ޖަޕާނުގެ ބޮޑުވަޒީރު އެޤައުމުގެ ޤާނޫނު ހަދާ މަޖިލިސް އުވާލައްވައިފި

ޖަޕާނުގެ ބޮޑުވަޒީރު ސަނައޭ ޓަކައިޗީ އެޤައުމުގެ ޤާނޫނު ހަދާ މަޖިލިސް އުވާލައްވައި، އަވަސް އިންތިޚާބަކަށް މަގުފަހިކޮށްދެއްވައިފިއެވެ.

ފެބްރުއަރީ މަހުގެ 8 ވަނަ ދުވަހު ބޭއްވުމަށް ހަމަޖެހިފައިވާ މި އިންތިޚާބާ ގުޅިގެން، ޖަޕާނުގެ ތިރިގެ (ލޯވަރ ހައުސް) ރަސްމީކޮށް އުވާލިކަން އިޢުލާންކުރެއްވީ އެ މަޖިލީހުގެ ރައީސެވެ. މަޖިލިސް އުވާލުމުގެ ސިޓީ އިއްވެވުމާއެކު، މެންބަރުން ވަނީ އާދަކާދައިގެ މަތިން "ބަންޒާއީ" އޭ ގޮވާ އަޑުއުފުލާފައެވެ. ޖަޕާނުގައި މިހެން ގޮވާ އުޅެނީ ދިގު އުމުރެއް ލިބުމަށް އެދި ބުނާ އެއްޗެއްގެ ގޮތުގަ އެވެ.

465 މެންބަރުންގެ މައްޗަށް އެކުލެވޭ ތިރިގެ އުވާލުމާއެކު، 12 ދުވަހުގެ އިންތިޚާބީ ކެމްޕޭން އަންނަ އަންގާރަ ދުވަހު ރަސްމީކޮށް ފެށޭނެ އެވެ. ޖަޕާނުގެ ފުރަތަމަ އަންހެން ބޮޑުވަޒީރު، ޓަކައިޗީ، އަވަސް އިންތިޚާބެއް ބާއްވަވާނެކަން އިޢުލާންކުރެއްވީ މިދިޔަ ހޯމަ ދުވަހު އެވެ.

ނިމިދިޔަ އޮކްޓޯބަރު މަހު މަޤާމާ ހަވާލުވެވަޑައިގަތް ޓަކައިޗީ އަށް ވެރިކަމުގައި މިވީ ތިން މަސްދުވަހުގެ ތެރޭގައި އާންމުންގެ ބޮޑު ތަރުހީބެއް ލިބިފައިވެ އެވެ. ޚިޔާލު ހޯދުމުގެ ވޯޓުތަކުން ދައްކާގޮތުގައި އޭނާއަށް އޮތް ތަރުހީބު 70% އަށް އަރަ އެވެ. ޓަކައިޗީ އުންމީދު ކުރައްވަނީ އޭނާގެ މި މަޤްބޫލުކަމުގެ ބޭނުން ހިފައި، ފާއިތުވި އަހަރުތަކުގައި ވެރިކަން ކުރާ ޕާޓީއަށް އާންމުންގެ މެދުގައި ގެއްލިފައިވާ ތަރުހީބު އަނބުރާ ހޯދުމަށެވެ.

މިހާރު ވެރިކަން ކުރާ ކޯލިޝަނުގައި ހިމެނެނީ ޓަކައިޗީގެ ލިބަރަލް ޑިމޮކްރެޓިކް ޕާޓީ (އެލް.ޑީ.ޕީ) އާއި ޖަޕާން އިނޮވޭޝަން ޕާޓީ (ޖޭ.އައި.ޕީ) އެވެ. މި ކޯލިޝަނަށް މަޖިލީހުގައި އޮތީ ވަރަށް ހަނި އަޣުލަބިއްޔަތެކެވެ. ޔުނިވަރސިޓީ އޮފް ސުކޫބާގެ ޕޮލިޓިކްސް ޕްރޮފެސަރު ހިޑެހިރޯ ޔަމަމޯޓޯ ވިދާޅުވި ގޮތުގައި، ޓަކައިޗީގެ ކެބިނެޓަށް އޮތް ތަރުހީބު ސީދާ އެލް.ޑީ.ޕީއަށް ލިބޭނެ ކަމާމެދު ސުވާލު އުފެދެއެވެ. އަދި އާންމުން އެންމެ ބޮޑަށް ކަންބޮޑުވަނީ ތަކެތީގެ އަގު އުފުލުމާ ގުޅިގެން އަޅާނެ ފިޔަވަޅުތަކާމެދު ކަމަށް އޭނާ ފާހަގަކުރެއްވި އެވެ.

ޖަޕާނުގެ ދައުލަތުގެ މީޑިއާ، އެން.އެޗް.ކޭ އިން ރިޕޯޓްކުރާ ގޮތުގައި މި އިންތިޚާބުގެ މައިގަނޑު މައުޟޫޢުތަކަކަށް ވާނީ ތަކެތީގެ އަގު ކޮންޓްރޯލް ކުރުމާއި، ޗައިނާއާއެކު އޮތް ނުތަނަވަސްކަމާ ގުޅިގެން ކުރިމަތިވެފައިވާ ސަލާމަތީ މައްސަލަތަކެވެ. ޓައިވާނާ މެދު ޗައިނާ އިން އަސްކަރީ ފިޔަވަޅެއް އަޅައިފިނަމަ ޖަޕާނުން އެކަމުގެ ތެރެއަށް ވަދެދާނެ ކަމަށް ޓަކައިޗީ ނޮވެމްބަރު މަހު ވިދާޅުވި ބަހަކާ ގުޅިގެން، ޓޯކިޔޯ އާއި ބެއިޖިން އާ ދެމެދުގައި ވަނީ ޚާރިޖީ ނުތަނަވަސްކަމެއް އުފެދިފައެވެ.

އާއިލާތަކަށް ކުރިމަތިވެފައިވާ ތަކެތީގެ އަގުބޮޑުވުމުގެ މައްސަލައަށް ލުޔެއް ދިނުމުގެ ގޮތުން، ކާބޯތަކެތިން ނަގާ ކޮންސަމްޕްޝަން ޓެކްސް އުނިކުރުމުގެ ޚިޔާލު ސަރުކާރާއި އިދިކޮޅު ފަރާތްތަކުން ވެސް ވަނީ ހުށަހަޅާފައެވެ. ކުރީގެ ބޮޑުވަޒީރު ޝިގެރޫ އިޝިބާގެ ސަރުކާރު ވެއްޓުމުގެ މައިގަނޑު އެއް ސަބަބަކީ ވެސް ތަކެތީގެ އަގު އުފުލުމުގެ ސަބަބުން އާންމުންގެ މެދުގައި އުފެދުނު ހިތްހަމަނުޖެހުންތަކެވެ.

ނިމިދިޔަ ޑިސެމްބަރު މަހު ޖަޕާނުގެ އިންފްލޭޝަން ރޭޓް ވަނީ 2.4% އަށް ދަށްވެފަ އެވެ. މިއީ ސަރުކާރުން ކަރަންޓާއި ގޭހަށް ދޭ ސަބްސިޑީގެ ސަބަބުން އައި ބަދަލެކެވެ. ނަމަވެސް، މިއީ އަދިވެސް މަރުކަޒީ ބޭންކުން އަމާޒުކުރާ 2% އަށް ވުރެ މަތީ އަދަދެކެވެ. ޚާއްޞަކޮށް ހަނޑުލުގެ އަގު ވަނީ ފާއިތުވި އަހަރާ އަޅާބަލާއިރު ވަރަށް ބޮޑަށް އުފުލިފަ އެވެ.

ޓަކައިޗީ ނިސްބަތްވާ އެލް.ޑީ.ޕީ އަކީ އެތައް އަހަރެއް ވަންދެން ޖަޕާނުގައި ވެރިކަން ކުރަމުން އަންނަ ޕާޓީއެވެ. އިދިކޮޅު މައި ޕާޓީ ކަމަށްވާ ކޮންސްޓިޓިއުޝަނަލް ޑިމޮކްރެޓިކް ޕާޓީ (ސީ.ޑީ.ޕީ) އިން ވަނީ ކޯމެއިޓޯ ޕާޓީއާ ގުޅިގެން "ސެންޓްރިސްޓް ރިފޯމް އެލަޔަންސް" ގެ ނަމުގައި އާ ކޯލިޝަނެއް އުފައްދާފަ އެވެ. މިއީ ޓަކައިޗީ އަށް އޮތް ތަރުހީބު ކުޑަކޮށް، ވޯޓު ހޯދުމަށް ކުރާ މަސައްކަތެކެވެ. ދިރާސާވެރިން ލަފާކުރާ ގޮތުގައި މިއީ ވަރަށް ވާދަވެރި އިންތިޚާބަކަށް ވާނެ އެވެ. ނަމަވެސް އިދިކޮޅު ފަރާތްތަކަށް ކާމިޔާބުވުމުގެ ފުރުޞަތު އަދިވެސް ކުޑަކަމަށް ބެލެވެ އެވެ.