ރިޔާސީ ބަޔާން އިއްވާ ޖަލްސާ ފެބްރުއަރީ 5 ވަނަ ދުވަހު ބާއްވަނީ
މި އަހަރުގެ ފުރަތަމަ ދައުރުގެ ފުރަތަމަ ޖަލްސާ ފެބްރުއަރީ 5 ގައި ބޭއްވުމަށް ހަމަޖެހިފައިވާ އިރު އެ ޖަލްސާގައި ރައީސް މުއިއްޒުގެ ރިޔާސީ ބަޔާން އިއްވާނެ.
ރައީސް ޑރ. މުހައްމަދު މުއިއްޒު ރިޔާސީ ބަޔާން ދެއްވަނީ. (ފައިލް) | ރައީސް އޮފީސް
ރައްޔިތުންގެ މަޖިލީހުގެ މި އަހަރުގެ ފުރަތަމަ ޖަލްސާ ކުރިއަށް އޮތް ފެބްރުއަރީ މަހުގެ 5 ވަނަ ދުވަހު ބާއްވަން އިއުލާންކޮށްފި އެވެ.
އެކަން ހާމަކޮށް މަޖިލީހުގެ އިދާރާ އިން ބުނެފައި ވަނީ މި އަހަރުގެ ފުރަތަމަ ދައުރުގެ ފުރަތަމަ ޖަލްސާ ފެބްރުއަރީ 5، ގެ ހެދުނު 9:00ގައި ބޭއްވުމަށް ހަމަޖެހިފައިވާ ކަމަށެވެ. އެ ޖަލްސާގައި ރައީސް ޑރ.މުހައްމަދު މުއިއްޒުގެ ރިޔާސީ ބަޔާން ވެސް އިއްވާނެ އެވެ. މިއީ މިހާރު ކުރިއަށް ދާ 20 ވަނަ ރައްޔިތުންގެ މަޖިލީހުގެ ތިން ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާ އެވެ.
މަޖިލީހުގެ ޖަލްސާތައް ރަސްމީކޮށް ފަށަނީ އަންނަ މަހު ކަމަށް ވީ ނަމަވެސް މި މަހު ދައުރުން ބޭރުން ދެ ޖަލްސާ އެއް ވަނީ ބާއްވާފަ އެވެ. ޕީއެންސީގެ ޕީޖީ އިން އެދިގެން ބޭއްވި އެ ޖަލްސާތަކަކީ ގާނޫނުއަސާސީ އަށް ސަރުކާރުން ބޭނުންވެގެން ބަދަލުތަކެއް ގެނައުމަށާއި އެހެނިހެން ބައެއް މަސައްކަތްތައް ކުރުމަށް ބޭއްވި ޖަލްސާ އެކެވެ.
ދައުރުން ބޭރުން ޖަލްސާ އެއް ބާއްވައިގެން ގާނޫނުއަސާސީ އަށް ސަރުކާރުން ހުށަހަޅާފައިވާ ބަދަލަކީ ރިޔާސީ އިންތިހާބާއި މަޖިލީހުގެ އިންތިހާބު އެއްކޮށްލުމަށް މަގުފަހިކުރުމަށް ހުށަހެޅި އިސްލާހެކެވެ. އެ މަގްސަދު ހާސިލްކުރުމަށް 20 ވަނަ މަޖިލީހުގެ ދައުރު ކުރު ކުރަން ޖެހެ އެވެ. މި ބިލު މަޖިލީހުން ފާސްކުރުމާއި އެކު އަންނަ އެޕްރީލް މަހު ބާއްވާ ލޯކަލް ކައުންސިލް އިންތިހާބާއި އެކު އިންތިޚާބުތައް އެއްކޮށްލުމާއި މެދު ރައްޔިތުންގެ ފެންނަ ނުފެންނަ ވޯޓެއް ނަގާނެ އެވެ.
މި މަސައްކަތް ނިންމުމަށް ދައުރުން ބޭރުން އިތުރު ޖަލްސާތަކެއް ބޭއްވުމަކީ އެކަށީގެންވާ ކަމެކެވެ. 2025 ވަނަ އަހަރުގެ މަސައްކަތްތައް ނިންމާލާފައި ވަނީ މިދިޔަ އަހަރު ޑިސެމްބަރު 3، 2025 ގަ އެވެ.
