އޮންލައިން ކޮށް ފޯމް ހުށަހަޅަން ޖެހޭ ގޮތަށް ކައުންސިލް އިންތިޚާބަށް ކުރިމަތިލާން ހުޅުވާލައިފި
ކައުންސިލް އިންތިޚާބަށް ކުރިމަތިލުމުގެ ފުރުސަތު ހުޅުވާލީ 17 ޖެނުއަރީން ފެށިގެން 01 ފެބްރުއަރީ ވާ އާދީއްތަ ދުވަހުގެ 15:30 ގެ ނިޔަލަށް ކަމަށް. އެގޮތުން ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30ން މެންދުރުފަހު 15:30 އަށް އަދި ހުކުރު ދުވަހު މެންދުރުފަހު 15:30ން ހަވީރު 18:00ށް ފޯމް ހުށަހެޅޭނެ ކަމަށް އީސީން ބުނޭ.
ކުރިއަށް އޮތް ލޯކަލް ކައުންސިލް އިންތިޚާބާ ގުޅޭގޮތުން މައުލޫމާތު ދިނުމަށް އިލެކްޝަން ކޮމިޝަނުން ބޭއްވި ނޫސްވެރިންގެ ބައްދަލުވުމުގެ ތެރެއިން | ރާއްޖެ އެމްވީ
ސިޓީ ކައުންސިލްތަކާއި ރަށު ކައުންސިލްތައް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ އިންތިޚާބަށް ކުރިމަތިލުމުގެ ފުރުސަތު އިލެކްޝަންސް ކޮމިޝަން (އީސީ) އިން ހުޅުވާލައިފި އެވެ.
ހޮނިހިރު ދުވަހު އީސީން ބުނީ، ކައުންސިލް އިންތިޚާބަށް ކުރިމަތިލުމުގެ ފުރުސަތު ހުޅުވާލީ 17 ޖެނުއަރީން ފެށިގެން 01 ފެބްރުއަރީ، ވާ އާދީއްތަ ދުވަހުގެ 15:30 ގެ ނިޔަލަށް ކަމަށެވެ.
އެގޮތުން ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30ން މެންދުރުފަހު 15:30 އަށް އަދި ހުކުރު ދުވަހު މެންދުރުފަހު 15:30ން ހަވީރު 18:00ށް ފޯމް ހުށަހެޅޭނެ ކަމަށް އީސީން ބުނެ އެވެ.
އީސީން ބުނީ، ލޯކަލް ކައުންސިލްތަކުގެ އިންތިޚާބުގެ ޤާނޫނުގެ 12 ވަނަ މާއްދާގެ (ހ) އާއި ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 ގެ ގަވާއިދުގެ 18 ވަނަ މާއްދާގައި ބަޔާންކޮށްފައިވާ ގޮތަށް ކައުންސިލުތަކުގެ އިންތިޚާބަށް ކުރިމަތިލާ މީހެއްގެ ބަޔާން ކޮށްފައިވާ ޝަރުތުތައް ފުރިހަމަ ވާން ޖެހޭ ކަމަށެވެ.
އެގޮތުން 11 ޝަރުތެއް ބަޔާން ކޮށްފައިވެ އެވެ.
ލޯކަލް ކައުންސިލްތަކުގެ އިންތިޚާބު ގައި ސިޓީ ކައުންސިލްތަކުގެ މޭޔަރުންނާއި ސިޓީ ކައުންސިލްގެ މެންބަރުންނާއި ސިޓީ ކައުންސިލްގެ އަންހެން މެންބަރުން ހޮވާނެ އެވެ. އަދި ރަށު ކައުންސިލްތަކުގެ ރައީސުންނާއި ރަށު ކައުންސިލްތަކުގެ މެންބަރުންގެ އިތުރުން ރަށު ކައުންސިލްތަކުގެ އަންހެން މެންބަރު ވެސް އިންތިޚާބު ކުރާނެ އެވެ. މީގެ އިތުރުން ޑަބްލިއުޑީސީގެ އިންތިޚާބު ގައި ރަށްރަށުގެ ޑަބްލިއުޑީސީގެ ރައީސުންނާއި ކޮމިޓީގެ މެންބަރުން އިންތިޚާބު ކުރާއިރު، ސިޓީތަކުގައި ވެސް ޑަބްލިއުޑީސީގެ ރައީސުންނާއި ކޮމިޓީ މެންބަރުން އިންތިޚާބު ކުރާނެ އެވެ.
މީގެ އިތުރުން ކައުންސިލްތަކުގެ އިންތިޚާބަށް ކުރިމަތިލުމަށް އެދޭ ފަރާތްތަކުން އެކަމަށް އެދި ހުށަހަޅަންޖެހޭ ހުރިހާ ލިޔެކިޔުންތަކާއި، އިންތިޚާބަށް ކުރިމަތިލުމަށް އެދޭ ފަރާތްތަކުން ދައްކަންޖެހޭ އިދާރީ ފީ ދައްކާނީމައި ޕޯޓަލް my.elections.gov.mv މެދުވެރިކޮށް ކަމަށް ކޮމިޝަނުން ބުނެ އެވެ. އަދި އިންތިޚާބަށް ކުރިމަތިލުމަށް އެދި ހުށަހެޅި ހުށަހެޅުމާމެދު ނިންމިގޮތާއި ކެންޑިޑޭޓުންނަށް އަންގަންޖެހޭ އެންގުންތައް ކޮމިޝަނުން އަންގާނީ ވެސް މައި ޕޯޓަލް މެދުވެރިކޮށް ކަމަށް އިއުލާންގައި ބުނެފައިވެ އެވެ.
އީސީން ވަނީ ކައުންސިލްތަކުގެ އިންތިޚާބަށް ކުރިމަތިލުމަށް އެދޭމީހާ، އިންތިޚާބަށް ކުރިމަތިލުމަށް އެދޭއިރު، ހުށަހަޅަން ޖެހޭ ހުރިހާ ލިޔުންތައް ހަމައަށް ހުށަހެޅުމަށް އިލްތިމާސް ކޮށްފަ އެވެ. އަދި ކުށާއި ދަރަނީގެ ރެކޯޑު ސާފުކުރާއިރު އެއްވެސް ރެކޯޑެއް އޮތްނަމަ އެކަމުގެ ތަފްސީލް އަދި ފައިސާއެއް ދައްކަން ހުކުމް ކޮށްފައިވާނަމަ އެފައިސާ ދައްކާފައިވާކަމުގެ ނުވަތަ ހުކުމާ އެއްގޮތަށް ފައިސާ ދައްކަމުންދާ ކަމަށް، ކަމާބެހޭ އިދާރާކުން ދީފައިވާ ލިޔުން ހުށަހަޅަން ޖެހޭ ކަމަށް އީސީން ބުނެ އެވެ. އަދި ކުށާއި ދަރަނީގެ ރެކޯޑާއި އެއާ ގުޅޭ އެންމެހައި ލިޔެކިޔުންތައް ހުންނަންވާނީ އެއް ފައިލެއްގެ ގޮތުގައި ޕީޑީއެފް ފޯމެޓުގައި، ފައިލް ސައިޒް ފައިވް އެމްބީ (5Mb) އަށްވުރެ ބޮޑުނުވާގޮތަށް ކަމަށް އީސީން ބުނެ އެވެ.
ލޯކަލް ކައުންސިލްތަކުގެ އިންތިޚާބު 2026 ގެ ވޯޓު ނެގުމަށް ހަމަޖެހިފައިވަނީ، 2026 އެޕްރީލް 04 ވާ ހޮނިހިރު ދުވަހުގެ 8:00ން 16:00 އަށެވެ. އަދި ވޯޓު ގުނަން ފަށާނީ ހަމަ އެ ދުވަހު ވޯޓު ނަގާ ނިމޭތާ 30 މިނެޓުގެ ހުސްވަގުތުކޮޅަކަށް ފަހުގަ އެވެ.
އިންތިޚާބުތަކާބެހޭ އާންމު ގަވާއިދުގެ ދަށުން އިންތިޚާބު އޮންނަ ދުވަހު، އިންސާނީ ބާރު ނުހިނގާ ފަދަ ގުދުރަތީ ހާދިސާއެއް މެދުވެރިވުމުން ފިޔަވައި، ވޯޓު ނަގަން ކޮމިޝަނުން ކަނޑައަޅައިފައިވާ ގަޑިއަށް ބަދަލެއް ނުގެނެވޭނެ އެވެ.
މި އިންތިޚާބުގެ ރަސްމީ ނަތީޖާ އިއުލާނުކުރުމަށް ހަމަޖެހިފައިވަނީ 2026 އެޕްރީލް 11 ވާ ހޮނިހިރު ދުވަހު ކަމަށް އީސީން ބުނެ އެވެ.
ސިޓީ ކައުންސިލްތަކާއި ރަށު ކައުންސިލްތައް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީ ގެ އިންތިޚާބަށް ކުރިމަތިލުމުގެ ފުރުސަތު ކޮމިޝަނުން ހުޅުވާލާފައިވާއިރު، މިފަހަރުގެ އިންތިޚާބު ގައި ކައުންސިލްތަކުގެ ޖުމްލަ 225 ދާއިރާއަކަށް މެންބަރުން އިންތިޚާބު ކުރަން ޖެހެ އެވެ. ލޯކަލް ކައުންސިލްތަކަށް 678 މެންބަރުން އިންތިޚާބު ކުރަންޖެހޭއިރު، އަންހެނުންގެ ތަރައްގީ އަށް މަސައްކަތްކުރާ ކޮމެޓީތަކަށް 678 މެންބަރުން އިންތިޚާބުކުރަންޖެހެ އެވެ.
އެހެންކަމުން މިފަހަރުގެ އިންތިޚާބުގައި ޖުމްލަ 1356 މެންބަރުން އިންތިޚާބު ކުރާނެ ކަމަށް އީސީން ބުނެ އެވެ.
އިލެކްޝަންސް ކޮމިޝަނުން ނެރެފައިވާ ވޯޓަރސް ލިސްޓުން ދައްކާ ގޮތުގައި ކައުންސިލް އިންތިޚާބު ގައި 144,527 އަންހެނުންނާއި، 150,410 ފިރިހެނުން ހިމެނޭހެން ޖުމްލަ 294,937 މީހުންނަށް ވޯޓުލުމުގެ ހައްގު ލިބެ އެވެ.
