މޯލްޑިވްސް ބްލަޑް ސާވިސް އިން ގޮވާލައިފި އެވެ.
ލޭ ހަދިޔާކުރާ ޑޯނަރުންގެ އަދަދު މިހާރު ވަރަށް ބޮޑަށް މަދުވެފައިވާ ކަމަށް އެ އިދާރާ އިން ބުރާސްފަތި ދުވަހު އެކްސް ގައި ކުރި ޕޯސްޓެއްގައި ބުނެފައިވެ އެވެ. މި ހާލަތާ ގުޅިގެން ލޭ ބޭނުންވާ މީހުންނަށް ލޭ ފޯރުކޮށްދިނުމުގައި ދަތިތަކެއް ވަނީ ކުރިމަތިވެފަ އެވެ.
އެމްބީއެސް އިން އާންމުކުރި ޕޯސްޓުގައި ވާ ގޮތުން ލޭ އެންމެ ބޭނުންވާ ގްރޫޕްތަކަކީ އޭ ޕޮޒިޓިވް، އޯ ޕޮޒިޓިވް، އޯ ނެގެޓިވް، ބީ ޕޮޒިޓިވް، ބީ ނެގެޓިވް އަދި އޭބީ ޕޮޒިޓިވް ގްރޫޕްގެ ލޭ އެވެ. މި ގްރޫޕްތަކުގެ ލޭ ހަދިޔާކުރުމަށް ބްލަޑް ސާވިސް އިން ވަކިން ހާއްސަ ކޮށް ވަނީ އެދިފަ އެވެ.
ލޭ ހަދިޔާ ކުރަން ބޭނުންވާ ފަރާތްތަކުން ހުޅުމާލޭގައި ހުންނަ އޮރެންޖް ހިޔާއަށް އެ ގަޑިތަކުގައި ދިއުމުން ލޭ ހަދިޔާ ކުރެވޭނެ އެވެ. ނަމަވެސް ލޭ ހަދިޔާ ކުރެވޭނީ އުމުރުން 18 އަހަރު ވެފައިވާ މީހުންގެ ތެރެއިން 45 ކިލޯއަށް ވުރެ ބަރު މީހުންނަށެވެ.
ލޭ ހަދިޔާކުރަން ދާއިރު މަދުވެގެން ހަ ގަޑިއިރުގެ ނިދި ހަމަކުރުމަށާއި، އަދި ލޭ ހަދިޔާކުރަން ދިއުމުގެ އެއްގަޑިއިރު ކުރިން ކެއުމަށް ބްލަޑް ސާވިސް އިން އެދިފައިވެ އެވެ.
ކޮންމެ ހަފްތާއެއްގެ ވެސް އާދިއްތަ ދުވަހުން ބުރާސްފަތި ދުވަހުގެ ނިޔަލަށް ހެނދުނު 8:00ން ރޭގަނޑު 8:00 އާ ހަމައަށް ލޭ ހަދިޔާ ކުރެވޭނެ ކަމަށް ބްލަޑް ސާވިސް އިން ބުނެފައިވެ އެވެ. ލޭ ހަދިޔާކުރުމަށް ބޭނުންވާ މީހުން މި ގަޑިތަކުގައި އޮރެންޖް ހިޔާއަށް ޒިޔާރަތްކުރުމަށް އެ އިދާރާއިން ގޮވާލައިފައިވެ އެވެ.
ލޭ ހަދިޔާކުރުމަކީ ފަރުވާއަށް ބޭނުންވާ މީހުންނަށް ދިރިހުރުމުގެ ފުރުސަތު ދިނުމުގެ ގޮތުން ކުރެވޭ މާތް ސަދަގާތެކެވެ. ލޭގެ ބޭނުންވާ ހާލަތްތަކުގައި ލޭ ލިބުން ދަތިވުމަކީ ފަރުވާ ދިނުމުގައި ބޮޑެތި ހުރަސްތަކެއް ކުރިމަތިވާ ކަމެކެވެ.
