މީޑިއާ ކޮމިޝަނުން ސޯޝަލް މީޑިއާ ވެސް ކޮންޓްރޯލް ކުރަން މަސައްކަތް ކުރުމުން ފާޑުކިޔުން ބޮޑުވެ، ކޮމިޝަންގެ އިއުލާނުު ގެއްލިއްޖެ
މީޑިއާ ކޮމިޝަނުން އަދަދު ނޫހުގެ ސޯޝަލް މީޑިއާގައި ޝާއިއުކުރި ސިޔާސީ ކާޓޫން ދައުރު ނުކުރުމަށް އާންމުންނަށް އަންގައި ފާޑުކިޔުން ބޮޑުވުމުން އެ އިއުލާން ޑިލީޓުކޮށް އިއުލާނު ބަދަލު ކޮށްފައިވޭ.
މީޑިއާ ކޮމިޝަން ގެ ބައްދަލުވުމެއްގެ ތެރެއިން | ސޯޝަލްމީޑިއާ
މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން ސޯޝަލް މީޑިއާ ވެސް ކޮންޓްރޯލް ކުރަން މަސައްކަތް ކުރުމުން ފާޑުކިޔުން ބޮޑުވެ، ކޮމިޝަނުން ނެރުނު އިއުލާން ކުއްލިއަކަށް ގެއްލިއްޖެ އެވެ.
މީޑިއާ ކޮމިޝަނުން ނެރުނު އިއުލާނުގައި، އަދަދު ނޫހު ގެ ފޭސްބުކް ޕޭޖާއި އެކްސް އެކައުންޓުގައި އާއްމުކޮށްފައި ވާ "ސިޔާސީ ކާޓޫން" ގެ ވޮލިއުމް 22 އެއްވެސް މީހަކު ދައުރު ނުކުރުމަށް ވަނީ އަންގާފަ އެވެ. އެކަން ހާމަ ކުރުމަށް އެ ކޮމިޝަންގެ ރަސްމީ ޓްވިޓަރ އެކައުންޓުގައި އެ އިއުލާން އާއްމު ވެސް ކުރި އެވެ.
ނިމިދިޔަ ހަފްތާގެ ބުރާސްފަތި ދުވަހު އާއްމު ކުރި އެ ކާޓޫނަކީ އެ ކޮމިޝަނުން ބަލަމުންދާ މައްސަލައަކާ ގުޅިގެން ނަގަން އަންގާފައިވާ ކާޓޫނެއް ކަމަށް އެ ކޮމިޝަނުން ބުނެފައި ވެ އެވެ. އެހެންކަމުން އެއްވެސް ފަރާތަކުން އެ ކާޓޫނު ދައުރު ނުކުރުމަށް އަންގާފައިވެ އެވެ.
ނަމަވެސް އެ އިއުލާން ފަހުން އެ ކޮމިޝަނުން ވަނީ ޑިލީޓު ކޮށްފަ އެވެ. އަދި އާ އިއުލާނެއް މީސްމީޑި އާ އަށް ވަނީ އަޕލޯޑްކޮށްފަ އެވެ. ކުރިން ކުރި އިއުލާނުގައި "އެއްވެސް ފަރާތަކުން ދައުރު ނުކުރުމަށް" އަންގާފައިވާ އެންގުން ބަދަލުކޮށް އެބައި "އެއްވެސް މީޑިއާ އަކުން ދައުރު ނުކުރުމަށް" މިފަދައިން ވަނީ ބަދަލުކޮށްފަ އެވެ.
ފުރަތަމަ ކުރި އިއުލާނަކީ ކޮމިޝަނަށް ލިބިފައި ނެތް ބާރެއް ބޭނުންކޮށްގެން ހިންގި ޣައިރު ޤާނޫނީ އެންގުމަކަށް ވާތީ އެކަން އާއްމުންނާއި ސިޔާސީ ފަރާތްތަކުން ވެސް ވަނީ ކުށްވެރިކޮށްފަ އެވެ. އެގޮތުން ކުރީގެ އިކޮނޮމިކް މިނިސްޓަރ އަދި އެމްޑީޕީގެ ކުރީގެ ޗެއަރޕަރސަން ފައްޔާޒް އިސްމާއިލް ވެސް ވަނީ އެކަމަށް ވަރަށް ބޮޑަށް ފާޑު ވިދާޅުވެފަ އެވެ.
މީގެ އިތުރުން މީޑިއާ ކޮންޓްރޯލް ގާނޫނާ މެދު މޯލްޑިވްސް ޖަރނަލިސްޓް އެސޯސިއޭޝަނުން ވެސް ވަނީ ކަންބޮޑުވުން ފާޅުކޮށްފަ އެވެ. އެ ޖަމިއްޔާ އިން އެންމެ ކަންބޮޑުވީ އެއް ކަމަކީ އަދި އެ ގާނޫނާ ދެކޮޅުވީ އެންމެ ބޮޑު ސަބަބަކީ ސޯޝަލް މީޑިއާގައި އާންމުން ހިޔާލުފާޅުކުރުން ހަނިކޮށް އަދަބު ދެވޭ ގޮތަށް އެ ގާނޫނުން މީޑިއާ ކޮމިޝަނަށް ބާރުތައް ދީފައިވާތީ ކަމަށް އެމްޖޭއޭ އިން ބުނެ އެވެ. އެހެން ނަމަވެސް އެ ގާނޫނު ފާސްކުރި އިރު ސަރުކާރުން އާންމުންނާއި ބޭރުގެ ފަރާތްތަކަށް ދެމުން ދިޔަ ޔަގީންކަމަކީ އެ ގާނޫނުގައި އެފަދަ މާއްދާއެއް ނެތް ކަމަށާއި އެ ގާނޫނު އެފަދަ ގޮތަކަށް ބޭނުން ނުކުރާނެ ކަމެވެ.
އެހެން ނަމަވެސް ސޯޝަލް މީޑިއާ ހިމެނޭ ގޮތުން މިއަދު މީޑިއާ ކޮންޓްރޯލް ކޮމިޝަނުން އެންމެހާ ރައްޔިތުންގެ މައްޗަށް އަދަދުގެ ކާޓޫން ދައުރު ނުކުރާން ނެރުނު އަމުރާ ނެރުމުން ސާބިތުވެފައި ވަނީ އެ ގާނޫނު ބޭނުންކޮށް ސޯޝަލް މީޑިއާ ހުއްޓުވަން ކޮމިޝަނުން މަސައްކަތް ކުރަން ފަށާފައިވާ ކަން ކަމަށް ވެސް އެ ޖަމިއްޔާ އިން ވަނީ ބުނެފަ އެވެ. އަދި އެ ގާނޫނު ސަރުކާރުން ފާސްކުރުމުގެ މައިގަނޑު ބޭނުމަކީ ހިޔާލުފާޅުކުރުމާއި ނޫސްވެރިކަމުގެ ހައްގު ނިގުޅައިގަތުން ކަމަށް އެމްޖޭއޭ އިން ބުނެފައިވެ އެވެ. މީޑިއާ ކައުންސިލުން ކުރިން ނެރުނު އިއުލާން ޑިލީޓްކޮށް އާ އިއުލާނެއް ނެރުނީ މި ފާޑުކިޔުންތަކަށް ފަހުގަ އެވެ.
އަދަދު ނޫހުން ޝާއިރު ކުރި ކާޓޫނުގެ މައްސަލަ ބަލަމުންދާކަން މީޑިއާ ކޮންޓްރޯލް ކޮމިޝަނުން އެ ނޫހަށް އަންގާފައި ވަނީ ބުރާސްފަތި ދުވަހު ރަސްމީ ގަޑި ނިމި އިރުއޮއްސެން ކައިރިވި ފަހުންނެވެ. އެއާ އެކު އިސްލާމް ދީނުގެ އަސްލަކާ ހިލާފު ކޮންޓެންޓެއް ކަމަށް ނިންމި ގާނޫނީ ސަބަބުތައް ސާފުކޮށްދޭން އަދަދު ނޫހުން އެ ކޮމިޝަނަށް ފޮނުވި ސިޓީ އެއްގައި އެދިފައި ވެ އެވެ.
