މީޑިއާ ރެގިއުލޭޓް ކުރުމަށް ތަސްދީގު ކުރި ގާނޫނު އުވާލުމަށް އދ އިން ދިވެހި ސަރުކާރަށް ގޮވާލައފި

އައު މީޑިއާ ގާނޫނަކީ، ދިވެހިރާއްޖޭގެ ރައްޔިތުންގެ ހިޔާލުފާޅުކުރުމުގެ މިނިވަންކަމާއި މީޑިއާގެ މިނިވަންކަމަށް ވަރަށް ބޮޑަށް ހުރަސް އެޅޭ ގާނޫނެއް ކަމަަށާއި އެ ގާނޫނު އުވާލުމަށް އދ ގެ އިންސާނީ ހައްގުތަކާ ބެހޭ އޮފީހުން ދިވެހި ސަރުކާރަށް ގޮވާލައިފިއެވެ.

ސެޕްޓެމްބަރު 18 ގައި ރައީސް ތަސްދީގު ކުރެއްވި ދިވެހިރާއްޖޭގެ މީޑިއާ އަދި ބްރޯޑްކާސްޓިންގް ރެގިއުލޭޓް ކުރުމުގެ އައު ގާނޫނުން ތައާރަފު ކޮށްފައިވާ އުސޫލުތަކަކީ، ރާއްޖެ އިން ބައިވެރިވެފައިވާ ބައިނަލްއަގްވާމީ މަދަނީ އަދި ސިޔާސީ ހައްގުތަކާބެހޭ މުއާހަދާތަކާ ޚިލާފު އުސޫލުތަކެއް ހިމެނޭ ގާނޫނެއް ކަމަށް އދ. ގެ އިންސާނީ ހައްގުތަކާ ބެހޭ އޮފީހުން ރެނުނު ބަޔާނުގައި ވެއެވެ.

Advertisement

ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ މީގެތެރޭގައި މީޑިއާގެ އިތުރުން ނޫސްވެރިންނާއި މީޑިއާގެ މަސައްކަތްތެރިން އުފައްދާ ކޮންޓެންޓަށް ހުރަސް އެޅުންތައް ހިމެނޭ ކަމުގައެވެ. އަދި މި ގާނޫނުން މީޑިއާ އަދި ބްރޯޑްކާސްޓިންގް ކޮމިޝަނަށް ތަހުގީގު ހިންގުމާއި، މީޑިއާގައި މަަސައްކަތް ކުރާ ފަރާތްތައް ޖޫރިމަނާ ކުރުމާއި، މީޑިއާގެ ލައިސަންސްތަކާއި ހުއްދަތައް ބާތިލްކޮށް ހިފެހެއްޓުމުގެ ބާރުތައް ވަރަށް ބޮޑަށް ދޭ ކަމަށް ފާހަގަ ކޮށްފައިވެއެވެ.

މި އާ ގާނޫނު ވުޖޫދަށް އައިސްފައި ވަނީ ހުސްވި އަހަރުގެ ތެރޭގައި މުއައްސަސާތަކުގެ ބާރުތައް ހަނިކުރެވި ޗެކް އެންޑް ބެލެންސް ގެ އުސޫލުތައް ވަރަށް ބޮޑަށް ހީނަރުވެފައިވާ ދަނޑިވަޅެއްގައިކަން ބަޔާނުގައި ފާހަގަ ކޮށްފައިވެއެވެ.

"މިނިވަން، ގިނަ އަދި ތަފާތު މީޑިއާ ތަކަކީ ހިޔާލުފާޅުކުރުމުގެ މިނިވަންކަމުގެ ހައްގުގެ މައިގަނޑު ބަޔެކެވެ. އަދި އެއީ ޑިމޮކްރެޓިކް މުޖުތަމައެއްގެ މައިގަނޑު އެއް ތަނބުވެސްމެއެވެ،" ބަޔާނުގައި ވެއެވެ.

އދ.ގެ އިންސާނީ ހައްގުތަކާބެހޭ ހައިކޮމިޝަނަރު ވޮލްކަރ ޓޫކް، މި ގާނޫނު އުވާލުމަށް ސަރުކާރަށް ގޮވާލައްވާފައިވާ ކަމަށް ބަޔާނުގައި ބުނެފައިވެއެވެ. އަދި، މީޑިއާ ރެގިއުލޭޓް ކުރުން ހަރުދަނާ ކުރުމުގައި ބައިނަލްއަގްވާމީ އިންސާނީ ހައްގުތަކާބެހޭ ވައުދުތަކާ އެއްގޮތްވާނެކަން ކަށަވަރުކުރުމަށް، ރާއްޖެއަށް އދ.ގެ އެ އޮފީހުގެ އެހީތެރިކަން ފޯރުކޮށްދޭން ތައްޔާރަށް ތިބި ކަމަށް ވެސް ބަޔާނުގައި ވެއެވެ.