ހައި ކޯޓުގެ ފަނޑިޔާރުންގެ ތެރެއިން ޖޭއެސްސީ އަށް ފަނޑިޔާރު ހަސަން ޝަފީއު

ހައި ކޯޓުގެ ފަނޑިޔާރުންގެ ތެރެއިން ޖުޑީޝަލް ސަރވިސް ކޮމިޝަންގެ މެންބަރުކަމަށް އައްޔަނު ކުރާ ފަނޑިޔާރަކަށް،  ފަނޑިޔާރު ހަސަން ޝަފީއު އިންތިޚާބު ކޮށްފި އެވެ. 

ހައި ކޯޓުން ކުރި ޕޯސްޓެއްގައި ބުނީ ގާނޫނު އަސާސީގެ 158 ވަނަ މާއްދާގެ (ނ) ގައިވާ ގޮތުގެ މަތިން، ޖުޑީޝަލް ސަރވިސް ކޮމިޝަނަށް ފަނޑިޔާރު އަލްއުސްތާޛު ހަސަން ޝަފީއު އިންތިޚާބު ކޮށްފައިވާ ކަމަށެވެ. 

ފަނޑިޔާރު ހަސަން ޝަފީއު ހައި ކޯޓުގެ ފަނޑިޔާރުންގެ ތެރެއިން އެ ކޮމިޝަންގައި ހުންނަވާ މެންބަރު ކަމަށް އިންތިޚާބު ކޮށްފައިވަނީ ޖޭއެސްސީ ގައި ހައި ކޯޓުގެ ފަނޑިޔާރުންގެ ތެރެއިން ކުރިން ހުންނެވި އެ ކޯޓުގެ އޭރުގެ ފަނޑިޔާރު މުހައްމަދު ނިޔާޒު ޚިދުމަތުން ރިޓަޔަރ ކުރެއްވުމާ ގުޅިގެންނެވެ.

ގާނޫނު އަސާސީގައި ވާ ގޮތުން ޖޭއެސްސީ އެކުލެވިގެން ވަނީ 10 މެންބަރުންގެ މައްޗަށެވެ. އެގޮތުން މިހާރު އެ ކޮމިޝަންގައި ތިއްބެވީ ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲ އާއި ސުޕްރީމް ކޯޓުގައި ހިމެނިވަޑައިގަންނަވާ ފަނޑިޔާރުންގެ ތެރެއިން ފަނޑިޔާރު ހުސައިން ޝަހީދު، ހައި ކޯޓުގެ ފަނޑިޔާރުންގެ ތެރެއިން ހިމެނިވަޑައިގަންނަވާ ފަނޑިޔާރު ހަސަން ޝަފީއު، ދަށު ކޯޓުތަކުގެ ފަނޑިޔާރުންގެ ތެރެއިން ފަނޑިޔާރު ފަރުހާދު ރަޝީދު ރައްޔިތުންގެ މަޖިލީހުގެ މެންބަރުންގެ ތެރެއިން އެ މަޖިލީހުން ކަނޑައަޅާފައިވާ މެންބަރު މަނަދޫ ދާއިރާގެ ޕީއެންސީ މެންބަރު ހުސްނީ މުބާރިކް، ސިވިލް ސަރވިސް ކޮމިޝަނުގެ ރައީސް މުހައްމަދު މުޖުތާޒު ފަހުމީ، ރައީސް އައްޔަން ކުރައްވާ މެންބަރު މުހައްމަދު ޔަޒުމީދުު ބަންޑާރަނައިބު އަހްމަދު އުޝާމް، ގާނޫނީ ވަކީލުންގެ ތެރެއިން އިންތިހާބު ކޮށްފައިވާ މެންބަރު އަލީ އަބްދުއްލަތީފް ގެ އިތުރުން އާންމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މެންބަރު އިދުރީސް ފައުޒީ އެވެ. 

ހައި ކޯޓުގެ ފަނޑިޔާރުންގެ ތެރެއިން ޖޭއެސްސީ އަށް އިންތިޚާބު ކޮށްފައިވާ ހަސަން ޝަފީއު އަކީ ގާނޫނީ ރޮނގުން މޯލްޑިވްސް ކޮލެޖް އޮފް ހަޔަރ އެޑިއުކޭޝަންއިން ބެޗްލަރ އޮފް ލޯ(އެލް.އެލް.ބީ) އަދި މެލޭޝިއާގެ އިންޓަރނޭޝަނަލް އިސްލާމިކް ޔުނިވަރސިޓީއިން މާސްޓަރ އޮފް ކޮމްޕަރޭޓިވް ލޯ ހާސިލްކުރައްވާފައިވާ ބޭފުޅެކެވެ.

2013 ވަނަ އަހަރުން ފެށިގެން ފަނޑިޔާރެއްގެ ހައިސިއްޔަތުން ފެމެލީ ކޯޓުގައާއި ސިވިލްކޯޓުގައި މަސައްކަތްކުރެއްވި ޝަފީއު އަކީ ގާނޫނީ ދާއިރާގައި 14 އަހަރަށް ވުރެ ގިނަ ދުވަހު ދުވަހުގެ ތަޖުރިބާ ހުރިބޭފުޅެކެވެ. މިދާއިރާ އިން ކިޔަވާދިނުމުގެ އިތުރުން ގާނޫނުތައް ޑްރާފްޓް ކުރެއްވުމުގައި ވެސް މަސައްކަތް ކުރައްވާފައިވެ އެވެ.