މޮސްކޯ އަށް އެމެރިކާގެ ސިއްރުތައް ވިއްކުމުގެ ކުށުގައި އުމުރަށް ޖަލަށް ލާފައި ހުރި ސީ.އައި.އޭ ގެ ކުރީގެ އޭޖެންޓް އެލްޑްރިޗް އޭމްސް ޖަލުގައި ހުއްޓާ މަރުވެއްޖެ

މޮސްކޯ އަށް އެމެރިކާގެ ސިއްރުތައް ވިއްކައި، އެއާއެކު އެމެރިކާގެ އެތައް ޖާސޫސުންނެއްގެ ފުރާނަ ގެއްލުމުގެ ސަބަބުން އުމުރަށް ޖަލަށް ލާފައި ހުރި ސީ.އައި.އޭ ގެ ކުރީގެ އޭޖެންޓް އެލްޑްރިޗް އޭމްސް، ޖަލުގައި ބަންދުކޮށްފައި ހުއްޓާ މަރުވެއްޖެ ކަމަށް އެމެރިކާގެ ކަމާބެހޭ އިދާރާތަކުން ހާމަކޮށްފިއެވެ.

ޖަލުތަކާ ބެހޭ އިދާރާއިން މައުލޫމާތު ދޭ ގޮތުގައި އޭނާ މަރުވިއިރު އުމުރަކީ 84 އަހަރެވެ.

އޭމްސް އަކީ ސީ.އައި.އޭ ގެ ކައުންޓަރ އިންޓެލިޖެންސް އެނަލިސްޓެއްގެ ގޮތުގައި 31 އަހަރު ވަންދެން މަސައްކަތް ކުރި މީހެކެވެ. އޭނާ އާއި އޭނާގެ އަންހެނުން ރޮސާރިއޯގެ މައްޗަށް ކުށް ސާބިތުވީ 1985 އާއި 1993 އާ ދެމެދު ސޯވިއެޓް ޔޫނިއަނަށް ސިއްރު މައުލޫމާތު ވިއްކި މައްސަލައިގަ އެވެ. މި މައުލޫމާތުތަކުގެ ބަދަލުގައި އޭނާއަށް 2.5 މިލިއަން ޑޮލަރަށްވުރެ ގިނަ ފައިސާ ލިބިފައިވާއިރު، މީގެ ސަބަބުން އެމެރިކާގެ ސިއްރު މިޝަންތަކަށް ބުރޫ އަރައި، އެތައް ބައެއްގެ ފުރާނަ ގެއްލިގެން ދިޔަ އެވެ.

ސީ.އައި.އޭ ގެ ސޯވިއެޓް ގޮތްޕާ ބެހޭ ބައިގެ އިސްވެރިއަކަށް ހުރި އޭމްސް ވަނީ އެމެރިކާ އަށް ޖާސޫސުކޮށްދެމުން ދިޔަ އެތައް ރަޝިޔާ ރައްޔިތުންގެ މައުލޫމާތު ކްރެމްލިން އަށް ފޯރުކޮށްދީފަ އެވެ.

އެ ދުވަސްވަރު އެ ދެމަފިރިން އުޅެމުންދިޔަ މުއްސަނދި ދިރިއުޅުމުގެ ސަބަބުން ގިނަ ބައެއްގެ ޝައްކު އެމީހުންނަށް އަމާޒުވި އެވެ. އެގޮތުން ސްވިޒަލޭންޑްގެ ބޭންކު އެކައުންޓްތަކުގައި ގިނަ އަދަދެއްގެ ފައިސާ ބެހެއްޓުމާއި، އަގުބޮޑު ޖެގުއާ ކާރެއް ދުއްވުމުގެ އިތުރުން ކްރެޑިޓް ކާޑު ބިލްތަކަށް އަހަރަކު 50،000 ޑޮލަރު ހޭދަކުރަމުން ދިޔަކަން ފާހަގަކުރެވުނެވެ.

ފެޑަރަލް ޕްރޮސެކިއުޓަރުން ބުނާ ގޮތުގައި، ސޯވިއެޓް ޔޫނިއަން ރޫޅިގެން ދިޔުމަށް ފަހު ވެސް އޭމްސް ދިޔައީ ރަޝިޔާ އަށް މައުލޫމާތު ވިއްކަމުންނެވެ. އޭނާ ކުރަމުންދިޔަ މި މަސައްކަތް ފަޅާއެރީ 1994 ވަނަ އަހަރެވެ.

ސޯވިއެޓް ޔޫނިއަން އާ ބެހޭ ގޮތުން އޭމްސް ފޯރުކޮށްދިން ދޮގު މައުލޫމާތުތަކުގެ ސަބަބުން، ސީ.އައި.އޭ އިން ވަނީ ސޯވިއެޓް އަސްކަރީ ގާބިލުކަމާ ބެހޭގޮތުން އޭރުގެ ރައީސުން ކަމަށްވާ ރޮނަލްޑް ރޭގަން އާއި ޖޯޖް އެޗް.ޑަބްލިއު ބުޝް އަދި އެހެނިހެން އިސްވެރިންނަށް އޮޅުން އަރާފަދަ މައުލޫމާތުތައް ތަކުރާރުކޮށް ދީފައެވެ.

އޭމްސްގެ މައްސަލައިގެ ތަހުގީގާ ގުޅިގެން ވޮޝިންގޓަނާއި މޮސްކޯއާ ދެމެދު އޮތް ގުޅުމަށް ބޮޑު ނުތަނަވަސްކަމެއް އައެވެ. އޭރު ދެ ގައުމުން ދިޔައީ 1991 ގައި ސޯވިއެޓް ޔޫނިއަން ރޫޅުމަށްފަހު ގުޅުން އާންމު ހާލަތަކަށް ގެނައުމަށް މަސައްކަތް ކުރަމުންނެވެ. 

ކުރީގެ ރައީސް ބިލް ކްލިންޓަން މި މައްސަލައަކީ ނުހަނު ސީރިއަސް މައްސަލައެއްގެ ގޮތުގައި ސިފަކުރެއްވިއިރު، ރަޝިޔާ އިން މިކަން މާ ބޮޑު ކަމަކަށް ނުހަދަ އެވެ. ނަމަވެސް، އޭމްސް އާ ގުޅުން އޮތް ކަމަށް ތުހުމަތު ކުރެވުނު ރަޝިޔާގެ އިސް ޑިޕްލޮމޭޓެއް ކަމަށްވާ އެލެގްޒެންޑަރ ލިސެންކޯ އަނބުރާ ގެންދަން ރަޝިޔާ އިން ދެކޮޅު ހެދުމުން، ވައިޓް ހައުސް އިން ވަނީ އޭނާ ގައުމުން ބޭރުކޮށްފަ އެވެ.

ޖާސޫސީ ދާއިރާ ގައި މިފަދަ ބޮޑެތި މައްސަލަތަކަކީ އާންމު ކަންކަމެވެ. މީގެ ކުރިން 1953 ވަނަ އަހަރު، އެޓޮމިކް ސިއްރުތައް މޮސްކޯ އަށް ވިއްކި ކަމުގެ ތުހުމަތުގައި ޖޫލިއަސް އާއި އެތެލް ރޮސެންބާގް ގެ މައްޗަށް މަރުގެ އަދަބު ތަންފީޒު ކުރެވުނެވެ. ހަމަ އެހެންމެ، ނޭވީގެ ކޮމިއުނިކޭޝަން އެކްސްޕާޓެއް ކަމަށްވާ ޖޯން ވޯކާ ވެސް ވަނީ 30 އަހަރު ވަންދެން ސޯވިއެޓުންނަށް ސިއްރު މައުލޫމާތު ފޯރުކޮށްދިން ކަމަށް އިއުތިރާފުވުމުން އުމުރަށް ޖަލަށް ލާފައެވެ.