ސޯޝަލް ހައުސިން މަޝްރޫއު ހިންގަން ނިންމާފައިވާ ބިން ތަކުގައި ލަގްޒަރީ އެޕަރޓްމަންޓުތައް އަޅަން ނިންމުމަކީ ރައްޔިތުންނަށް ދެވޭ ނިކަމެތިކަމެއް: ޔޫނިއަން
ގެދޮރުވެރިޔާގެ ފުރަތަމަ ސްކީމްގެ 7،000 ފްލެޓާއި ދެވަނަ ސްކީމްގެ 8،000 ފްލެޓަށް އެލޮކޭޓް ކުރި ބިން ލަގްޒަރީ އެޕަރޓްމަންޓަށް ބަދަލު ކުރުމަކީ ރައްޔިތުންގެ ހައްގުތަކަށް އަރައިގަތުން ކަމަށް ޔޫނިއަނުން ބުނެފައިވޭ.
ފަހި ޔޫނިއަނާއި އުތުރުތިލަފަޅު ޔޫނިއަން ގުޅިގެން ބޭއްވި ނޫސްވެރިންގެ ބައްދަލުވުމުގެ ތެރެއިން | ރާއްޖެ އެމްވީ
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ސޯޝަލް ހައުސިން މަޝްރޫއު ހިންގަން ނިންމާފައިވާ ބިން ތަކުގައި ރައީސް ޑރ.މުހައްމަދު މުއިއްޒުގެ ސަރުކާރުން ލަގްޒަރީ އެޕަރޓްމަންޓުތައް އަޅަން ނިންމައި، ވިއްކަން އިއުލާން ކުރި ކުރުން ބަލައި ނުގަންނާނެ ކަމަށް ފަހި ޔޫނިއަން އަދި އުތުރުތިލަފަޅު ޔޫނިއަން އިން ބުނެފި އެވެ.
ސޯޝަލް ހައުސިން ސްކީމްތަކުން ފްލެޓް ލިބޭ މީހުންގެ ހައްގުގައި މަސައްކަތްކުރާ އަމިއްލަ ޖަމިއްޔާ، ފަހި ޔޫނިއަނާއި އުތުރުތިލަފަޅު ޔޫނިއަން ގުޅިގެން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ފަހި ޔޫނިއަންގެ ރައީސް އިބްރާހިމް ނޫރައްދީން ވިދާޅުވީ ގެދޮރުވެރިޔާގެ ދެވަނަ ސްކީމްގައި ހުޅުމާލެއިން 8،000 ފްލެޓު ކުރިމަތިލި 21،348 އާއިލާގެ ފޯމްތައް އިވިލުއޭޓްކޮށް ފްލެޓު ލިބިފައިވާ ފަރާތްތައް ކަނޑައަޅަން ޖެހޭ ކަމަށެވެ.
ނަމަވެސް ބޯހިޔާވަހިކަމަށް ރައްޔިތުން ކުރަމުންދާ އާދޭހަށް މިސަރުކާރުން އިހުތިރާމް ނުކުރާ ކަމަށާއި، އެމަންޒަރު ފެންނަމުންދާ ކަމަށް އޭނާ ވިދާޅުވި އެވެ.
ސޯޝަލް ހައުސިން މަޝްރޫއުތައް ހިންގަން ނިންމާފައިވާ ބިން ތަކުގައި މިސަރުކާރުން ލަގްޒަރީ އެޕަރޓްމަންޓުތައް އަޅަން ނިންމާފައިވާކަން ފާހަގަކުރައްވައި އިބްރާހިމް ނޫރައްދީން ވިދާޅުވީ އެއީ ރައްޔިތުން ކުރާ އާދޭސް ބޮލާލާ ޖެހުން ކަމަށާއި، އެކަމުގެ ސަބަބުން އާއްމު ރައްޔިތު މީހާ އިތުރަށް ނިކަމެތިވާނެ ކަމަށެވެ. މިފަހުން ދޫކުރި 4،000 ހައުސިން ޔުނިޓަށް ވެސް އެޑްވާންސް ފައިސާ ދައްކަން ޖެހުމުން އެފައިސާ ނުދެއްކިގެން ވެސް ރައްޔިތުން ވަރަށް ދަތީގައި އުޅުނު ކަމަށް އޭނާ ވިދާޅުވި އެވެ.
މިސަރުކާރުން ނިންމާފައިވަނީ ކުރީ ސަރުކާރުގެ ފުރަތަމަ ސްކީމްގެ 7000 ފްލެޓާއި ދެވަނަ ސްކީމްގެ 8،000 ފްލެޓު އެޅުމަށް އެލޮކޭޓް ކޮށްފައި ހުރި ހުރިހާ ބިންތަކެއް ލަގްޒަރީ އެޕަރޓްމަންޓް އެޅުމުގެ ގޮތުން ވިއްކާލުމަށް. އެއްގޮތަކަށް ވެސް އަޅުގަނޑުމެން ޔޫނިއަންތަކުން ބަލައިގަންނާނެ ކަމެއް ނޫފަހި ޔޫނިއަންގެ ރައީސް އިބްރާހިމް ނޫރައްދީން
އެއްވެސް މީހެއްގެ ހައްގަކަށް އަރައި ނުގަންނާނެ ކަަމަށް ރައީސް މުއިއްޒު ވިދާޅުވެފައިވާތީ އެކަމަށް އިޝާރާތް ކުރައްވައި އިބްރާހިމް ނޫރައްދީން ވިދާޅުވީ ގެދޮރުވެރިޔާ 4،000 ފްލެޓުތަކުން ފްލެޓު ލިބިފައިވާ ބައެއް މީހުންގެ އަތުން އެއްވެސް މައްސަލައެއް ކުރިމަތިނުވެ، ފްލެޓު އަތުލާފައިވާ ކަމަށެވެ. މިއީ ބަލައިގަނެވޭނެ ކަމެއް ނޫން ކަމަށާއި، ފްލެޓުތައް ނުހިފަހައްޓައި ދޫކޮށްލުމަށް އޭނާ ގޮވާލެއްވި އެވެ.
މީގެ އިތުރުން އޭނާ ވިދާޅުވީ ޝަރުތު ހަމާވާ ކަމަށް ނިންމައި، ނެރިފައިވާ ފްލެޓު ލިސްޓުގައި ހިމެނޭ އެއްވެސް މީހަކަށް އަލުން ފްލެޓަށް ފޯމް ހުށަހަޅަން ނުޖެހޭނެ ކަމަށް ރައީސް މުއިއްޒު ވިދާޅުވެފައިވާ ކަމަށެވެ.
އެހެންކަމުން އެގޮތަށް އަމަލު ކުރަން ޖެހޭ ކަމަށާއި، ގެދޮރުވެރިޔާގެ 4،000 ފްލެޓަށް ކުރިމަތިލި މީހުންގެ ތެރެއިން ސްކީމުގައި ޝަރުތު ހަމަވެ، ފްލެޓު ލިބިފައިނުވާ 9،763 މީހުންގެ ފޯމުތަކަށް އިހުތިރާމް ކުރުމަށް ވެސް އޭނާ ގޮވާލެއްވި އެވެ.
