ކުރީ ސަރުކާރުގައި މާލެ ސަރަހައްދުން ގޯތީގެ ރަޖިސްޓްރީ ދޫކޮށްފައިވާ ހުރިހާ ރައްޔިތުންގެ ބޯހިޔާވަހިކަން ކަށަވަރުކޮށް ދިނުމަށް އަނެއްކާ ވެސް ގޮވާލައިފި
ފަހި ޔޫނިއަނާއި އުތުރުތިލަފަޅު ޔޫނިއަނުން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ މިސަރުކާރުން ކުރީ ސަރުކާރުގެ ބޯހިޔާވަހިކަމުގެ މަޝްރޫއުތައް މަޑުޖައްސައި ރައްޔިތުންގެ ހައްގުތަކަށް ހުރަސް އަޅަމުންދާ ކަމަށް ބުނެފައި. އުތުރުތިލަފަޅު ޔޫނިއަނުގެ ސްޕޯކް ޕަރސަން ސޮބާހު ރަޝީދު ވިދާޅުވީ މާލެ ސަރަހައްދުގައި އޮތް ފަޅުތައް ތަރައްގީ ކުރުމުގެ ބަދަލުގައި މާދުރުގައި އޮންނަ ފުށިދިއްގަރުފަޅު ރަސްމާލެ ނަމުގައި ތަރައްގީ ކުރުން ނުވިސްނޭ ކަމަށް.
ނޫސްވެރިންގެ ބައްދަލުވުމުގައި އުތުރުތިލަފަޅު ޔޫނިއަންގެ ސްޕޯކް ޕަރސަން ސޮބާހު ރަޝީދު ވާހަކަ ދައްކަވަނީ | ރާއްޖެ އެމްވީ
ކުރީގެ ރައީސް އިބްރާހިމް މުހައްމަދު ސޯލިހު ސަރުކާރުގައި މާލެ ސަރަހައްދުން ގޯތީގެ ރަޖިސްޓްރީ ދޫކޮށްފައިވާ ހުރިހާ ރައްޔިތުންގެ ބޯހިޔާވަހިކަން ކަށަވަރުކޮށް ދިނުމަށް ފަހި ޔޫނިއަން އަދި އުތުރުތިލަފަޅު ޔޫނިއަން އިން އަނެއްކާ ވެސް ގޮވާލައިފި އެވެ.
ސޯޝިއަލް ހައުސިންގ ސްކީމްތަކުން ފްލެޓް ލިބޭ މީހުންގެ ހައްގުގައި މަސައްކަތްކުރާ އަމިއްލަ ޖަމިއްޔާ، ފަހި ޔޫނިއަނާއި ގުޅިގެން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އުތުރުތިލަފަޅު ޔޫނިއަންގެ ސްޕޯކް ޕަރސަން ސޮބާހު ރަޝީދު ވިދާޅުވީ ކުރީ ސަރުކާރުގައި ބޯހިޔާވަހިކަން ކަށަވަރުވި އާއްމު ރައްޔިތުންގެ ބޯހިޔާވަހި ކަމަށް މިސަރުކާރުން ހުރަސް އަޅަމުންދާ ކަމަށާއި، ރައީސް ޑރ.މުހައްމަދު މުއިއްޒު ތަކުރާރުކޮށް ވެވަޑައިގެންނެވި ވައުދާ ހިލާފު ވެފައިވާ ކަމަށެވެ.
ކުރީ ސަރުކާރުގެ ބޯހިޔާވަހިކަމުގެ މަޝްރޫއުތަކަށް އިޝާރަތް ކުރައްވައި ސޮބާހު ވިދާޅުވީ އުތުރުތިލަފަޅާއި، ހުޅުމާލެ ފޭސް-3 އަދި ގިރާވަރުފަޅު ތަރައްގީކޮށް ބޯހިޔާވަހިކަމުގެ މަޝްރޫއުތައް ކުރިއަށް ގެންދަން ޖެހޭ ކަމަށެވެ.
ނަމަވެސް މިމަޝްރޫއުތައް މަޑު ޖެއްސުމަށްފަހު މާލެއާ މާދުރުގައި އޮތް ފުށިދިއްގަރުފަޅު ހިއްކައި، ރަސްމާލެ ނަމުގައި އެތަން ތަރައްގީ ކުރާ ކުރުން ނުވިސްނޭ ކަމަށް އޭނާ ވިދާޅުވި އެވެ.
އުތުރުތިލަފަޅާ ހުޅުމާލެ ފޭސް-3 ގިރާވަރުފަޅާ މިތަންތަނުން 14300 ގޯތި ދިނުމުގެ ކެޕޭސިޓީ އެބަހުރި. އަނެއްކާ މިދެންނެވި ތަންތަނަކީ މާލެ އާ އެއްކޮށް ހުޅުމާލެ ގުޅާލެވިފައި މިއޮންނަހެން ފާލަމަކުން ނުވަތަ ބްރިޖަކުން ގުޅާލެވޭނެ. މިސަރަހައްދުގައި ވަރަށް ފަސޭހައިން މީހުންނަށް ދަތުރުފަތުރު ކުރުމުގެ ކަންތައްތައް ވެސް ފަސޭހައިން ކުރެވެން އޮތް ތަންތަން މިއީ. ދެން ހުރި ފަޅުތަކަށް ބަލާ ކަމަށްވަންޏާ އަދި މުސްތަގުބަލުގައި މިކަން ފުޅާވެގެން ދާ ދިއުމުގައި ވެސް ރައްޔިތުން ބޯހިޔާވަހިކަމަށް ހިއްކާ ގުޅާލެވޭނެ އެތައް ބައިވަރުފަޅުތަކެއް މިދިމާލުގައި އޮއްވާ ވާދޫ ކަނޑު ހުރަސްކޮށްފައި ގަދަ ކަނޑެއްގެ ވާހަކަ އަޅުގަނޑުމެން މިދަންނަވަނީ. އެކަހެރިކޮށް މާދުރުގައި އޮންނަތަނަކަށް ދިވެހި ރައްޔިތުން ގެންގޮސް އަޅާލަން ވެެގެން މިސަރުކާރުން ވިސްނުން މިގެންގުޅޭ ސަބަބު އަޅުގަނޑުމެންނަށް ނޭނގޭ.އުތުރުތިލަފަޅު ޔޫނިއަންގެ ސްޕޯކް ޕަރސަން ސޮބާހު ރަޝީދު
ސޮބާހު ވިދާޅުވީ ކުރީ ސަރުކާރުގައި ގޯތީގެ ރަޖިސްޓްރީ ހަވާލު ކޮށްފައިވާ ރައްޔިތުންގެ ބޯހިޔާވަހިކަން ކަށަވަރު ކޮށްދޭން ޖެހޭ ކަމަށާއި، އެ ރައްޔިތުންނަށް ގޯތި ލިބުނު ސަރަހައްދުތައް ތަރައްގީ ކޮށްދޭން ޖެހޭ ކަމަށެވެ. އަދި އެ ރައްޔިތުންނަށް ނިކަމެތިކަން ލިބޭ ގޮތަށް މުޅިން އައު މަޝްރޫއެއް ނުވަތަ އައު ހުވަފެނެއް ދެއްކުމުގެ ބޭނުމެއް ނެތް ކަަމަށް އޭނާ ވިދާޅުވި އެވެ.
