ރައީސް މުއިއްޒު މޫނަކަށް ކަނދުރާ އަކަށް ނުބައްލަވާ، ބައްލަވަނީ ވޮލެޓާ ބޭންކް ބެލެންސަށް: މެންބަރު ޒިޔާދު

 ރައީސް ޑރ. މުހައްމަދު މުއިއްޒު މޫނަކަށް ކަނދުރާއަކަށް ނުބައްލަވާ މީހުންނަށް ފިޔަވަޅު އަޅާ ކަމަށް ބުނެ ބަޔަކު ތައުރީފު ކުރާ އިރު އެކަން ގަބޫލު ކުރައްވާ ކަމަށާ ފިޔަވަޅު އެޅުއްވުމުގައި މުއިއްޒު ބައްލަވަނީ ވޮލެޓާ ބޭންކު ބެލެންސަށް ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ. 

ހޯމަ ދުވަހު ދައުރުން ބޭރުން ބޭއްވި ޖަލްސާގައި ޖުވާ ކުޅުމާއި ޖުވާކުޅޭ ތަންތަން ހިންގުމަކީ ޖިނާއީ ކުށެއްގެ ގޮތުގައި ކަނޑައަޅަން ދިވެހި ރާއްޖޭގެ ގާނޫލްއުގޫބާތަށް އިސްލާހު ގެންނަން ވަނީ ހުށަހަޅާފަ އެވެ. 

މި އިސްލާހަށް ބަހުސް ކުރައްވާ މެންބަރު ޒިޔާދު ވިދާޅުވީ ގާނޫނެއް ހެދުމަކީ ވަރަށް ފަސޭހަ ކަމެއް ކަމަށެވެ. އުނދަގުލީ ގާނޫނު ތަންފީޒު ކުރަން ކަމަށް ވެސް މެންބަރު ވިދާޅުވި އެވެ.

މިސާލެއްގެ ގޮތުން މެންބަރު ވިދާޅުވީ ގޭންގު ބިލަށް ވީގޮތް އެންމެންނަށް ވެސް ފެންނަ ކަމަށެވެ. އެގޮތުން ވަރަށް ޒަމާނުން، ވަރަށް ވަރުގަދަ އަށް ވަރަށް ގިނަ ގޮތްގޮތަށް މަޝްވަރާ ކޮށްގެން ބިލު ނިންމާ، ތިން މަސް ނުވެ ރައީސް އިއުލާނު ކުރެއްވީ ރާއްޖޭގައި ގޭންގެއް ނެތް ކަން ކަމަށް މެންބަރު ވިދާޅުވި އެވެ. 

މެންބަރު ވިދާޅުވީ މިދަފަ ގޮތަކަށް ގާނޫނުލް އުގޫބާތަށް ގެންނަ އިސްލާހަށް ފަރުވާ ކުޑަކޮށް، ނުވަތަ އަމިއްލަ އެދުމަކަށް ގާނޫނަށް އަމަލު ނުކޮށްފި ނަމަ މި މުޖުތަމައު އިން މި މައްސަލަ ފިލުވާލަން މާ އުނދަގޫ ވާނެ ކަމަށެވެ. 

މެންބަރު އިތުރަށް ވިދާޅުވީ ބައެއް ބޮޑެތި ކުށްތަކަށް އަދަބު ނުދެވެނީ ގާނޫނުގައި އެކަންކަމަށް އަދަބު ކަނޑައެޅިފައި ނެތުމުން ތޯ ރައްޔިތުން ސުވާލު ކުރާ ކަމަށެވެ. 

އެގޮތުން ރާއްޖެ އަށް ގޭސް އެތެރެކުރާ ސަރުކާރުގެ ކުންފުނި، މޯލްޑިވް ގޭސް އިން ގޭހުގެ ޝިޕްމަންޓަކަށް ދެއްކި އެޑްވާންސް ފައިސާ ވީނުވީއެއް ނޭނގި ގެއްލިފައިވާ އިރު އެކަމަށް ކުރެވުނީ ކޮން ކަމެއްތޯ ވެސް ޒިޔާދު ސުވާލުއުފެއްދެވި އެވެ. އެކަން ވެސް ނުބިލެގެން އުޅެނީ ގާނޫނުގައި އެކަން ލިޔެވިފައި ނެތުމުން ތޯ ވެސް މެންބަރު ސުވާލު އުފެއްދެވި އެވެ. 

އަޅުގަނޑު މި ދަންނަވަނީ މިސާލާއެކު. ހަމަ މާލިއްޔަތު ކޮމިޓީ އިން އަޅުގަނޑުމެން ބެލިން އެއް މައްސަލައިގަ އަޅުގަނޑު އަޑުއެހިން ހަމަ ގައިމުވެސް ބުނާތީ، 250،000 ޑޮލަރެއްގެ ވާހަކަ..... އެ ފައިސާ އެއް ނެތް. މި މައްސަލަ ނުބެލި މިއޮތީ ގާނޫނުލް އުގޫބާތުގަ މި ވާހަކަ ނުލިޔެގެން ތޯ. މި ސުވާލު ރައްޔިތުން ކުރާނީ. އަނެއް ސުވާލަކަށް ވާނީ މޯލްޑިވް ގޭސް ގެ އެމްޑީ އެ 250،000 ޑޮލަރަށް ހެދި ގޮތެއް، ގާނޫނުލް އުގޫބާތު މިކަން ލިޔުނީމަ ވާނެތޯ. މި މައްސަލަ ބެލޭނެތޯ. މި ހިސާބުން މިން އަޅަން ޖެހޭނީ ފުރަތަމަ،

ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު 

ޒިޔާދު ވިދާޅުވީ މިއަދު ރައީސް އަށް ބައެއް ފަރާތްތަކުން ތައުރީފު ކުރަމުން ދަނީ ރައީސް އަކީ މޫނަކަށް ކަނދުރާއަކަށް ނުބައްލަވާ މީހުންނަށް ފިޔަވަޅު އަޅާ ބޭފުޅެއް ކަމަށް ބުނެ ކަމަށެވެ. އެއީ ހަގީގަތެއް ކަމަށާ އޭގެ ބަދަލުގައި ރައީސް ފިޔަވަޅު އެޅުއްވުމުގައި ބައްލަވަނީ މީހުންގެ ވޮލެޓާ ބޭންކް ބެލެންސަށް ކަމަށް ވެސް މެންބަރު ވިދާޅުވި އެވެ. 

ސިނގިރޭޓް ތަކެއް ވަގަށް ނެގި މައްސަލައަށް އެކަނި ބަލާލުމުން ވެސް އެކަން އެނގޭ ކަމަށް މެންބަރު ވިދާޅުވި އެވެ. އެ މައްސަލައިގައި ވެސް ވަކި ބަޔަކަށް ވަކި ގޮތަކަށް ކަންތައް ކުރި މަންޒަރު ފެނިގެން ދިއަ ކަމަށާ އެކަން އެގޮތަށް ވާނެ ކަމަށް ކުރިން ވެސް ބުނި ކަމަށް ޒިޔާދު ވިދާޅުވި އެވެ. 

އެހެން ކަމުން ގައުމުގައި ބައެއް ކަންކަން ވަނީ ކޮންމެހެން ގާނޫނެއް ނެތުމުން ނުވަތަ ގާނޫނުގައި ކަންތައްތަކެއް ބަޔާން ކޮށްފައި ނެތުމުން ނޫން ކަމަށް މެންބަރު ވިދާޅުވި އެވެ. ގާނޫނުލް އުގޫބާތަށް ވެސް ގެނެވޭ އިސްލާހަކީ އިޚުލާސްތެރި އިސްލާހެއް ނަމަ، މޯލްޑިވް ގޭސް އިން ގެއްލުވާލި ފައިސާގެ މައްސަލަ ފަދަ މައްސަލަތައް ހައްލުކުރުމަށް މަސައްކަތް ކުރުމުން ފަށަން ޖެހޭ ކަމަށް މެންބަރު ވިދާޅުވި އެވެ.