އިރާގޭ ބުނުމުން ބޮލުގައި ކުރެހޭ ތަސްވީރު ބަދަލުކޮށްލި ބަސްރާ!

ކުވައިތަށް ނިސްބަތްވާ އަބްދުއްލަތީފް އައްސުރައިޚަކީ ގިނައިން ދަތުރުފަތުރުކޮށް އުޅޭ މީހެކެވެ. ނަމަވެސް، އޭނާއާ އެންމެ ގާތުން އޮތް އަވައްޓެރި އެއް މަންޒިލް ކަމުގައިވާ އިރާގަށް ދުވަހަކުވެސް ދަތުރު ކޮށްފައެއް ނުވެއެވެ. ސިޔާސީ ހަމަނުޖެހުންތަކުގެ ބިރާ ހެދިއެވެ.

އިރާގުގެ ސަގާފަތް، އޭގެ އެންމެ ފުރިހަމައަށް ސިފަވެގެން ދާ ގޮތަށް އާބާތުރަ ފިލުވާފައިވާ އަލްހައްސޫން މިއުޒިއަމް ކެފޭގައި އިނދެ ރޮއިޓަރޒްއާ ވާހަކަދައްކަމުން ސުރައިޚް ބުނީ، އިރާގަށް ދަތުރު ކުރުމުގައި، އަބަދުވެސް ހުރަހެއް އޮތް ކަމުގެ އިހްސާސް ކުރެވޭ ކަމަށެވެ.

ކަން އެހެން އޮތް ކަމުގައި ވީނަމަވެސް، ސުރައިޚް މިއަދު ހިމެނެނީ އިރާގުގައި މިއަދު ތިބި އެތައް ހާސް މެހެމާނުންތަކެއްގެ ތެރޭގައެވެ. މި ދުވަސްވަރަކީ، ގާތްގަނޑަކަށް 40 އަހަރު ދުވަހުގެ މެދުކެނޑުމަކަށް ފަހު، އިރާގާއި އަރަބި ގަލްފް ކަޕްގެ މެޗުތައް ކުޅެމުން ދާ ދުވަސްވަރުކަމުން، އެތައް ބަޔަކު ދަނީ، މެޗުތައް ހޮސްޓް ކުރާ ބަސްރާއަށް ޒިޔާރަތް ކުރަމުންނެވެ.

25 ވަނަ އަރަބި ގަލްފް ކަޕާއެކު ބަސްރާގެ ފަތުރުވެރިކަމުގެ ސިނާއަތަށް އީދު އައިސްފައިވާފަދައެވެ. ސުރައިޚް މަޑުކޮށްލައިގެން އިން ކެފޭގެ އޯނަރުގެ ފިރިހެން ދަރިފުޅު، މުހައްމަދު ހައްސޫންގެ ވާހަކަތައް އެކަމަށް ހެކިދެއެވެ. ގަލްފް ކަޕާއެކު ވިޔަފާރިތަކަށް ލިބެމުންދާ ފައިދާއާއެކު، ވިޔަފާރިވެރިންގެ ހިތްތަކަށް ވަނީ އުޖާލަކަން ގެނުވާފައެވެ.

ބަސްރާއަށް މިހާރު ޒިޔާރަތް ކުރަމުންދާ މީހުންނަކީ ހަމައެކަނި ފުޓުބޯޅައިގެ ފޯރިއަށް، އެ ގައުމަށް ޒިޔާރަތްކޮށްގެން އުޅޭ މީހުންނެއް ނޫނެވެ. އިރާގުގެ މުއްސަނދި ސަގާފަތާއި ކާބޯތަކެތި ތަޖުރިބާ ކުރުމަކީވެސް މިއަދު ބަސްރާގައި ވަރަށް އާންމު މަންޒަރެކެވެ. ބަސްރާއަކީ ކަދުރު ބޭނުން ކޮށްގެން ތަފާތު އެކި ބާވަތްތަކުގެ ފޮނިކާތަކެތި ތައްޔާރުކުރުމަށް މަޝްހޫރު ސިޓީއެކެވެ.

ޔަމަނަށް ނިސްބަތްވާ އައްބާސް އަލްފަޒްލީ ބުނިގޮތުގައި، ފުރަތަމަ ފަހަރަށް އޭނާ އިރާގަށް ކުރި ދަތުރު އޭނާ އާޝޯޚް ކުރުވައިފިއެވެ. ބަސްރާ ކަދުރުގެ ހިތްގައިމު ރަހަ، އޭނާގެ އަރުތެރެއިން ފިލައި ނުދާނެ ކަމަށާއި، މުބާރާތުގެ ތެރެއިން އޭނާއަށް ލިބުނު ހޫނު މަރުހަބާއަކީ ދުވަހަކުވެސް ހިތުން ފިލައިގެންދާނެ ކަންތައްތަކެއް ނޫން ކަމަށް ފަޒްލީ ބުނެއެވެ.

ޖެނުއަރީ 19 ވަނަ ދުވަހުގެ ނިޔަލަށް އިރާގުގައި ކުރިއަށް ގެންދާ 25 ވަނަ އެރޭބިއަން ގަލްފްކަޕްއާ ދިމާކޮށް، 34000އެއްހާ މީހުން، ސަފްވާން ބޯޑަރ ކްރޮސިންގއާ ބަސްރާ އިންޓަރނޭޝަނަލް އެއަރޕޯޓްގެ މަގުން ބަސްރާއަށް އެތެރެވެފައި ވާކަމަށް، އިރާގުގެ ބޯޑަރ ޕޯރޓްސް އޮތޯރިޓީން ޖެނުއަރީ 7 ވަނަ ދުވަހު ވަނީ ހާމަ ކޮށްފައެވެ.