ކޮލަމްބިއާ އަށް އެމެރިކާ އިން ހަމަލާ ދީފާނެ ކަމުގެ ހަގީގީ ބިރު އޮތް ކަމަށް އެ ގައުމުގެ ރައީސް ވިދާޅުވެއްޖެ

ކޮލަމްބިއާ އާ ދެކޮޅަށް އެމެރިކާ އިން އަސްކަރީ ހަމަލާ އެއް ދިނުމުގެ "ހަގީގީ ބިރުވެރިކަމެއް" އެބައޮތް ކަމަށް އެގައުމުގެ ރައީސް ގުސްޓާވޯ ޕެޓްރޯ ބީބީސީ އަށް ދެއްވި ބަސްދީގަތުމެއްގައި ވިދާޅުވެއްޖެ އެވެ.

ރައީސް ޕެޓްރޯ ވިދާޅުވި ގޮތުގައި އެމެރިކާ އިން އެހެން ގައުމުތަކާ މެދު އަމަލުކުރަމުން ދަނީ އެމެރިކާގެ "ޚާންދާން" ނުވަތަ ރަސްކަމުގެ ބައެއްގެ ގޮތުގައި ދެކިގެން ކަމަށެވެ. މިއީ އެމެރިކާގެ ރައީސް ޑޮނަލްޑް ޓްރަމްޕް، ކޮލަމްބިއާ އާ ދެކޮޅަށް އަސްކަރީ ފިޔަވަޅު އަޅާނެ ކަމުގެ އިންޒާރު ދެއްވުމާ ގުޅިގެން ޕެޓްރޯ ދެއްވި ރައްދެކެވެ. އޭނާ އިތުރަށް ވިދާޅުވީ، ދުނިޔޭގެ މައްޗަށް ގަދަވެގަތުމަށް އެމެރިކާ އިން ކުރާ މަސައްކަތުގެ ސަބަބުން، އެގައުމު މުޅި ދުނިޔެ އާ އެކަހެރިވުމުގެ ނުރައްކާ އެބައޮތް ކަމަށެވެ.

މީގެ އިތުރުން، އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް (އައިސް) ގެ އެޖެންޓުންގެ އަމަލުތައް ހުރީ "ނާޒީ ބްރިގޭޑްތަކެއް" ފަދައިން ކަމަށް ވިދާޅުވެ ޕެޓްރޯ ވަނީ އެ މުއައްސަސާ އަށް ބޮޑެތި ތުހުމަތުތަކެއް ކުރައްވާފަޗއެވެ. ރައީސް ޓްރަމްޕް ވަނީ ކުށްކުރުން ހުއްޓުވުމަށާއި ގަވާއިދާ ހިލާފަށް އެމެރިކާ އަށް އެތެރެވާ މީހުން ހިފެހެއްޓުމުގެ ނަމުގައި އައިސް ގެ ހަރަކާތްތައް ވަރަށް ބޮޑަށް ފުޅާކުރައްވާފަ އެވެ.

ވެނެޒުއޭލާ އަށް ހަމަލާދީ، އެގައުމުގެ ރައީސް ނިކޮލަސް މަދޫރޯ ހައްޔަރުކުރުމަށް ފަހު، ކޮލަމްބިއާ އަށް އަމާޒުކޮށް އަސްކަރީ އޮޕަރޭޝަނެއް ހިންގުމަކީ "ރަނގަޅު ކަމެއް" ކަމަށް ޓްރަމްޕް ވަނީ ވިދާޅުވެފަ އެވެ. އަދި ޓްރަމްޕް ތަކުރާރުކޮށް ޕެޓްރޯ އަށް އިންޒާރު ދިނުމުގެ ރޫހެއްގައި މުހާތަބު ކުރައްވާފައިވާއިރު، ޕެޓްރޯ ވަނީ އެކަން ހަރުކަށި އިބާރާތުން ކުށްވެރިކުރައްވާފަ އެވެ.

މިދިޔަ ބުދަ ދުވަހުގެ ރޭ ދެ ބޭފުޅުން ފޯނުން ވާހަކަދެއްކެވުމަށް ފަހު، ޓްރަމްޕް ވިދާޅުވީ ވަރަށް އަވަސް މުސްތަގުބަލެއްގައި ވައިޓް ހައުސްގައި ޕެޓްރޯއާ ބައްދަލުކުރައްވާނެ ކަމަށެވެ. ޓްރަމްޕްގެ 'ޓްރުތް ސޯޝަލް' ޕްލެޓްފޯމްގައި އެކަން ސިފަކުރެއްވީ ލިބުނު "ބޮޑު ޝަރަފެއް" ގެ ގޮތުގައެވެ. ކޮލަމްބިއާގެ އޮފިޝަލަކު ވިދާޅުވި ގޮތުގައި އެ ފޯނު ކޯލުން ފެނިގެންދިޔައީ ދެ ފަރާތުގެ ބަހުގެ ހަމަލާތަކަށް އައި 180 ޑިގްރީގެ ބޮޑު ބަދަލެއް ކަމުގަ އެވެ.

ނަމަވެސް، ބުރާސްފަތި ދުވަހު ޕެޓްރޯ ދެއްކެވި ވާހަކަފުޅުތަކުން އެނގިގެންދިޔައީ ދެގައުމުގެ ގުޅުމަށް މާބޮޑު ކުރިއެރުމެއް އައިސްފައިނުވާ ކަމެވެ. ބީބީސީ އަށް އޭނާ ވިދާޅުވީ ގަޑިއިރެއްހާއިރަށް ދެމިގެންދިޔަ އެ ފޯނު ކޯލުގައި ގިނައިން ވާހަކަދެއްކެވީ އޭނާ ކަމަށެވެ. އެގޮތުން ކޮލަމްބިއާގެ މަސްތުވާތަކެތީގެ މައްސަލަ އާއި، ވެނެޒުއޭލާއާ މެދު ކޮލަމްބިއާ ދެކޭގޮތާއި، އެމެރިކާއާ ގުޅިގެން ލެޓިން އެމެރިކާ ގައި ހިނގަމުންދާ ކަންކަމާ ބެހޭގޮތުން މަޝްވަރާކުރެއްވި ކަމަށް ވިދާޅުވި އެވެ.

އައިސް އެޖެންޓުންނަކީ "ނާޒީން" ފަދަ ބައެއްގެ ގޮތުގައި ސިފަކުރައްވަމުން ޕެޓްރޯ ވަނީ އެމެރިކާގެ އިމިގްރޭޝަން ސިޔާސަތުތަކަށް ވަރަށް ބޮޑަށް ފާޑުވިދާޅުވެފަ އެވެ. ރައީސް ޓްރަމްޕް އަބަދުވެސް ތުހުމަތުކުރައްވާ ގޮތުގައި އެމެރިކާގައި ކުށްކުރުން އިތުރުވެ، މަސްތުވާތަކެތީގެ ވިޔަފާރި ފުޅާވަނީ ހިޖުރަކުރާ މީހުންގެ ސަބަބުންނެވެ. އަދި ކޮލަމްބިއާ އާއި ވެނެޒުއޭލާ ފަދަ ގައުމުތަކުން މަސްތުވާތަކެތި ހުއްޓުވުމަށް އެކަށީގެންވާ މަސައްކަތެއް ނުކުރާ ކަމަށް ވެސް އޭނާ ތުހުމަތު ކުރައްވަ އެވެ.

ޓްރަމްޕް އަލުން ވެރިކަމަށް ވަޑައިގަތުމަށް ފަހު، އައިސް އެޖެންޓުން ވަނީ އެމެރިކާގެ އެކި ސިޓީތަކަށް ފޮނުވާފަ އެވެ. މި މުއައްސަސާއަކީ އިމިގްރޭޝަން ގާނޫނުތައް ތަންފީޒުކޮށް، ގަވާއިދާ ހިލާފަށް އުޅޭ މީހުން ހޯދައި، އެމީހުން ގައުމުން ބޭރުކުރުމުގެ ޒިންމާ އުފުލާ ފަރާތެވެ.

އެމެރިކާ ސަރުކާރުން ހާމަކޮށްފައިވާ ގޮތުގައި 2025 ޖެނުއަރީ 20 އިން ޑިސެމްބަރު 10 އާ ދެމެދު 605,000 މީހުން ވަނީ ޑިޕޯޓްކޮށްފަ އެވެ. އަދި ހައްޔަރުވުމުގެ ބިރަށްޓަކައި 1.9 މިލިއަން މީހުން އަމިއްލަ އަށް ގައުމުން ބޭރުވެފައިވާ ކަމަށް ވެސް ސަރުކާރުން ބުނެ އެވެ.

މި ހަފުތާގައި މިނިއަޕޮލިސް ސިޓީގައި އެމެރިކާގެ އިމިގްރޭޝަން އެޖެންޓަކު ވަނީ 37 އަހަރުގެ އެމެރިކާ ރައްޔިތެއްގެ ގަޔަށް ބަޑިޖަހައި މަރާލާފަ އެވެ. މިކަމާ ގުޅިގެން އެ ސިޓީގައި ވަނީ ބޮޑެތި މުޒާހަރާތަކެއް ފެށިފަ އެވެ. މައި ސަރުކާރުގެ އޮފިޝަލުން ބުނެފައި ވަނީ އެ އަންހެން މީހާ، ރެނީ ނިކޯލް ގުޑް، މަސައްކަތް ކުރީ ކާރުން އެޖެންޓުންގެ ގައިގައި ޖައްސައި މަރާލަން ކަމަށެވެ. ނަމަވެސް އެ ސިޓީގެ މޭޔަރު ޖެކޮބް ފްރޭ ވިދާޅުވީ އެޖެންޓް އަމަލުކުރީ ވަރަށް ޒިންމާދާރުކަން ކުޑަ ގޮތަކަށް ކަމަށާއި، އެޖެންޓުން އެ ސިޓީން ފޭބުމަށް ވަނީ ގޮވާލައްވާފަ އެވެ.

މިކަމާ ގުޅިގެން ޕެޓްރޯ ވިދާޅުވީ، އައިސް އިން މިހާރު ހަމައެކަނި އުނދަގޫ ކުރަނީ ލެޓިން އެމެރިކާގެ މީހުންނަށް ނޫން ކަމަށާއި، އެމެރިކާގެ އަމިއްލަ ރައްޔިތުން މަރާ ހިސާބަށް ކަންކަން ގޮސްފައިވާ ކަމަށެވެ. އޭނާ އިތުރަށް ވިދާޅުވީ، މިގޮތަށް ކަންކަން ކުރިއަށްދާ ނަމަ، ދުނިޔޭގެ މައްޗަށް ބާރު ފޯރުވާ "ޚާންދާން" އެއްގެ ހުވަފެން ބެލުމުގެ ބަދަލުގައި، އެމެރިކާ ވާނީ ދުނިޔެ އާ އެކަހެރިވެފައިވާ ގައުމަކަށް ކަމަށެވެ. ސަބަބަކީ އެއްވެސް ޚާންދާނެއް ދުނިޔެ އާ އެކަހެރިވެގެން ބިނާ ނުކުރެވޭނެތީ ކަމަށް ވެސް އޭނާ ވިދާޅުވި އެވެ.