ދިހަ އަހަރުގެ މެދުކެނޑުމަކަށްފަހު ބަންގްލަދޭޝާއި ޕާކިސްތާނާ ދެމެދު ސީދާ ވައިގެ ދަތުރުތައް އަލުން ފަށަނީ

ދިހަ އަހަރުގެ މެދުކެނޑުމަކަށްފަހު ބަންގްލަދޭޝާއި ޕާކިސްތާނާ ދެމެދު ސީދާ ވައިގެ ދަތުރުތައް އަލުން ފަށަން ނިންމައިފި އެވެ.

އެ ގޮތުން ބަންގްލަދޭޝްގެ ގައުމީ އެއާލައިން، ބީމާން ބަންގްލަދޭޝް އެއާލައިންސް އިން ބަންގްލަދޭޝްގެ ވެރިރަށް ޑާކާ އާއި ޕާކިސްތާނުގެ އެންމެ ބޮޑު ސިޓީ ކަމަށްވާ ކަރާޗީއާ ދެމެދު ސީދާ ދަތުރުތައް ފެށުމަށް ވަނީ ނިންމައިފަ އެވެ. 2026 ވަނަ އަހަރުގެ ޖެނުއަރީ 29 ގައި ފަށާ މި ދަތުރުތަކަކީ، ދިހަ އަހަރަށް ވުރެ ގިނަ ދުވަހުގެ މެދުކެނޑުމަކަށް ފަހު ދެ ގައުމުގެ ދެމެދުގައި ގާއިމުކުރެވޭ ސީދާ ވައިގެ ދަތުރުފަތުރުގެ ގުޅުމެއް ކަމަށް ކަމާބެހޭ އޮފިޝަލުން ބުދަ ދުވަހު ހާމަކުރި އެވެ.

ބީމާން ބަންގްލަދޭޝް އިން ނެރުނު ބަޔާނެއްގައިވާ ގޮތުން، ފުރަތަމަ މަރުހަލާގައި ޑާކާ-ކަރާޗީ ރޫޓުގައި ހަފުތާއަކު ދެ ދަތުރު ކުރާނެ އެވެ. އެއީ ކޮންމެ ބުރާސްފަތި އަދި ހޮނިހިރު ދުވަހަކު އެވެ.

މިހާރު ދެ ގައުމުގެ ދެމެދުގައި ދަތުރުކުރާ ފަރާތްތަކުން ބޮޑަށް ބަރޯސާވަނީ ދުބާއީ ނުވަތަ ދޯހާ ފަދަ ސިޓީތައް މެދުވެރިކޮށް ކުރާ ޓްރާންސިޓް ދަތުރުތަކަށެވެ.

ބީމާން އެއާލައިންސްގެ އޮފިޝަލުން ބުނި ގޮތުގައި، ޑާކާ އާއި ކަރާޗީއާ ދެމެދު ހުންނަ 2,370 ކިލޯމީޓަރުގެ މި ދަތުރުގައި ބޯޓު އުދުހޭނީ އިންޑިއާގެ ވައިގެ ސަރަހައްދުގެ މަތިންނެވެ. ނަމަވެސް، މި ދަތުރުތަކަށް އިންޑިއާގެ ވައިގެ ސަރަހައްދު ބޭނުންކުރުމުގެ ހުއްދަ ނިއުދިއްލީން މިހާތަނަށް ލިބިފައިވޭތޯ އަދި ސާފެއް ނުވެއެވެ.

އެއާލައިނުން ބުނި ގޮތުގައި، 2012 ވަނަ އަހަރުގެ ފަހުން ފުރަތަމަ ފަހަރަށް ފަށާ މި ސީދާ ދަތުރުތަކާ ގުޅޭގޮތުން ޕާކިސްތާނުގެ ކަމާބެހޭ ފަރާތްތަކާ އެކު މަޝްވަރާކުރާތާ މިހާރު މަސްތަކެއް ވެއްޖެ އެވެ.

ދެ ގައުމުގެ ދެމެދުގައި ސީދާ ދަތުރުތައް މި ފަށަނީ، 2024 ވަނަ އަހަރު ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ ސަރުކާރު ވެއްޓުމާ ގުޅިގެން، ބަންގްލަދޭޝާއި ޕާކިސްތާނުގެ ގުޅުން ވަރަށް ބޮޑަށް ބަދަހިވަމުންދާ ދަނޑިވަޅެއްގަ އެވެ. ގިނަ އަހަރުތަކެއްގެ ނުތަނަވަސް ކަމަށް ފަހު، ޑާކާ އާއި އިސްލާމްއާބާދުން ދަނީ ޑިޕްލޮމެޓިކް، ވިޔަފާރި އަދި އިޖުތިމާއީ ގުޅުންތައް އަލުން ބަދަހިކުރުމަށް ފިޔަވަޅުތަކެއް އަޅަމުންނެވެ. ބަންގްލަދޭޝް އަކީ 1971 ވަނަ އަހަރު ޕާކިސްތާނުގެ ކިބައިން މިނިވަންކަން ހޯދި ގައުމެކެވެ.

މި ދަތުރުތައް ފެށުމަށް ޕާކިސްތާނުގެ ސިވިލް އޭވިއޭޝަން އޮތޯރިޓީން މިހާރު ވަނީ ރަސްމީކޮށް ހުއްދަ ދީފައެވެ. މީގެ ތެރޭގައި ޕާކިސްތާނުގެ ވައިގެ ސަރަހައްދުގައި ކަނޑައެޅިފައިވާ ވަކި މަގުތަކަކުން ދަތުރުކުރުމުގެ ހުއްދަ ވެސް ހިމެނެ އެވެ.

މި ދަތުރުތަކުގައި ބޭނުން ކުރާނީ އެންމެ ޒަމާނީ ބޯޓުފަހަރާއި ތަޖުރިބާކާރު ކްރޫއިން ކަމަށްވެސް އެއާލައިނުން ބުންޏެވެ.

މިހާރު ބަންގްލަދޭޝުން ޕާކިސްތާނަށް ދަތުރުކުރާ އެއާ އެރޭބިއާ، ގަލްފް އެއާ، ފްލައި ދުބާއީ، އެމިރޭޓްސް، ގަތަރު އެއާވޭސް އަދި ތައި އެއާވޭސް ފަދަ އެއާލައިންތަކުން ދަތުރުކުރުމަށް، ޓްރާންސިޓް ވަގުތާއެކު އެވްރެޖްކޮށް 8 ގަޑިއިރާއި 12 ގަޑިއިރާ ދެމެދުގެ ވަގުތެއް ހޭދަވެ އެވެ. ބައެއް އެއާލައިންތަކުގައި މި ދަތުރުގެ ދިގުމިން 18 ގަޑިއިރާއި 22 ގަޑިއިރަށް ވެސް އަރަ އެވެ.

ދެ ގައުމުގެ ދެމެދުގައި ސީދާ ދަތުރުތައް ފެށުމުގެ ރޭވުން އެންމެ ފުރަތަމަ އިއުލާނު ކުރީ މިދިޔަ އަހަރުގެ އޮގަސްޓް މަހު ޕާކިސްތާނުގެ ޑެޕިއުޓީ ޕްރައިމް މިނިސްޓަރު އަދި ފޮރިން މިނިސްޓަރު އިސްހާގް ދާރް ޑާކާ އަށް ކުރެއްވި ރަސްމީ ދަތުރުފުޅުގަ އެވެ. މިއީ ވޭތުވެދިޔަ ދިހަވަރަކަށް އަހަރު ތެރޭގައި ޕާކިސްތާނުގެ މަތީ ފަންތީގެ އޮފިޝަލަކު ބަންގްލަދޭޝަށް ކުރެއްވި ފުރަތަމަ ދަތުރުފުޅެވެ.