2025 ވަނަ އަހަރު އެކަނިވެސް ވައްކަމުގެ ތެރެއިން 2 ބިލިއަން ރުފިޔާ ގެއްލުނު: މެންބަރު ޣަފޫރު
ޣަފޫރު ވިދާޅުވީ މުޅި ދައުލަތުގެ ތެރޭގައި ވައްކަން ހިނގަމުންދާއިރު އެކަންކަން ނުބެލެނީ ކީއްވެގެންތޯ ސުވާލު އުފެދޭ ކަމަށް. މި ސަރުކާރުން ދައްކާ މަންޒަރާ ކުރާ ކަންކަމާ ބަހާއި އަމަލާ ދިމާ ނުވާ ކަން ފާހަގަކުރައްވާ ޣަފޫރު ވިދާޅުވީ އެމްއެމްޕީއާރްސީ ގެ މައްސަލައިގައި ވެސް ޖަލަށް ދާން ޖެހޭ މަޖިލީހުގެ މެންބަރުން ވެސް އެބަތިބި ކަމަށް. ނަމަވެސް ހުކުމާ ހިސާބުން އެ މެންބަރުންގެ މައްސަލަ ހުއްޓިފައިވާ ކަމަށް ޣަފޫރު ވިދާޅުވި.
މަޖްލިސް ޖަލްސާ އެއް ގައި ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ ވާހަކަ ދައްކަވަނީ
ނިމުނު 2025 ވަނަ އަހަރު އެކަނި ވެސް ވައްކަމުގެ އެކިއެކި މައްސަލަތަކުގައި 2 ބިލިއަން ރުފިޔާ ގެއްލުނު ކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ އެވެ.
ހޯމަ ދުވަހު ދައުރުން ބޭރުން ބޭއްވި މަޖިލީހުގެ ޖަލްސާގައި ޖުވާ ކުޅުމާއި ޖުވާކުޅޭ ތަންތަން ހިންގުމަކީ ޖިނާއީ ކުށެއްގެ ގޮތުގައި ކަނޑައަޅަން ދިވެހި ރާއްޖޭގެ ގާނޫލްއުގޫބާތަށް އިސްލާހު ގެންނަން ވަނީ ހުށަހަޅާފަ އެވެ.
އެ ބިލަށް ބަހުސް ކުރައްވަމުން ޣަފޫރު ވިދާޅުވީ މުޅި ދައުލަތުގެ ތެރޭގައި ވައްކަން ހިނގަމުންދާއިރު އެކަންކަން ނުބެލެނީ ކީއްވެގެންތޯ ސުވާލު އުފެދޭ ކަމަށެވެ. މި ސަރުކާރުން ދައްކާ މަންޒަރާ ކުރާ ކަންކަމާ ބަހާއި އަމަލާ ދިމާ ނުވާ ކަން ފާހަގަކުރައްވާ ޣަފޫރު ވިދާޅުވީ އެމްއެމްޕީއާރްސީ ގެ މައްސަލައިގައި ވެސް ޖަލަށް ދާން ޖެހޭ މަޖިލީހުގެ މެންބަރުން ވެސް އެބަތިބި ކަމަށެވެ. ނަމަވެސް ހުކުމާ ހިސާބުން އެ މެންބަރުންގެ މައްސަލަ ހުއްޓިފައިވާ ކަމަށް ޣަފޫރު ވިދާޅުވި އެވެ.
ޣަފޫރު ވިދާޅުވީ މި ސަރުކާރުން ގާނޫނުން ކަންކަން މަނާ ކުރަނީ ވަކި ބަޔަކަށް ޓާގެޓް ކުރުމަށް ކަމަށެވެ.
އެހެންވީމާ ގާނޫނުން ހުރިހާ ކަމެއް މަނާކޮށްފައި ބޭނުންވާ މީހާ އެކަން ކުރީމާ އެމީހާ ހިފާ ހައްޔަރު ކުރުމަށް ކަންކަން ބަދަލު ކުރަމުން މިދަނީ. މިނޫން އެއްވެސް ކަމެއް ކުރާކަށް ނޫން މިއުޅެނީކީ. މަރުގެ އަދަބުދޭ ގާނޫނު ފާސްކޮށްފި. ކިތައް މީހުންތޯ އެތިބީ މަރުގެ ހުކުމް ތަންފީޒު ކުރަން ޖެހިފަތިބި. އެއްވެސް މީހެއްގެ ހުކުމް ތަންފީޒު ކުރަން ކެރުނުތޯ. ނުކުރޭނެ. އެއީ މިސަރުކާރަކީ. ބޭނުންވާ މީހާ އަތަށް އެރީމަ އެމީހާ އަށް ހޭ އަރުވާލާނެ. އެބޭނުން ފުއްދަމުން މިދަނީ. ވަރަށް ސާފު ވަރަށް ރީތި ކިޔާލީމަ. ކަންކަން މިދަނީ ރިވެތި އުސޫލުގެ މަތިން ބައްޓަން ކުރެވިގެން. އެކަމު އެ އުސޫލެއް މި ގައުމަކަށް ނާދޭ. އެ އުސޫލެއް މިގައުމަކަށް ނާދޭ. މުޅި ގައުމު ފެންނަނީ ވައްކަމާ ފޭރުމާ ރައްޔިތުންނަށް އަނިޔާ ކުރާ މަންޒަރު. މުޅި ގާނޫނު އަސާސީ ބަދަލު ކޮށް ރައްޔިތުންގެ މެދުގައި އޮތް ހަމަޖެހުން ގެއްލުވާލައި، ދައުލަތް ބޭނުން ކޮށްގެން ކޮރަޕްޝަން ހިންގަމުންދާ މަންޒަރު މުޅި ގައުމުން ފެންނަމުން މި ދަނީ،ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ
ޣަފޫރު ވިދާޅުވީ ގާނޫނުލް އުގޫބާތަށް ވެސް މި އިސްލާހު ހުށަހަޅާފައި ވަނީ ހަމަ އެކަނި ވޯޓު ހޯދުމުގެ ބޭނުމުގައި ކަމަށެވެ. އެއީ އެކަމުގައި އިޚުލާސްތެރި ނިޔަތެއް އޮވެގެން ކުރާ ކަމެއް ނޫން ކަމަށް މެންބަރު ވިދާޅުވި އެވެ.
މެންބަރު ވިދާޅުވީ މިހާތަނަށް މި ގައުމުން ކޮށްފަ ހުރި ވައްކަމުން ގައުމަށް ވި ގެއްލުމުގެ ހިސާބު ވެސް ޖަހަން ނޭނގޭ ވަރަށް ކަންކަން ގޮސްފައިވާ ކަމަށެވެ. އެގޮތުން މިދިއަ 2025 ވަނަ އަހަރު އެކަނިވެސް 2 ބިލިއަން ރުފިޔާ ވައްކަމުގެ ތެރެއިން ގެއްލިފައިވާ ކަމަށް މެންބަރު ވިދާޅުވި އެވެ.
ކާކަށްތޯ އެ ބެލުނީ. އެވާހަކަ ދެއްކުނީ. ކޮމިޓީ އަށް ގެންގޮސްލާފަ ކުޑަކޮށް ތަޅުވާލީމަ އާނ ދެން އޭނާ ކުށްވެރިވާހެން ހީވީމަ ދެން އޭނާ އަތުން ވެސް ލާރިކޮޅެއް ދަމައިގަނެފަ މައްސަލަ ވައްޓާލަނީ ޑަސްބިނަށް. މިއީ މިގައުމުގަ ކަންކަން ހިނގާ ގޮތް. މިއަދު މި ހަދާ ގޮތަކީ ގާނޫނު އަސާސީގެ ބާރު ކަނޑުވާލާފަ ރައްޔިތުންނަށް ބިރު ދައްކައިގެން ހުރިހާ ގާނޫނުތަކެއް އެއީ ރައްޔިތުން އަމަލުކުރަން ޖެހޭ އެއްޗެއް ކަމަށް ހަދައި އެ ގާނޫނަށް އަމަލު ނުކޮށް، ބޭނުންވި މީހާ ހިފާ ހައްޔަރު ކުރުމުގެ ސިލްސިލާ ޕްރޮގްރާމްތަކެއް މިގައުމުގައި ހިންގުމުގެ ފަލްސަފާއެއް ފެށިގެން މިދަނީ،ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ
ޣަފޫރު ވިދާޅުވީ ރާއްޖޭގައި މިހާރު ގާނޫނު ހިނގަނީ ގާނޫނު ހިންގަން ބޭނުންވާ މީހާގެ މައްޗަށް އެކަނި ކަމަށެވެ.
އިތުރަށް ވާހަކަދައްކަވަމުން މެންބަރު ވިދާޅުވީ މި ފަހުން ވެސް މުޅި ޖުވާ ކުޅޭ ސްކީމެއްގައި ބައިވެރިވެގެން ރައްޔިތުންގެ މަޖިލީހުގެ މެންބަރުންތަކެއް ވެސް އެކަމުގައި ބައިވެރިވި މަންޒަރު ފެނުނު ކަމަށެވެ. ބައިވެރި ނުވާ މީހުންނަކީ މޮޔައިން ކަމަށް ބުނެ އެވާހަކަ މެންބަރުން ދެއްކެވި އިރު ވެސް ސަރުކާރަށް އެކަމާ ދެކޮޅަށް ޗުއްޕު ވެސް ބުނަން ނުކެރުނު ކަމަށެވެ.
އެއީ ވެސް މަޖިލީހަށް ނިސްބަތްވާ މެންބަރުން އެކަމުގައި ޝާމިލުވާތީ ކަމަށް މެންބަރު ތުހުމަތު ކުރެއްވި އެވެ. އެކަމުން ވެސް ސަރުކާރުގެ ނިޔަތް އިޚުލާސްތެރީ ކިހާ މިންވަރަކަށް ކަން ހާމަ ވާ ކަމަށް ވެސް މެންބަރު ވިދާޅުވި އެވެ.
