އަތޮޅު ކައުންސިލްތައް އުވާލުމާ ދެކޮޅަށް ނުކުތުމަށް ބ. އަތޮޅު ކައުންސިލުން ރައީސް ސާލިހުގެ އަރިހުގައި ދަންނަވައިފި

ރައީސް ޑރ. މުހައްމަދު މުއިއްޒުގެ ސަރުކާރުން އަތޮޅު ކައުންސިލްތައް އުވާލުމަށް ނިންމަވާފައިވާ މައްސަލައިގައި ކަންބޮޑުވުން ފާޅުކޮށް، އެކަމާ ދެކޮޅަށް ނުކުތުމަށް ބ. އަތޮޅު ކައުންސިލުން ކުރީ ރައީސް އިބްރާހިމް މުހައްމަދު ޞާލިހުގެ އަރިހުގައި އެދިވަޑައިގެންފި އެވެ.

ބ. އަތޮޅު ކައުންސިލުން މިފަދައިން ރައީސް ޞާލިހުގެ އަރިހުގައި އެދިވަޑައިގަތީ އެ ކައުންސިލާ އެކު ބޭއްވި ބައްދަލުވުމުގަ އެވެ. މި ބައްދަލުވުމުގައި ބ. އަތޮޅު ކައުސިންގެ ހުރިހާ މެންބަރުން ބައިވެރިވި އެވެ.

ބ. އަތޮޅު ކައުންސިލް މެންބަރުން ވަނީ އަތޮޅު ކައުންސިލްތައް އުވާލުމުން ރައްޔިތުންނަށް ހިދުމަތް ދިނުމުގައި ބޮޑެތި ގޮންޖެހުންތަކެއް ކުރިމަތިވާނެ ކަމަށް ފާހަގަކުރައްވާފަ އެވެ. އަދި މި ނިންމުމަކީ ލާމަރުކަޒީ ނިޒާމު އުވާލައި ހުދުމުހުތާރު ވެރިކަމަކަށް ޖާގަ ދިނުމަށް ސަރުކާރުން ކުރާ މަސައްކަތެއް ކަމަށް ކައުންސިލަރުން ތުހުމަތުކުރައްވަ އެވެ.

ކައުންސިލަރުން ވަނީ މި މައްސަލަ އެމްޑީޕީގެ ގައުމީ މަޖިލީހަށް ހުށަހަޅައިގެން، އަތޮޅު ކައުންސިލްތައް އުވާލުމުގެ ސަރުކާރުގެ ނިންމުމާ ދެކޮޅަށް މަސައްކަތް ކޮށްދިނުމަށް އެދިވަޑައިގެންފަ އެވެ. އަދި މި މައްސަލަ ހައްލުކުރުމަށް ގާނޫނީ ގޮތުން ކުރެވިދާނެ ކަންކަން ކުރުމަށް ވެސް ކައުންސިލަރުން ވަނީ އެދިވަޑައިގެންފަ އެވެ.

ރައީސް ޑރ. މުހައްމަދު މުއިއްޒު ވަނީ ލާމަރުކަޒީ ނިޒާމު ފުނޑުފުނޑު ކޮށްލާ އަތޮޅު ކައުންސިލްތަކަކީ ބޭކާރު ތަނެއް ކަމަށް ސިފަކުރައްވަމުން ގެންދަވާފަ އެވެ. އަދި އެ ކައުންސިލްތައް އުވާލުމަށް އެމަނިކުފާނު ވަނީ ނިންމަވާފަ އެވެ.

އަތޮޅު ކައުންސިލްތަކަކީ ލާމަރުކަޒީ ނިޒާމުގެ މުހިންމު ބައެއް ކަމަށާއި، އެ ކައުންސިލްތައް އުވާލުމުން އަތޮޅުތަކުގެ ތަރައްގީއަށް އަދި ރައްޔިތުންނަށް ހިދުމަތް ދިނުމަށް ބޮޑެތި ހުރަސްތަކެއް ކުރިމަތިވާނެ ކަމަށް ލާމަރުކަޒީ ނިޒާމަށް ތާއީދުކުރާ ފަރާތްތަކުން ވަނީ ބުނެފަ އެވެ.

މި ސަރުކާރުން އަތޮޅު ކައުންސިލްތައް އުވާލުމަށް ނިންމުމާ ގުޅިގެން، ލާމަރުކަޒީ ނިޒާމުގެ ތެރެއިން ރައްޔިތުންނަށް ލިބިފައިވާ ބާރުތައް ކުޑަވެ، ވެރިކަން ހިންގުމުގައި ރައްޔިތުންގެ ބައިވެރިވުން މަދުވާނެ ކަމަށް ވެސް ކަންބޮޑުވުންތައް ފާޅުކުރެވިފައިވެ އެވެ.