ރަޝިޔާ ސަރުކާރުގެ އިސްވެރިންނާއި، އެމެރިކާ ސަރުކާރުގެ އިސްވެެރިންނާ ދެމެދު ކޮށްފައިވާ ފޯނު ކޯލެއް ލީކު ކޮށްފައި ވަނީ، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށް ކުރަމުން އަންނަ މަސައްކަތަށް ހުރަސް އެޅުމަށް ކަމަށް ރަޝިޔާ އިން ބުނެފި އެވެ.

ބްލޫމްބާގް ނިއުސް އިން ރިޕޯޓު ކޮށްފައިވާ ގޮތުގައި އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބޫ ސްޓީވް ވިޓްކޮފް އާއި، ރަޝިޔާގެ ރައީސް ވުލަޑިމިއަރ ޕުޓިންގެ ޚާއްސަ އެޑްވައިޒަރު ޔޫރޯ އުޝަކޮވް، މިއަހަރުގެ އޮކްޓޫބަރު މަހުގެ 14 ވަނަ ދުވަހު ފޯނުން ގުޅުއްވައި ވަނީ މަޝްވަރާ ކުރައްވައިފަ އެވެ.

އެ ފޯނު ކޯލުގައި ޔުކްރެއިންގެ ހަނގުރާމަ ހުއްޓުމަށް ކުރަމުން އަންނަ މަސައްކަތާއި، އެކަމުގައި އެކުލަވާލާ ޕްލޭންގައި އެކުގައި މަސައްކަތް ކުރަން ޖެހޭ ކަމަށް ވިޓްކޮފް ވިދާޅުވެފައިވާ ކަމަށް ރިޕޯޓު ކޮށްފައިވެ އެވެ. އަދި ރަޝިޔާގެ ރައީސް ޕުޓިންގެ ފަރާތްޕުޅުން، އެމެރިކާގެ ރައީސް ޓްރަމްޕް އަށް އެކަން ހިއްސާ ކުރަން ޖެހޭ ކަމަށް ވެސް ވިޓްކޮފް ވިދާޅުވެފައިވާ ކަމަށް ބުނެފައިވެ އެވެ.

ބްލޫމްބާގް އިން ބުނެފައި ވަނީ އެ ފޯނު ކޯލުގެ ރިކޯޑިން އެ ނިއުސް އެޖެންސީ އިން އަޑު އަހާފައިވާ ކަމަށާއި، އަދި އެ ކޯލުގެ ޓްރާންސްކްރިޕްޓެއް ވެސް ޝާއިއު ކޮށްފައިވާ ކަމަށެވެ. އެކަމާ ގުޅިގެން ރަޝިޔާގެ ރިޔާސީ ގަނޑުވަރު ކްރެމްލިން އިން ބުދަ ދުވަހު ބުނެފައި ވަނީ، ދެ ޤައުމުގެ ސަރުކާރުގެ އިސް އޮފިޝަލުންގެ ފޯނު ކޯލު ލީކޮ ކޮށްފައި ވަނީ މިހާރު ކުރިއަށްދާ ސުލްޙަ ޤާއިމު ކުރުމުގެ މަޝްވަރާ ތަކަށް ހުރަސް އެޅުމަށް ކަމަށެވެ.

އެ ކޯލު ލީކުވީ ކީއްވެގެންތޯ ސުވާލު ކުރުމުން، ރަޝިޔާގެ ސްޓޭޓް ޓީވީގައި އުޝަކޮވް ވިދާޅުވެފައި ވަނީ، އެކަން ކުރީ ހަނގުރާމަ ހުއްޓާލުމުގެ މަޝްވަރާ އާއި، އެއްބަސްވުން ޤާއިމު ކުރުމަށް ހުރަސް އެޅުމަށް ކަމަށެވެ. އަަދި އެއީ ގުޅުންތައް ޤާއިމު ކުރުމަށް ކުރެވިފައިވާ ކަމެއް ކަމަށް ޤަބޫލު ނުކުރެއްވޭ ކަމަށް ވެސް އުޝަކޮވް ވިދާޅުވެފައިވެ އެވެ.

ލީކު ވެފައިވާ އެ ފޯނު ކޯލުން ފެންނަމުން ދަނީ ޔުކްރެއިންގެ މައްސަލައިގައި ސުލްޙަ ޤާއިމު ކުރުމަށް އެމެރިކާ އާއި ރަޝިޔާއާ ދެމެދު ކުރިއަށްދާ ސިއްރު މަޝްވަރާ ތަކުގެ ތަފްސީލް ކަމަށް ރިޕޯޓު ކޮށްފައިވެ އެވެ. އަދި އެ ފޯނު ކޯލު ލީކުވެފައިވާއިރު، އެކަމުގެ ސަބަބުން ދެ ޤައުމުގެ ދެ މެދުގައި އިތުބާރު ބިނާ ކުރުމަށް ގޮންޖެހުން ތަކެއް ކުރިމަތި ވެދާނެ ކަމަށް ތަޖުރިބާ ކާރުން ވަނީ ފާހަގަ ކޮށްފަ އެވެ.

މީގެ އިތުރުން އެކަމުން ދައްކުވައި ދެނީ އެމެރިކާގެ އިސް އޮފިޝަލުން، ރަޝިޔާއާ ސީދާ ވާހަކަ ދައްކައި މައްސަލަ ޙައްލު ކުރުމަށް މަސައްކަތް ކުރަމުންދާކަން ކަމަށް ވެސް ބައެއް ފަރާތްތަކުން ބުނެފައިވެ އެވެ. އެ ފޯނު ކޯލު ލީކުވެފައިވާއިރު، އެކަމުގެ ސަބަބުން މިހާރު ކުރަމުން އަންނަ މަސައްކަތަށް އެކަމުގެ ނޭދެވޭ އަސަރު ކުރުމަކީ ކަންބޮޑުވާ ކަމެއް ކަމަށް ވެސް، ކްރެމްލިން އިން ބުނެފައިވެ އެވެ.

މި ފޯނު ކޯލު ލީކުވެފައި މި ވަނީ، ޔުކްރެއިންގެ މައްސަލައިގައި އެމެރިކާގެ ރައީސް ޓްރަމްޕް، ރަޝިޔާ އަށް ފައިދާވާ ގޮތަށް ކަންކަން ނިންމުމަށް މަސައްކަތް ކުރަމުންދާ ކަމަށް ބުނެ، ޓްރަމްޕް އާއި އެމެރިކާގެ ސަރުކާރަށް ވެސް ފާޑު ކިޔުންތައް ކުރިމަތިވެފައިވާ ވަގުތެއްގަ އެވެ.