އެމެރިކާގެ މިނިއަޕޮލިސް ގައި ކުރި މުޒާހަރާތަކުގައި ގިނަ ބަޔަކު ހައްޔަރުކޮށް، ފުލުހަކަށް އަނިޔާވެއްޖެ

އެމެރިކާގެ މިނިއަޕޮލިސް ގައި ކުރި މުޒާހަރާތަކުގައި ގިނަ ބަޔަކު ހައްޔަރުކޮށް، ފުލުހަކަށް އަނިޔާވެއްޖެ އެވެ.

އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް (އައިސް) ގެ އެޖެންޓަކު ދިން ބަޑީގެ ހަމަލާއެއްގައި އަންހެނަކު މަރުވުމާ ގުޅިގެން މިނިއަޕޮލިސް ގައި ކުރި މުޒާހަރާތަކުގައި މަދުވެގެން 29 މީހުން ވަނީ ހައްޔަރުކޮށްފަ އެވެ.

ހުކުރު ދުވަހުގެ ރޭ 1،000 އެއްހައި މީހުން މަގުތަކަށް ނުކުމެ ކުރި މި މުޒާހަރާގެ ތެރޭގައި ފުލުހަކަށް ގަނޑުފެންބުރިއަކުން ހަމަލާދިނުމުގެ ސަބަބުން އަނިޔާވެފައިވާ ކަމަށް ސިޓީގެ އޮފިޝަލުން ބުނެފައިވެ އެވެ.

އުމުރުން 37 އަހަރުގެ ރެނީ ނިކޯލް ގުޑް، އޭނާގެ ކާރުގެ ތެރޭގައި އިންދާ ބުދަ ދުވަހު ބަޑިޖަހާ މަރާލުމާ ގުޅިގެން، އިމިގްރޭޝަން ގާނޫނުތައް ތަންފީޒުކުރުމާ ދެކޮޅަށް އެމެރިކާގެ އެކި ކަންކޮޅުތަކުގައި މިހާރު ދަނީ މުޒާހަރާތައް ކުރަމުންނެވެ.

ޓްރަމްޕްގެ ސަރުކާރުން ބުނެފައިވަނީ ބަޑި ޖެހި އެޖެންޓް އެކަން ކުރީ އަމިއްލަ ނަފްސުގެ ދިފާއުގައި ކަމަށެވެ. ނަމަވެސް، އެ ސަރަހައްދުގެ އޮފިޝަލުން ބުނާ ގޮތުގައި އޭނާގެ ގަޔަށް ފުލުހުން ބަޑިޖެހި ނަމަވެސް އެ އަންހެން މީހާގެ ފަރާތުން އެއްވެސް ނުރައްކަލެއް ކުރިމަތިވެފައެއް ނުވެ އެވެ.

'އައިސް' އެޖެންޓުން ތިބި ކަމަށް ބެލެވޭ 'ކެނޮޕީ ހޮޓެލް' ކައިރިއަށް މުޒާހަރާގެ ބައިވެރިން އެއްވުމާ ގުޅިގެން، އެއީ ގާނޫނާ ހިލާފު އެއްވުމެއް ކަމަށް މިނިއަޕޮލިސް ފުލުހުން ހުކުރު ދުވަހުގެ ރޭ ކަނޑައެޅިއެވެ. ފުލުހުންގެ ބަޔާނެއްގައިވާ ގޮތުން، ބައެއް މީހުން ވަނީ ހޮޓަލުގެ ފަހަތު ދޮރަކުން ގަދަކަމުން އެތެރެ އަށް ވަދެފަ އެވެ.

އިންޓަނެޓްގައި އާންމުވެފައިވާ ވީޑިއޯތަކުން ފެންނަ ގޮތުގައި މުޒާހަރާގެ ބައިވެރިން ވަނީ ގަދަ އަލި ބޭނުންކޮށް، ކަށިގަނޑު ފުމެ، ބެރު ޖަހާފައެވެ. ފުލުހުން ބުނި ގޮތުގައި 1،000 އަށްވުރެ ގިނަ މީހުން އެއްވި މި މުޒާހަރާގައި ފުލުހުންނަށާއި އުޅަނދުތަކަށް ގަނޑުފެނާއި ސުނޯ އަދި ގާ އުކާފައިވެ އެވެ. ނަމަވެސް އެއްވެސް މީހަކަށް ސީރިއަސް އަނިޔާއެއް ލިބިފައެއް ނުވެ އެވެ.

މި ހަމަލާތަކުގައި އެއް ފުލުހަކަށް ކުދި އަނިޔާތަކެއް ލިބުނު ކަމަށް ރިޕޯޓު ކޮށްފައިވެ އެވެ. މީގެ އިތުރުން، އެ ސިޓީގެ އެހެން ހޮޓަލަކަށް ވެސް ގެއްލުންދީ، ކުޑަދޮރުތައް ތަޅާލައި، ފާރުތަކުގައި ކުރެހުންތައް އަޅާފައިވާ ކަމަށް ރިޕޯޓްކޮށްފައިވެ އެވެ.

ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި، މިނިއަޕޮލިސްގެ މޭޔަރު ޖޭކޮބް ފްރޭ ވަނީ ސުލްހަވެރިކަމާއެކު މުޒާހަރާކުރި މީހުންނަށް ތައުރީފު ކުރައްވާފަ އެވެ. ނަމަވެސް، މުދަލަށް ގެއްލުންދީ ނުވަތަ އެހެން މީހުންގެ ފުރާނަ އަށް ނުރައްކާވާ ފަދަ އަމަލުތައް ހިންގާ މީހުން ހައްޔަރުކުރާނެ ކަމަށް އޭނާ ވިދާޅުވި އެވެ. ހުކުރު ދުވަހުގެ ރޭ ހައްޔަރުކުރި 29 މީހުން މިހާރު ދޫކޮށްލާފައިވާ ކަމަށް ފުލުހުންގެ ވެރިޔާ ބްރަޔަން އޯހާރާ ވިދާޅުވި އެވެ.

މިނިއަޕޮލިސްގެ ގިނަ ރައްޔިތުން އެ ސްޓޭޓުގައި އައިސް ގެ ހަރަކާތްތައް އިތުރުވަމުންދާތީ ހިތްހަމަނުޖެހުން ފާޅުކުރަމުންދާއިރު، އެ އިދާރާގެ މަސައްކަތްތަކާ ގުޅިގެން ކޮންމެ ދުވަހަކު އެތައް ބަޔަކު ފުލުހުންނަށް ގުޅަމުންދާ ކަމަށް އޯހާރާ ވިދާޅުވިއެވެ.

ހޮނިހިރު ދުވަހު، މިނެސޯޓާގެ ތިން ކޮންގްރެސް މެންބަރަކު މިނިއަޕޮލިސް ގައި ހުންނަ 'އައިސް' މަރުކަޒަކަށް ވަނުމަށް މަސައްކަތް ކުރެއްވި އެވެ. އެ ބޭފުޅުން ވިދާޅުވި ގޮތުގައި ފުރަތަމަ އެތެރެއަށް ވަނުމުގެ ހުއްދަ ދިން ނަމަވެސް، ފަހުން ވަނީ އެތަނުން ނުކުތުމަށް އަންގާފަ އެވެ.

ޑިމޮކްރެޓިކް ކޮންގްރެސް މެންބަރުން ކަމަށްވާ އިލްހާން އުމަރު، ކެލީ މޮރިސަން އަދި އެންޖީ ކްރެއިގް ވިދާޅުވީ، އައިސް އާއި ޑިޕާޓްމަންޓް އޮފް ހޯމްލޭންޑް ސެކިއުރިޓީން ދަނީ ކޮންގްރެސްގެ މެންބަރުންގެ ޒިންމާތަކަށް ހުރަސް އަޅަމުން ކަމަށެވެ.

ކުރިއަށް އޮތް ހަފުތާ ބަންދުގައި ވެސް މިނިއަޕޮލިސްގެ އިތުރުން ޓެކްސަސް، ފްލޮރިޑާ އަދި ވޮޝިންޓަން ޑީސީ ފަދަ ސަރަހައްދުތަކުގައި ބޮޑެތި މުޒާހަރާތަކެއް ބޭއްވުމަށް ވަނީ ރޭވިފައެވެ.