2020 ވަނަ އަހަރުން ފެށިގެން ބ. އަތޮޅު ކައުންސިލަށް ލިބެން ޖެހޭ 2.1 މިލިއަން ރުފިޔާ އަދިވެސް ނުލިިބޭ

2020 ވަނަ އަހަރުން ފެށިގެން ބ. އަތޮޅު ކައުންސިލަށް ލިބެން ޖެހޭ 2.1 މިލިއަން ރުފިޔާ އަދިވެސް ނުލިބޭ ކަމަށް އޮޑިޓް ރިޕޯޓުން ހާމަ ވެއްޖެ އެވެ. 

އޮޑިޓް އޮފީހުން އާންމުކޮށްފައިވާ 2023 އަދި 2024 ގެ ބ. އަތޮޅު ކައުންސިލް ގެ ކޮމްޕްލަޔަންސް އޮޑިޓް ރިޕޯޓުގައި ވަނީ ކައުންސިލްގެ އިދާރާއަށް ލިބެންޖެހޭ ފައިސާގެ ތެރެއިން ގިނަ އަދަދެއްގެ ފައިސާ ލިބިފައިނުވުމާއި ނުލިބި ހުރި ފައިސާ ހޯދުމަށް މާލިއްޔަތުގެ ގަވާއިދުގައި ބަޔާންކޮށްފައިވާ ފިޔަވަޅުތައް އަޅާފައި ނުވާ ކަން ފާހަގަ ކޮށްފަ އެވެ.

ދައުލަތުގެ އޮފީހަކުން ކުރާ މަސައްކަތަކަށް ނުވަތަ ދޭ ޚިދުމަތަކަށް ނުވަތަ ކުއްޔަށް ދީފައިވާ ތަނެއްގެ ކުއްޔަށް ނުވަތަ ވިއްކި އެއްޗެއްގެ އަގަށް ލިބެންޖެހޭ ފައިސާ، އެކަމެއް ނިމުނު ދުވަހުން ފެށިގެން ލަސްވެގެން 1 މަސް ދުވަހުގެ ތެރޭގައި ހޯދަން ވާނެ ކަމަށް ދައުލަތުގެ މާލިއްޔަތުގެ ގަވާއިދުގައި ބަޔާން ކޮށްފައި ވެ އެވެ. އަދި ލިބެން ޖެހޭ ފައިސާ ހޯދުމަށް އަޅަންޖެހޭ ފިޔަވަޅުތައް އެ ގަވާއިދުގައި ތަފްސީލު ކޮށްދީފައި ވެ އެވެ.

ނަމަވެސް ކައުންސިލްގެ އިދާރާ އިން ކުއްޔަށް ދޫކޮށްފައިވާ ތަންތަނާ ލޯންޗް ދަތުރުތަކުން އަދި ތަކެތި ކުއްޔަށް ދީގެން 31 އޮކްޓޫބަރު 2025 ގެ ނިޔަލަށް ލިބެންޖެހޭ 2.1 މިލިއަން ރުފިޔާ (2،159،866) ލިބިފައި ނުވާ ކަމަށް އޮޑިޓް ރިޕޯޓުގައި ފާހަގަ ކޮށްފައި ވެ އެވެ. މީގެތެރޭގައި 2020 ވަނަ އަހަރުން ފެށިގެން ކައުންސިލްގެ އިދާރާ އަށް ނުލިބި ހުރި ފައިސާ ހިމެނޭކަން ފާހަގަ ކޮށްފައި ވެ އެވެ. 

އޮޑިޓް ރިޕޯޓުގައި ބުނީ ބ. އަތޮޅު ކައުންސިލްގެ އިދާރާ އަށް ލިބެންޖެހޭ ފައިސާ ހޯދުމަށް ބައެއް ފަރާތްތަކަށް ފޯނު މެދުވެރިކޮށް ފައިސާ ދެއްކުމަށް އެންގިފައިވާ ކަމަށާ ބައެއް ފަރާތްތަކަށް ސިޓީ ފޮުނުވާފައި ވީ ނަމަވެސް ފައިސާ ނުދައްކާ ހުރިހާ ފަރާތްތަކާ މެދު ދައުލަތުގެ މާލިއްޔަތުގެ ގަވާއިދުގައި ބަޔާން ކޮށްފައިވާ އިތުރު ފިޔަވަޅުތައް އެ ފަޔަވަޅެއް އަޅަންޖެހޭ މަރުހަލާތަކުގައި އަޅާފައި ނުވާ ކަމަށެވެ. 

31 އޮކްޓޫބަރު 2025 ގެ ނިޔަލަށް ނުލިބި ހުރި ފައިސާ ގެ ތެރެއިން ބައެއް ތަފްސީލުތައް

• ވޭސްޓް މެނޭޖްމަންޓް ސެންޓަރަށް ބޭނުންވާ މެޝިނަރީ ގަތުމުގެ މަސައްކަތަށް ދީފައިވާ އެޑްވާންސް ފައިސާ ގެ ގޮތުގައި ލިބެން ޖެހޭ 703،575

• މަރިޔާދުގެ ކުލީގެ ގޮތުގައި 1 ނޮވެމްބަރު 2021 އިން ފެށިގެން ނުލިބޭ ފައިސާ 134،400

• ވިލިނގިލިފަރު ފިނޮޅުގެ ކުލީގެ ގޮތުގައި ލިބެން ޖެހޭ 652،780

• ވިލިނގިލިފަރު ފިނޮޅުން ސީއެސްއާރް ގެ ގޮތުގައި ލިބެންޖެހޭ ފައިސާ (މި ފައިސާ ދައްކަން ޖެހެނީ 10 މެއި 2025 ގެ ކުރިން) 275،000

އޮޑިޓް ރިޕޯޓުގައި ބުނީ ވޭސްޓް މެނޭޖްމަންޓް ސެންޓަރަށް ބޭނުންވާ މެޝިނަރީ ގަތުމުގެ މަސައްކަތަށް ދީފައިވާ އެޑްވާންސް ފައިސާ ގެ ގޮތުގައި ލިބެން ޖެހޭ ފައިސާ ހޯދުމަށް ކައުންސިލްގެ އިދާރާއިން 24 ޖުލައި 2024 ގައި ވަނީ ކޯޓަށް މައްސަލަ ހުށަހެޅުމުގެ ގޮތުން ގާނޫނީ ލަފާ ހޯދާފައިވާ ކަމަށެވެ. 

އެކަމާ ގުޅިގެން އެ އޮފީހުން ލަފާދީފައި ވަނީ ދައުލަތުގެ މާލިއްޔަތުގެ ގަވާއިދުގެ 5.24 ވަނަ މާއްދާގެ (ހ) ގައި ބަޔާން ކޮށްފައިވާ ގޮތަށް ކައުންސިލްގެ އިދާރާއަށް ލިބެންޖެހޭ ފައިސާ ކަނޑައެޅިފައިވާ މުއްދަތުގެ ތެރޭގައި ހޯދުމަށެވެ. އަދި ނުލިބި ހުރި ފައިސާގެ ހިސާބުތައް ލިޔެ ބަލަހައްޓައި، އެފަދަ ފައިސާ ހޯދުމުގެ ކަންތައްތައް އެ ގަވާއިދުގެ 5.26 ވަނަ މާއްދާގައި ބަޔާންކޮށްފައިވާ އުސޫލުތަކާ އެއްގޮތްވާ ގޮތުގެމަތިން ކުރިއަށް ގެންދިއުމަށް ވެސް އޮޑިޓް އޮފީހުން ލަފާ ދީފައި ވެ އެވެ.