މިނިވަން ހިޔާލު ފާޅުކުރުމާއި ނޫސްވެރިކަމާއި މީޑިޔާގެ މިނިވަންކަމަށް ހުރަސް އެޅުމާއި ރިސޯޓް ވޯކާރސް ވެސް ދެކޮޅު
އދ އާއި ބައިނަލްއަގުވާމީ ޖަމިއްޔާތަކުން މި ގާނޫނު އުވާލުމަށް ގޮވާލައްވައިފި
ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް)
ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) އިން މިނިވަން ހިޔާލު ފާޅުކުރުމާއި ނޫސްވެރިކަމާއި މީޑިޔާގެ މިނިވަންކަމަށް ހުރަސް އެޅުމާއި ދެކޮޅުކަން ހާމަކޮށްފި އެވެ.
ޓީމް އިން އެކްސްގައި ކުރި ޕޯސްޓެއްގައި ބުނެފައިވަނީ، މިނިވަން މީޑިއާތައް ނެތިކޮށްލާ ބިލު ތަސްދީގުކޮށް އެ ގާނޫނަށް އަމަލުކުރަން އަވަސްވެގަނެފައިވާތީ އެކަމާ އެ އެސޯސިއޭޝަނުން ކަންބޮޑުވާ ކަމަށެވެ. އަދި ބައިނަލްއަގުވާމީ އެކި ޖަމިއްޔާތަކުން އެ ގާނޫނު އުވާލުމަށް ގޮވާލަމުންދާ މި ދަނޑިވަޅުގައި ޓީމްގެ މެންބަރުން ތިބީ ނޫސްވެރިކަމުގެ މިނިވަންކަމަށް ވަކާލާތު ކުރުމުގެ ގޮތުން ނޫސްވެރިންނާއެކުގައި ކަމަށް އެ އެސޯސިއޭޝަނުން ފާހަގަކޮށްފައިވެއެވެ.
އެ އެސޯސިއޭޝަނުން ވަނީ އެކްސްގައި އެ އެސޯސިއޭޝަނުގެ މެންބަރުން ޝުއޫރުތައް ލިޔެފައިވާ ބޯޑުތަކާއި ބެނާއެއް ހިފައިގެން ތިބި ފޮޓޯއެއް ވެސް އާންމުކޮށްފައެވެ. މެންބަރުން ހިފައިގެން ތިބި ބެނާގައި ލިޔެފައިވަނީ "މިނިވަން ހިޔާލު ފާޅުކުރުމާއި ނޫސްވެރިކަމާއި މީޑިއާގެ މިނިވަންކަމަށް ހުރަސްއެޅުމާއި ރިސޯޓު ވޯކާސް ދެކޮޅު" މިފަދައިންނެވެ.
ރައީސް މުހައްމަދު މުއިއްޒުގެ ސަރުކާރުން ތަންފީޒު ކުރަން ފަށާފައިވާ މި ގާނޫނަކީ ރާއްޖެއިން ސޮއިކޮށްފައިވާ ބައިނަލްއަގުވާމީ މުއާހަދާތަކާ ހިލާފު ގާނޫނެއް ކަމަށް ބުނެ އދ. ގެ ހައި ކޮމިޝަނާ ފޯ ހިއުމަން ރައިޓްސް ވޮލްކާ ޓާކް އިން ވަނީ އެ ގާނޫނު އަނބުރާ ގެންދިޔުމަށް ދިވެހި ސަރުކާރަށް ގޮވާލައްވާފައެވެ.
މީގެ އިތުރުން ޔޫރަޕިއަން ޔޫނިއަން، އެމެރިކާ އަދި އިނގިރޭސިވިލާތުގެ އިތުރުން އިންޓަނޭޝަނަލް ފެޑެރޭޝަން އޮފް ޖާނަލިސްޓްސް، ރިޕޯޓާސް ވިތައުޓް ބޯޑާސް އަދި ކޮމިޓީ ޓު ޕްރޮޓެކްޓް ޖާނަލިސްޓްސް ފަދަ ޖަމިއްޔާތަކުން ވެސް ވަނީ އެ ގާނޫނާ މެދު ކަންބޮޑުވުން ފާޅުކޮށް، އެ ގާނޫނު އަނބުރާ ގެންދިޔުމަށް ގޮވާލައްވާފައެވެ.
ސަރުކާރު ފަހަތުގައި އޮވެގެން އަމިއްލަ މެންބަރެއް ލައްވާ މަޖިލީހަށް ހުށަހަޅައި، ބައިނަލްއަގުވާމީ އިދާރާތަކުގެ ކަންބޮޑުވުންތަކަށް ބެލުމެއްނެތި، ސަރުކާރުގެ ހިންގާ ޕީއެންސީގެ ސުޕަ މެޖޯރިޓީ ބޭނުންކޮށްގެން ދައުރުން ބޭރުގައި ޖަލްސާތަކެއް ބާއްވައި މި ބިލު ވަނީ ފާސްކޮށްފައެވެ. އަދި މީޑިއާތަކުން ލިޔާ ހަބަރާއި ގެނެސްދޭ ޕްރޮގްރާމުތަކުގެ ސަބަބުން މީޑިއާތައް ބަންދުކުރުމާއި ބޮޑެތި އަދަދުތަކުން ޖޫރިމަނާކުރުމުގެ ބާރު ކޮމިޝަނަކަށް ލިބިދޭ މި ގާނޫނު ރައީސް މުއިއްޒު ތަސްދީގުކުރެއްވީ މިމަހުގެ ކުރީކޮޅު އެވެ.
