ތޮއްޑޫ ކައުންސިލުން 2023 ވަނަ އަހަރުގެ އީދު ފާހަގަ ކުރަން ހަވާލު ކުރި ކުންފުންޏަށް އިތުރަށް ދިން ފައިސާ ހޯދަން އޮޑިޓަރ ޖެނެރަލް އަންގައިފި
7 ޖެނުއަރީ 2026 | ބުދަ 12:56އީދު ފާހަގަ ކުރުމުގެ ގޮތުން ހަވާ އެރުމަށް 57،307 ރުފިޔާ، މިއުޒިކް ޝޯ އަދި އެކިއެކި ހަރަކާތްތަކަށް 205،500 ރުފިޔާ ގެ އިތުރުން އީދު ފާހަގަ ކުރުމަށް ދިއަ ފަންނާނުންނާއި ކްރޫ އަށް 83،475 ރުފިޔާ ވެސް ޚަރަދު ކޮށްފައިވާ ކަން އޮޑިޓް ރިޕޯޓުގައި ވަނީ ފާހަގަ ކޮށްފަ.
އީދުގައި ހަވާ އެރުވުމަށް 57،307 ރުފިޔާ ތޮއްޑޫ ކައުންސިލުން 2023 ވަނަ އަހަރު ޚަރަދު ކުރި | ސޯޝަލް މީޑިއާ
އއ. ތޮއްޑޫގައި 2023 ވަނަ އަހަރު ގެ އަޟްހާ އީދު ފާހަގަ ކުރުމަށް އެ ރަށު ކައުންސިލްގެ ބަޖެޓުގެ ބޮޑު ބައެއް ޚަރަދު ކޮށްފައިވާ ކަމަށް އޮޑިޓަރ ޖެނެރަލް ގެ އޮފީހުން ނެރުނު ރިޕޯޓުގައި ބުނެފި އެވެ.
އެ އޮފީހުން ނެރުނު ތޮއްޑޫ ކައުންސިލްގެ އިދާރާ 2023 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނީ 2023 ވަނަ އަހަރުގެ އަޟްހާ އީދު ފާހަގަކުރުމަށް ޚަރަދު ކުޑަކުރެވޭނެ ގޮތްތައް ބަލާފައި ނުވާ ކަމަށެވެ.
އެގޮތުން ކައުންސިލް އިދާރާ އިން އެ އަހަރު ގެ އީދު ފާހަގަ ކުރުމަށް 719،742 ރުފިޔާ ޚަރަދު ކޮށްފައިވާއިރު އޭގެތެރެއިން 509،742 ރުފިޔާ ޚަރަދު ކޮށްފައިވަނީ ކައުންސިލް ގެ ބަޖެޓުން ކަމަށް ވެސް އޮޑިޓް ރިޕޯޓުގައި ވެ އެވެ.
ރިޕޯޓުގައި ބުނީ އެ އަދަދީ 2023 ވަނަ އަހަރު ކައުންސިލް އިދާރާގެ މުސާރަ ފިޔަވައި ބްލޮކް ގްރާންޓާއި ކައުންސިލްގެ އާމްދަނީ އިން ކޮށްފައިވާ ޖުމްލަ ޚަރަދުގެ 8.4 އިންސައްތަ ކަމަށެވެ. އެއީ ކައުންސިލްގެ ބަޖެޓުގެ ނިސްބަތުން ބަލާނަމަ ބޮޑު އަދަދެެއް ކަމަށް ވެސް ރިޕޯޓުގައި ފާހަގަ ކޮށްފައި ވެ އެވެ.
އީދު ފާހަގަ ކުރުމުގެ ގޮތުން ހަވާ އެރުމަށް 57،307 ރުފިޔާ، މިއުޒިކް ޝޯ އަދި އެކިއެކި ހަރަކާތްތަކަށް 205،500 ރުފިޔާ ގެ އިތުރުން އީދު ފާހަގަ ކުރުމަށް ދިޔަ ފަންނާނުންނާއި ކްރޫ އަށް 83،475 ރުފިޔާ ވެސް ޚަރަދު ކޮށްފައިވާ ކަން އޮޑިޓް ރިޕޯޓުގައި ވަނީ ފާހަގަ ކޮށްފަ އެވެ.
މީގެ އިތުރުން ވެސް އެހިނިހެން ޚަރަދުތަކުގެ ތަފްސީލު ވެސް އެ ރިޕޯޓުގައި ވެ އެވެ.
އެ ރިޕޯޓުގައި ފާހަގަ ކޮށްފައިވާ އިތުރު ކަންކަމުގެ ތެރޭގައި އީދުގެ ހަރަކާތްތައް ކުރިއަށް ގެންދިއަށް ކުންފުންޏަށް އެކަން ހަވާލު ކޮށްފައި ވަނީ 270،000 ރުފިޔާ އަށް ކަން ހިމެނެ އެވެ. އެހާ ބޮޑު ޚަރަދެއް ކުރި ނަމަވެސް ބައެއް ކަންކަން އީދު ފާހަގަކުރުމުގައި ކޮށްފައިވަނީ ފެންވަރު ދަށް ކޮށް ކަމަށާ އީދު ފާހަގަ ކުރަން އެހީގެ ގޮތުގައި ކައުންސިލުން ހޯދި 210،000 ރުފިޔާ ވެސް އެ ކުންފުންޏަށް ދީފައިވާ ކަމަށް ރިޕޯޓުގައި ވެ އެވެ.
މިއީ އެ ކުންފުންޏަށް ދޭން އެއްބަސްވި ފައިސާގެ އިތުރުން ދީފައިވާ ފައިސާ ކަމަށާ އެ ފައިސާ އަނބުރާ ހޯދުމަށް ވެސް އޮޑިޓް އޮފީހުން ވަނީ އެ ކައުންސިލަށް ލަފާ ދީފަ އެވެ. މީގެ އިތުރުން ހަރަދު ކުޑަ ކުރުމަށް ހަރުދަނާ ފިޔަވަޅު އެޅުމަށް ވެސް އެ ކައުންސިލަށް އިލްތިމާސް ކޮށްފަ އެވެ.
