ތޮއްޑޫ އޮޑިޓް: ތޮއްޑޫ ލޯކަލް އޮތޯރިޓީ ކުންފުނި ވަނީ ބޮއްސުންލާފައި
ތޮއްޑޫ ކައުންސިލްގެ އިދާރާ އިން މިހާތަނަށް އެ ކުންފުންޏަށް ދޫ ކޮށްފައިވާ ފައިސާގެ ޖުމްލަ އަދަދު އެނގޭނެ ފަދަ ގޮތަކަށް އެ އިދާރާގެ ލިޔެކިޔުންތައް ތަރުތީބު ކޮށްފައި ނުވާ ކަމަށް އޮޑިޓް ރިޕޯޓު ގައިވޭ.
އއ. ތޮއްޑޫ | ދަ އެޑިޝަން
އއ. ތޮއްޑޫ ލޯކަލް އޮތޯރިޓީ ކުންފުނި މާލީ ގޮތުން ކުރިއަށް ގެންދިއުމަށް އެ ރަށު ކައުންސިލް އިދާރާ އިން ގިނަ އަދަދެއްގެ ފައިސާ ދެމުން ގޮސްފައިވާ ކަމަށާއި އެ ކުންފުނި ވަނީ ބޮއްސުންލާފައި ކަމަށް އޮޑިޓަރ ޖެނެރަލް ގެ އޮފީހުން ބުނެފި އެވެ.
އެ އޮފީހުން އާންމު ކޮށްފައިވާ ތޮއްޑޫ ކައުންސިލް ގެ އިދާރާ 2023 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނީ ތޮއްޑޫ ލޯކަލް އޮތޯރިޓީ ކުންފުންް އަހަރެއް ވެގެން ދިޔަ އިރު ވެސް ކައުންސިލް އިދާރާ އަށް ބަރޯސާނުވެ ކުންފުންޏަށް ލިބޭ އެއްޗަކުން ކުންފުނި ހިންގުމުގެ ނިޒާމެއް ގާއިމު ކޮށްފައި ނުވާ ކަމަށެވެ.
ރިޕޯޓުގައި ވަނީ ކުންފުނީގެ ހިންގުން ވަރަށް ބޮޑަށް ބޮއްސުންލާފައި ވާ ކަން ވެސް ފާހަގަ ކޮށްފަ އެވެ. އެގޮތުން ކުންފުނީގެ ކެޕިޓަލް ގެ ގޮތުގައި ދޭ ފައިސާ ބަޖެޓުގައި ހިމަނައިގެން ފާސް ކުރަން ޖެހޭ ކަމަށް ކައުންސިލްތަކުން ހިއްސާވާ އަމިއްލަ ވިޔަފާރިތަކަށް ކެޕިޓަލް ގެ ގޮތުގައި ކައުންސިލްތަކުން ޚަރަދުކުރުމުގައި އަމަލުކުރާނެ ގޮތުގެ އުސޫލުގައި ބަޔާން ކޮށްފައި ވީ ނަމަވެސް އެ ކަން ފާސް ކޮށްފައިވާ ނުވާ ކަމަށް ރިޕޯޓުގައި ފާހަގަ ކޮށްފައި ވެ އެވެ.
އޭގެ އިތުރުން ކުންފުނީގެ މާލީ ބަޔާން ތައްޔާރު ކޮށްފައި ނުވުމާއެކު މާލީ ހާލަތު ވަޒަންކުރެވޭނެ އަސާސެއް ނެތް ކަމަށް ވެސް އޮޑިޓް އޮފީހުން ވަނީ ބުނެފަ އެވެ.
އޮޑިޓް ރިޕޯޓުގައި ބުނީ ފިނޭންސް މިނިސްޓްރީ ގެ އުސޫލުގައި ބަޔާން ކޮށްފައިވާ ގޮތުން ކައުންސިލް ތަކުން ވިޔަފާރިތަކުގައި އިންވެސްޓް ކުރެވޭނީ އިންވެސްޓް ކުރާ ކުންފުނީގެ ހިއްސާގެ ނިސްބަތުން އެ ކައުންސިލެއްގެ ޖުމްލަ ހިއްސާއަށް ޖެހޭ މިންވަރަށް ވުރެ އިތުރު ނުވާނެ ގޮތެއްގެ މަތިން ކަމަށެވެ.
އެގޮތުން ކައުންސިލްގެ އިދާރާއިން އުފައްދާފައިވާ ކުންފުނީގެ އަސާސީ ގަވާއިދުގެ 4 ވަނަ މާއްދާފައި ބަޔާން ކޮށްފައިވާ ގޮތުން ކުންފުނީގެ ހުއްދަ ކުރެވިފައިވާ ރައުސުލްމާލަކީ 2 ލައްކަ ރުފިޔާ ކަމުގައި ވީ ނަމަވެސް ތޮއްޑޫ ކައުންސިލުން 2024 ސެޕްޓެމްބަރު ގެ ނިޔަލަށް ކުންފުނީގެ ހުއްދަ ކުރެވިފައިވާ ރައުސުލްމާލުގެ އިތުރަށް ނަގުދު ފައިސާގެ ގޮތުގައި 1.1 މިލިއަން އަދި 2.5 މިލިއަން ގެ ހަރުމުދަލާއެކު 3.7 މިލިއަން ރުފިޔާ ކެޕިޓަލްގެ ގޮތުގައި ދޫކޮށްފައިވާ ކަމަށް ވެސް ރިޕޯޓުގައި ވެ އެވެ.
އޭގެ އިތުރުން ތޮއްޑޫ ކައުންސިލްގެ އިދާރާ އިން މިހާތަނަށް އެ ކުންފުންޏަށް ދޫ ކޮށްފައިވާ ފައިސާގެ ޖުމްލަ އަދަދު އެނގޭނެ ފަދަ ގޮތަކަށް އެ އިދާރާގެ ލިޔެކިޔުންތައް ތަރުތީބު ކޮށްފައި ނުވާއިރު މިހާތަނަށް ދޫކުރެވުނު ފައިސާއާ ތަކެތި އިންވެސްޓްމަންޓް ރަޖިސްޓަރ ނުވާ ކަމަށް ވެސް އޮޑިޓަރ ޖެނެރަލް ގެ އޮފީހުން ވަނީ ބުނެފަ އެވެ.
