އެއްވެސް ސަލާމަތީ ވަސީލަތަކާ ނުލައި ތައިވާނުގެ އެންމެ އުސް އިމާރާތް ކަމަށްވާ "ތައިޕޭ 101" އަށް މަޝްހޫރު ކްލައިމްބަރ ހަނޯލްޑް އަރައިފި

އުސް ތަންތަނަށް އެރުމަށް މަޝްހޫރު އެމެރިކާގެ މީހެއް ކަމަށްވާ އެލެކްސް ހަނޯލްޑް، އެއްވެސް ސަލާމަތީ ވަސީލަތަކާ ނުލައި ތައިވާނުގެ އެންމެ އުސް އިމާރާތް ކަމަށްވާ "ތައިޕޭ 101" އަށް އަރައިފި އެވެ.

މިދިޔަ އާދީއްތަ ދުވަހު، ދުނިޔޭގެ އެންމެ އުސް އިމާރާތްތަކުގެ ތެރޭގައި ހިމެނޭ މި އުސް ބިނާ އަށް ހަނޯލްޑް އެރީ އެއްވެސް ވާގަނޑެއް ނުވަތަ ސަލާމަތީ ވަސީލަތެއްގެ އެހީތެރިކަމާ ނުލަ އެވެ. އޭނާ މި ހަރަކާތް ކުރިއަށް ގެންދިޔަ އިރު، އެތައް ހާސް ބަޔަކު އެ ސަރަހައްދަށް އެއްވެ އޭނާއަށް ހިތްވަރުދީ އުފާފާޅުކުރަމުން ދިޔަ އެވެ.

ނެޓްފްލިކްސް އިން އިންތިޒާމުކޮށް ވަގުތުން ދައްކަމުންދިޔަ މި ހަރަކާތުގައި، 91 މިނެޓުގެ ތެރޭގައި އިމާރާތުގެ އެންމެ ކުރިއަށް އެރުމަށްފަހު، ހޮނޯލްޑް ބުނީ މިއީ ވަރަށް "ސަޅި" ތަޖުރިބާއެއް ކަމަށެވެ.

މޫސުން ގޯސްވުމުގެ ސަބަބުން އެއް ދުވަސް ފަސްކުރަން ޖެހުނު މި ހަރަކާތައް ފަހު އޭނާ ނޫސްވެރިންނާ ވާހަކަދައްކަމުން ބުނީ، މިއީ ތައިޕޭ ސިޓީ ބަލާލުމަށް ލިބުނު ވަރަށް ސަޅި ފުރުސަތެއް ކަމަށެވެ.

508 މީޓަރު (1,667 ފޫޓު) އުސް "ތައިޕޭ 101" އަކީ 2004 އިން 2010 އަށް ދުނިޔޭގެ އެންމެ އުސް އިމާރާތުގެ މަގާމު ފުރާފައިވާ ބިނާއެކެވެ. މިހާރު އެ މަގާމުގައި އޮތީ ދުބާއީގެ ބުރުޖު ޚަލީފާ އަށެވެ.

އެއްވެސް ސަލާމަތީ ސާމާނަކާ ނުލައި ކުރިއަށް ގެންދިޔަ މި ހަރަކާތަކީ "ތައިޕޭ 101" އިމާރާތުގެ މެނޭޖްމަންޓާއި ސިޓީ ގަވަރުމަންޓުގެ ފުރިހަމަ ހުއްދަ އާއި އެއްބާރުލުމާ އެކު ކުރިއަށް ގެންދިޔަ ހަރަކާތެކެވެ.

ހަނޯލްޑް ހާމަކުރި ގޮތުގައި، ކުރިން އޭނާ ހުއްދަ ނުހޯދައި މި އިމާރާތަށް އެރުމަށް ވިސްނާފައިވެ އެވެ. ނަމަވެސް، އިމާރާތުގެ އަގު ވަޒަންކުރުމަށާއި މިކަމުގައި އެހީތެރިވެދިން ޓީމަށް އިހުތިރާމް ކުރުމުގެ ގޮތުން، ހުއްދަ ލިބެންދެން މަޑުކުރަން ނިންމީ ކަމަށް އޭނާ ބުންޏެވެ.

މި ހަރަކާތުގެ އެގްޒެކެޓިވް ޕްރޮޑިއުސަރު ޖޭމްސް ސްމިތު ބުނި ގޮތުގައި، މިފަދަ ނުރައްކާތެރި ކަމަކަށް އިމާރާތެއްގެ ވެރިން އިތުބާރުކޮށް ހުއްދަ ދިނުމަކީ ވަރަށް މަދުން ނޫނީ ނުވާ ކަމެކެވެ. އަދި އޭނާ ވަނީ "ތައިޕޭ 101" އަކީ އެ ގައުމުގެ ފަހުރެއްގެ ގޮތުގައި ސިފަކޮށްފަ އެވެ.

ތައިވާނުގެ ސިޔާސީ އިސް ބޭފުޅުން ވަނީ ސޯޝަލް މީޑިއާ މެދުވެރިކޮށް ހަނޯލްޑް އަދި ނެޓްފްލިކްސް އަށް ޝުކުރު އަދާކޮށްފަ އެވެ. ސެމީކޮންޑަކްޓަރު އުފެއްދުމާއި ޗައިނާގެ އަސްކަރީ ނުރައްކަލުގެ ޚަބަރުތަކުން އާންމުކޮށް ފެންނަ ތައިވާން، މުޅިން ތަފާތު ގޮތަކަށް ބައިނަލްއަގުވާމީ ސަމާލުކަމަށް ގެނެސްދިނީތީ އެ ފަރާތްތަކުން ވަރަށް އުފާ ކުރި އެވެ.

ތައިވާނުގެ ރައީސް ލައި ޗިން-ޓޭ އޭނާގެ ފޭސްބުކް ޕޭޖުގައި ލިޔުއްވާފައި ވަނީ، "މި ބިރުކުޑަ، ހިތްވަރުގަދަ ކާމިޔާބީއަށްޓަކައި އެލެކްސް އަށް މަރުހަބާ ކިޔަން" ކަމަށެވެ. އަދި ނެޓްފްލިކްސްގެ ލައިވް ބްރޯޑްކާސްޓް މެދުވެރިކޮށް ދުނިޔެއަށް ފެނިގެންދިޔައީ ހަމައެކަނި "ތައިޕޭ 101" ނޫން ކަމަށާއި، ތައިވާނުގެ ރައްޔިތުންގެ ހިތްހެޔޮކަމާއި އެ ގައުމުގެ ގުދުރަތީ ރީތިކަން ވެސް ދުނިޔެއަށް ހާމަވެގެންދިޔަ ކަމަށް ރައީސް ވިދާޅުވި އެވެ.

މިއީ "ތައިޕޭ 101" އަށް މީހަކު އެރި ފުރަތަމަ ފަހަރެއް ނޫނެވެ. 2004 ވަނަ އަހަރު، "ސްޕައިޑަމޭން" ގެ ނަމުން މަޝްހޫރު ފްރާންސްގެ އެލެއިން ރޮބަޓް ވެސް ވަނީ މި އިމާރާތަށް އަރާފަ އެވެ. ނަމަވެސް، އޭނާ އެ ފަހަރު ސަލާމަތީ ވާގަނޑެއް ބޭނުން ކޮށްފައިވާއިރު، އެރުމަށް ހަތަރު ގަޑިއިރު ހޭދަވި އެވެ.