ކުޑައިރުގެ ހުވަފެންތަކުގައި ކުލަޖައްސަން، ޔުނިވަރސިޓީ ޕްރޮފެސަރު ދަނޑުވެރިކަމަށް!

ހިތް އެދޭ ކަމެއް ކުރަން ފަށާކަށް ވަކި ޢުމުރެއް، ވަކި ވަގުތެއް، ވަކި ޙާލަތެއް ނޫނީ ތަނެއް ނޯވެއެވެ. ޢިރާޤުގެ ވެރިރަށް ބަޣްދާދުގައި ހިންގާ ޔުނިވަރސިޓީ އޮފް ޓެކްނޮލޮޖީގެ ޕްރޮފެސަރެއް ކަމަށްވާ އައްމާރު އަލް-ހަޔާނީއަކީ މި ދެންނެވި ފަދަ އެއް މިސާލެވެ. ޕްރޮފެސަރ އައްމާރަކީ ޢިލްމީ، ޤާބިލު، ތަޖުރިބާކާރެކެވެ. ސާފު ހަކަތައަށް މަސައްކަތް ކުރާ ކުންފުންޏެއްގެ ވެރިޔާއެވެ. މިއަދު އޭނާ މަސައްކަތް ކުރަމުން އެ ދަނީ، ފެނަށް ޖެހިފައި އޮތް ޢިރާޤުގައި، ވީހާވެސް މަދު ފެންފޮދެއް ބޭނުން ކޮށްގެން ދަނޑުގޮވާމުގެ ސިނާޢަތް ކުރިއެރުވޭނެ ދިރާސާތަކާއި ތަޖުރިބާތައް ކުރިއަށް ގެންދިއުމަށެވެ.

އެކި ކަހަލަ ގަސްގަހާގެހި އިންސާ، ދަނޑުވެރިކަން ކުރާނެ ބިންކޮޅެއް، ބަޣްދާދުން ގަތުމަކީ ޕްރޮފެސަރ އައްމާރުގެ ޅަ ދުވަހުގެ ހުވަފެންތަކުގައި ޙަޤީޤީ ކުލަ ޖެހުން ފަދަ ކަމަކަށް ވިއެވެ. ނަމަވެސް ޢިރާޤަށް މިއަދު ކުރިމަތިވެފައި އޮތް ފެނުގެ ދަތިކަމު އަސަރު، ފިސާރި އަވަހަށް އެ ދަނޑަށް ފޯރައިފިއެވެ. އެ ދަނޑުގައި ހުރި ގަސްތައް ހައްދާ، ބެލެހެއްޓުމުގައި ޕްރޮފެސަރ އައްމާރަށް ކުރިކުރިމަތިލާން ޖެހުނު ތަކުލީފުތައް އިތުރުވަމުން ދިޔައެވެ. އެހެން ގޮސް، މުޅި ދަނޑުގެ ދިރުން ގެއްލި، ހުރިހާ ގަހެއް މަރުވެ ހިނގައްޖެއެވެ.

ކަން އެހެން އޮތް ނަމަވެސް، ދަނޑުވެރިކަމައިގެން ކުރިއަށް ދިއުމަށް އޭނާގެ ހިތުގައި އުފެދިފައި އޮތް ޝަޢުޤުވެރިކަމަށް ކުޑަ ނަމަވެސް ބަދަލެއް ނާދެއެވެ. ހައިޑްރޮޕޯނިކްސްއާއި އަކުއަޕޯނިކްސްއާ ބެހޭ އިތުރު މައުލޫމާތު އުނގެނި، ޢިރާޤުގެ ދަނޑުވެރިކަމުގެ ސިނާޢަތަށް ކުރިމަތިލާންޖެހިފައިވާ ގޮންޖެހުންތަކަށް ރިޢާޔަތްކޮށް، އެހެން ރާސްތާތަކުން ދަނޑުވެރިކަމުގެ ސިނާޢަތް ކުރިއެރުވިދާނެ ގޮތްތައް ހޯދަން ފެށިއެވެ.

ޕްރޮފެސަރ އައްމާރު ވަނީ އޭނާގެ އުންމީދީ ދަތުރުގައި ކާމިޔާބުތަކެއްވެސް ހޯދާފައެވެ. ޕްރޮފެސަރ އައްމާރު ބުނާ ގޮތުގައި، އޭނާގެ ދަނޑުގައި ބޭނުން ކުރަނީ، އާންމު ދަނޑެއްގައި ފެން ބޭނުން ކުރާ މިންވަރުގެ އެންމެ 10 ޕަސެންޓްއެވެ. އެއީ ދަނޑުގޮވާން ކުރުމަށް އޭނާ ބޭނުންކުރާ ވެލިގަނޑުގެ ސަބަބުން ކަމަށްވެސް ޕްރޮފެސަރ އައްމާރު ތަފްސީލުކޮށްދިނެވެ.

ޕްރޮފެސަރ އައްމާރުގެ ދަނޑުން، 2 ބާވަތެއްގެ ދަނޑުވެރިކަން ފެނެއެވެ. އެއީ ވެލިގަނޑުގައި އިންދައިގެން ކުރާ ދަނޑުވެރިކަމާއި، ހޮޅިހޮޅީގައި ޖަހައިގެން ކުރާ ދަނޑުވެރިކަމެވެ. ނަތީޖާ ވަރަށްވެސް ފޮންޏެވެ. އެކި ޒާތްޒާތުގެ ފަތްކާނާގެ ބާވަތްތަކާއި، ތަރުކާރީގެ ބާވަތްތައް އެ ދަނޑުން ފަސޭހަކަމާއެކީ ލިބެން ހުރެއެވެ.

ޕްރޮފެސަރ އައްމާރު ޤަބޫލު ކުރާ ގޮތުގައި އޭނާ އާއި އެ ސިނާޢަތުގައި މަސައްކަތްކުރާ އެހެން މީހުންނަށް ކުރިމަތިވި ގޮންޖެހުންތަކާ އެކު ވެސް މިފަދަ ދަނޑުވެރިކަމުގެ އުސޫލުތަކުގެ ސަބަބުން އުފެއްދުންތެރިކަން އިތުރުކޮށް، ކާބޯތަކެތީގެ ރައްކާތެރިކަން ހޯދުމުގެ އިތުރުން ވަޒީފާގެ ފުރުސަތުތައްވެސް އުފެދިގެންދާނެއެވެ.