ޖެނީވާގައި ހުންނަ އދ.ގެ އޮފީހުގައި ބުދަ ދުވަހުގެރޭ ބޭއްވި ޔުނިވަރސަލް ޕީރިއޮޑިކް ރިވިއު (ޔޫ.ޕީ.އާރު.) ގެ ހަތަރުވަނަ ސައިކަލްގައި ދިވެހިރާއްޖޭގެ އިންސާނީ ހައްގުތައް ރިވިއުކުރުމުގެ ޖަލްސާގައި އދ.ގެ ގިނަ ގައުމުތަކަކުން، ރާއްޖޭގައި މިނިވަން މީޑިއާ އަށް ފުރުސަތު ދިނުމަށް ގޮވާލައިފިއެވެ.

ރެކޮމެންޑޭޝަން ހުށަހަޅަން ލިބުނު ފުރުސަތުގައި ޔޫކޭ، އޮސްޓްރޭލިއާ، ޖާމަނީ، ފްރާންސް، އެސްޓޯނިއާ، އިންޑޮނޭޝިއާ، ކެނެޑާ އަދި ސްޕެއިން ހިމެނޭހެން ގިނަ ގައުމުތަކަކުން ވަނީ ރާއްޖޭގައި ދާދި ފަހުން އަމަލު ކުރަން ފެށި މީޑިއާ ރެގިއުލޭޓް ކުރުމުގެ ގާނޫނާމެދު ކަންބޮޑުވުން ފާޅުކޮށްފައެވެ. މި ގާނޫނާ ގުޅިގެން ބައެއް ގައުމުތަކުން ވަނީ މި ގާނޫނު ރިވިއު ކުރުމަށް ދިވެހި ސަރުކާރަށް ގޮވާލާފައެވެ.

އެ ގާނޫނުގައިވާ ރެގިއުލޭޓަރި އޮތޯރިޓީ އަކީ ސަރުކާރުގެ ނުފޫޒުތަކުން އެއްކިބާވެފައިވާ އޮތޯރިޓީ އެއްކަން ކަށަވަރުކޮށް، ނޫސްވެރިންނަށާއި އާއްމު ރައްޔިތުންނަށް މިނިވަންކަމާ އެކު އަމިއްލަ ހިޔާލު ފާޅުކުރުމުގެ ފުރުސަތު ކަށަވަރު ކޮށްދިނުމަށް ވެސް އދ.ގެ ގައުމުތަކުން ރާއްޖެއަށް ގޮވާލިއެވެ. މީގެ އިތުރުން ޚިޔާލު ފާޅުކުރުމުގެ މިނިވަންކަން ކަށަވަރުކުރުމުގެ ޒަރިއްޔާއިން ގާނޫނީ ނިޒާމުގެ މިނިވަންކަމާއި، ޑިމޮކްރަޓިކް މުއައްސަސާތަކުގެ މިނިވަންކަން ދެމެހެއްޓުމަށްވެސް ގައުމުތަކުން ދިވެހި ސަރުކާރަށް ގޮވާލާފައިވެއެވެ.

އިނގިރޭސިވިލާތުގެ މަންދޫބު ވިދާޅުވީ ރައީސް މުއިއްޒު އިންސާނީ ހައްގުތަކަށް އިހްތިރާމް ކުރައްވާނެ ކަމަށް ވީ ވައުދާ އެއްގޮތަށް، ދިވެހިރާއްޖޭގެ ގާނޫނުއަސާސީގައި ބަޔާންކޮށްފައިވާ މީޑިއާގެ މިނިވަންކަމާއި، އެއްވުމުގެ މިނިވަންކަން ކަށަވަރުކޮށްދިނުމަށް ސަރުކާރަށް ގޮވާލާކަމަށެވެ. އަދި ކޮމަންވެލްތު އުސޫލުތަކުގައި ބަޔާންކޮށްފައިވާ ޚިޔާލު ފާޅުކުރުމުގެ މިނިވަންކަމާއި، މީޑިއާގެ ދައުރާ ގުޅޭ ވައުދުތައް ރާއްޖޭގައި ތަންފީޒު ކުރުމަށްވެސް އިނގިރޭސިވިލާތުން ރާއްޖެއަށް ގޮވާލިއެވެ.

ޔޫ.ޕީ.އާރު. އަކީ، އދ.ގެ މެންބަރު ޤައުމުތަކުގައި އިންސާނީ ޙައްޤުތައް ރައްކާތެރި ކުރެވެމުންދާ މިންވަރާއި، އެ ޤައުމުތަކުގެ އިންސާނީ ހައްޤުތަކުގެ ޙާލަތާއި، އިންސާނީ ޙައްޤުތަކާގުޅޭ ބައިނަލްއަޤްވާމީ މުޢާހަދާތައް ތަންފީޛުކުރެވެމުންދާ މިންވަރު ދެނެގަނެ، ވަޒަންކުރުމަށްޓަކައި ކޮންމެ ހަތަރު އަހަރަކުން އެއް އަހަރު ކުރިއަށްގެންދެވޭ ރިވިއު ޕްރޮސެސްއެކެވެ.

ޔޫ.ޕީ.އާރު. ގެ ކޮންމެ ސައިކަލްއެއްގައި، އޭގެ ކުރީ ސައިކަލްގައި އެ ޤައުމަކަށް އެހެން ޤައުމުތަކުން ހުށަހަޅާފައިވާ ކަންކަން ތަންފީޒުކުރަމުންދާ މިންވަރާއި، އެ ހުށަހެޅުންތައް ތަންފީޒުކުރުމަށްޓަކައި އެ ޤައުމަކުން ކުރަމުންދާ މަސައްކަތްތަކާއި ދިމާވަމުންދާ ގޮންޖެހުންތައް ބަޔާންކޮށް، ނޭޝަނަލް ރިޕޯޓެއް ހުށަހަޅަންޖެހެއެވެ. އެގޮތުން، ޔޫ.ޕީ.އާރު. ގެ ހަތަރުވަނަ ސައިކަލްއަށް ދިވެހިރާއްޖެއިން ހުށަހަޅަންޖެހޭ ނޭޝަނަލް ރިޕޯޓު ވަނީ މިދިޔަ އޮގަސްޓު މަހުގެ 4 ވަނަ ދުވަހު ހުށަހަޅާފައެވެ.

ބުދަ ދުވަހު ކުރިއަށްގެންދިޔަ ރިވިއު ސެޝަންގައި، ދިވެހިރާއްޖެ އިން ހުށަހަޅާފައިވާ ނޭޝަނަލް ރިޕޯޓުގައި ހިމަނާފައިވާ މަޢުލޫމާތާއި، މަދަނީ ޖަމާޢަތްތަކާއި، ހިއުމަން ރައިޓްސް ކޮމިޝަން އޮފް މޯލްޑިވްސްއިން ހުށަހަޅާފައިވާ ސްޓޭކްހޯލްޑަރ ރިޕޯޓުތަކާއި، އދ.ގެ އެކި ފަރާތްތަކުން ދިވެހިރާއްޖެއާ ގުޅޭގޮތުން ހުށަހަޅާފައިވާ މަޢުލޫމާތުގެ މައްޗަށް ބިނާކޮށް، ޔޫ.ޕީ.އާރު. ގެ ކުރިއަށްއޮތް ސައިކަލްގައި ދިވެހިރާއްޖެ އިން ތަންފީޒު ކުރުމަށް ހުށަހަޅާ ރެކޮމެންޑޭޝަންތައް އެކި ޤައުމުތަކުން ވަނީ ހުށަހަޅާފައެވެ.

އެންމެ ގިނަ ގައުމުތަކުން ރާއްޖެއަށް ރިކޮމެންޑޭޝަން ހުށަހެޅީ ދާދިފަހުން ރާއްޖޭގައި އަމަލުކުރަން ފެށި މީޑިއާ ރެގިއުލޭޓް ކުރުމުގެ ބިލާ ބެހޭގޮތުންނެވެ. ޔޫޕީއާރު ރާއްޖޭގެ ސެޝަންގައި 100 އަށްވުރެ ގިނަ ގައުމުތަކުން ރިކޮމެންޑޭޝަން ހުށަހަޅާފައިވާކަން ފާހަގަކުރެވެއެވެ.

ޔޫޕީއާރު ގައި ގައުމުތަކުން ރާއްޖެ އަށް ހުށަހެޅި ހުރިހާ ރެކޮމެންޑޭޝަންތަކެއް ނޮވެމްބަރު މަހުގެ 10 ވަނަ ދުވަހު އދ.ގެ ފަރާތުން އާއްމު ކުރާނެއެވެ. އަދި ނޮވެމްބަރު 14 ވަނަ ދުވަހު ބާއްވާ ސެޝަންގައި ރާއްޖެ އިން މި ރެކޮމެންޑޭޝަންތައް ބަލައިގަތުމާމެދު ގޮތެއް ނިންމާނެއެވެ.

އެންމެ ފަހުން 2020 ވަނަ އަހަރުގެ ޔޫޕީއާރު ގައި 95 ގައުމަކުން ވަނީ ދިވެހިރާއްޖެއަށް 259 ރެކޮމެންޑޭޝަން ހުށަހަޅާފައެވެ. މީގެ ތެރެއިން 187 ރެކޮމެންޑޭޝަން އެއް ރާއްޖެ ވަނީ އެފަހަރު ބަލައިގަނެފައެވެ.