ޑރ. ސަވާދު: ދީނުގެ ނަމުގައި ފަސާދަ ފަތުރާ މީހުންނާމެދު ރައްޔިތުން ހޭވެރި ކުރުވުމަކީ ދީނަށް ފުރައްސާރަ ކުރުމަށް ވާނެތޯ؟
25 ޖެނުއަރީ 2026 | އާދީއްތަ 03:23އަދަދު ނޫހުން ޝާއިޢުކުރި ކާޓޫނަކާ ގުޅިގެން ސަރުކާރުގެ އިސް މަގާމުތަކުގައި ތިބި ބައެއް މީހުން ދަނީ ދީނީ ކާޑު ނަގައިގެން އެ ކާޓުނަށް ފާޑު ކިޔަމުން.
ކުރީގެ ބަންޑާރަ ނައިބު ޑރ. އަހްމަދު އަލީ ސަވާދު؛ މިޑިއާ ކޮންޓްރޯލް ބިލާ ދެކޮޅަށް ނޫސްވެރިން ކުރިއަށް ގެންދިޔަ ފޯރަމެއްގައި ވާހަކަދައްކަވަނީ | ސަން އޮންލައިން
އިސްލާމް ދީނުގެ ނަމުގައި ފަސާދަ ފަތުރާ މީހުން އުޅޭ ކަމަށާއި އެފަދަ މީހުންނާމެދު ރައްޔިތުން އަހުލުވެރި ކުރުވުމަކީ ދީނަށް ފުރައްސާރަ ކުރުންތޯ ވިދާޅުވެ ކުރީގެ ބަންޑާރަ ނައިބު ޑރ. އަހްމަދު އަލީ ސަވާދު ސުވާލު އުފައްދަވައިފި އެވެ.
އެކްސްގައި ކުރެއްވި ޕޯސްޓެއްގައި ސަވާދު ވިދާޅުވީ ތަވާޟުޢުވެރިންގެ ސިފައިގަ މަގުފޭރޭ މީހުން އުޅޭކަމާއި ޒާހިދުކަން ދައްކައިގެން ފޮށިފަޅާ މީހުން އުޅޭކަމީ ދުނިޔެވީ ޙަޤީޤަތެއް ކަމަށެވެ. އަދި މިފަދަ މީހުންނާ މެދު ސަމާލުވުމަށް ވައްބަހުންނާ މަޖާޒީ ކުރެހުމުން ރައްޔިތުން ހޭވެރިކުރުވުމަކީ ދީނަށް ފުރައްސާރަ ކުރުމަށް ވާނެތޯ ސަވާދު ވަނީ ސުވާލު އުފައްދަވާފަ އެވެ.
މިދިޔަ ބުރާސްފަތި ދުވަހު އަދަދު ނޫހުން ޝާއިޢުކުރި ކާޓޫނަކާ ގުޅިގެން ސަރުކާރުގެ އިސް މަގާމުތަކުގައި ތިއްބެވި ބައެއް މީހުން ދަނީ ސަރުކާރު ތެރޭ ހިންގާ ފަސާދަތައް ފޮރުވުމަށް ދީނީ ކާޑު ނަގައިގެން ފާޑު ކިޔަމުންނެވެ. ރިޝްވަތުގެ ހަރާން ފައިސާ ބަހާ ތަން ފެންނަ މި ކުރެހުމުން ދައްކުވައިދެނީ ސަރުކާރުގެ ވެރިންނާއި މުއައްސަސާތަކުގެ މެދުގައި ފަސާދަ އެއްވެސް ހައްދެއް ނެތް މިންވަރަށް ވަކި ވަގުތަކާއި ޒަމާނަކަށް ބެލުމެއް ނެތި ފެތުރިފައިވާ މިންވަރެވެ.
ހާއްސަކޮށް ރައީސް މުއިއްޒުގެ ސަރުކާރަކީ އިސްލާމީ ފިކުރަށް ތަބާވާ ސަރުކާރެއް ކަމަށް ވަކާލާތުކޮށް ދައުވާކުރަމުންދާ ސަރުކާރަކަށް ވާއިރު މި ސަރުކާރުގެ ހުރިހާ ގުނަވަނެއްގައި ހައްދުފަނައަޅާފައިވާ މިންވަރަށް ފަސާދަ އަށަގެންފައިވާ ކަން އަންގައި ދިނުމަށް މި ކުރެހުމުން އަންގައިދޭ ކަމަށް ގިނަ ބަޔަކު ބުނެ އެވެ.
މީޑިއާތައް ކޮންޓްރޯލް ކުރުމަށް ރައީސް މުއިއްޒު އުފައްދާފައިވާ ކޮމިޝަނުން ވަނީ އެ ކުރެހުމަކީ އިސްލާމްދީނުގެ އަސްލުތަކާ ހިލާފު ކުރެހުމެއް ކަމަށް ބުނެ އެ ކުރެހުން ނަގަން އަންގާފަ އެވެ. ނަމަވެސް އެ ކުރެހުމުގައި މައްސަލައެއް ނޫޅޭ ކަމަށާއި އެ ކާޓޫނާ ދީނާ ގުޅުވައި ވާހަކަ ދައްކަނީ ވަކި ބައެއްގެ ސިޔާސީ ފިކުރު ހިމާޔަތް ކުރަން ކަމަށް ގިނަ ރައްޔިތުން ދަނީ ބުނަމުންނެވެ.
މިކަމާ ގުޅިގެން ދިވެހިރާއްޖޭގެ ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވީ މި ކުރެހުމަކީ އިސްލާމްދީނުގެ އަސްލަކާ ހިލާފު ކާޓޫނެއް ކަމަށް ބުނެވޭނެ ޝަރުއީ އަދި ގާނޫނީ އެއްވެސް އަސާސެއް ނެތް ކަމަށެވެ. އަދި އިސްލާމްދީނުގެ އަސްލަކާ ޚިލާފުވާ ކަމަކީ މިފަދަ ކުރެހުންތަކުގެ އަސްލު މަގްސަދު އޮޅުވާލާ ސަރުކާރުގައި އަށަގެންފައިވާ މުންކަރާތްތައް ފޮރުވުން ކަމަށް އޭނާ ވިދާޅުވި އެވެ.
މި މައްސަލައިގައި ސަރުކާރުގެ ފަރާތުން ދީނީ ކާޑު ނަގައިގެން ވާހަކަދައްކަމުން ދާތީ، ގިނަ ބަޔަކު ދަނީ ސަރުކާރުގައި ހިނގަމުންދާ ފަސާދަތައް ފޮރުވުމަށް ދީން ބޭނުންކުރަމަަކީ ދީނަށް ފުރައްސާރަ ކުރުމަށް ނުވާނެތޯ އޭ ބުނެ ސުވާލު އުފައްދަމުންނެވެ.
