ޖުވާ ކުޅުމާއި ޖުވާކުޅޭ ތަންތަން ހިންގުމަކީ ޖިނާއީ ކުށެއްގެ ގޮތުގައި ކަނޑައަޅަން ހުށަހަޅައިފި
ޖުވާކުޅުން ނުވަތަ ޖުވާކުޅޭ ތަނެއް ހިންގައިފި ނަމަ އެއީ ޖިނާޔަތުގެ 4 ވަނަ ދަރަޖައިގެ ކުށެއް ކަމަށް ބިލުގައިވޭ.
ކެސިނޯއެއްގެ ރޫލެޓް ވީލް އަނބުރަނީ
ޖުވާ ކުޅުމާއި ޖުވާކުޅޭ ތަންތަން ހިންގުމަކީ ޖިނާއީ ކުށެއްގެ ގޮތުގައި ކަނޑައަޅަން ދިވެހި ރާއްޖޭގެ ގާނޫން އުގޫބާތައް އިސްލާހު ގެންނަން ހުށަހަޅައިފި އެވެ.
ސަރުކާރުގެ ފަރާތުން ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާ އަށް ހުށަހަޅާ މި ބިލުގެ ބޭނުމެއް ކަމަށް ބުނެފައިވަނީ ޖުވާ ކުޅުމާއި ޖުވާ ކުޅޭ ތަންތަން ހިންގުމަކީ ޖިނާއީ ކުށެއްގެ ގޮތުގައި ކަނޑައެޅުމަށް ކަމުގައެވެ.
ޖުވާ ކުޅުން ކަމަށް ހުށަހަޅާފައިވާ ބިލުގައި ބުނެފައި ވަނީ ވަކި މުބާރާތެއްގައި ނުވަތަ ވަކި ކުޅިވަރެއް ގައި ނުވަތަ ސްކީމެއް ގައި އިލެކްޓްރޯނިކް ކޮށް ނުވަތަ ޖުވާ ކުޅުމުގެ އާލާތެއް މެދުވެރިކޮށް ނުވަތަ ހިނގަމުންދާ ނުވަތަ ކުރިއަށް އޮތް ތަނުގައި ހިނގާނެ ވަކި ކަމެއްގެ މައްޗަށް ބިނާ ކޮށް އެކަމަކުން ނުކުންނާނެ ކަނޑައެޅޭ ވަކި ނަތީޖާ އެއް ލިބިގަތުމުގެ މުގާބިލުގައި މީހަކު އަގެއް ހުރި އެއްޗެއް ދޫކޮށްލުމެވެ.
ނަމަވެސް މުނިފޫހި ފިލުވުމާއި ކުޅިވަރުގެ ބޭނުމުގައި މުބާރާތްތަކުގައި ބައިވެރިވުމާއި މުބާރާތްތަކުން ލިބޭ ފައިސާގެ އިނާމަކީ ޖުވާކުޅުމުގެ ތެރޭގައި ހިމެނޭ ކަމެއް ނޫން ކަމަށް ބުނެފައިވެ އެވެ.
އޭގެ އިތުރުން އެއްވެސް އަގެއް ނުދީ މީހުންގެ މެދުގައި ގުރުއަތުލައިގެން ހޮވޭ ފަރާތްތަކަށް ފައިސާ އާއި އިނާމު ދިނުމަކީ ވެސް ޖުވާ ކުޅުން ނޫން ކަމަށާއި، ޖުވާ ކުޅުމުގެ އާލާތް ކަމުގައި ނުވާ ޑިވައިސް އަކުން ނުވަތަ މެޝިނަކުން ކުޅުން ތެރިންނަށް ލިބޭ ވަނަތަކާއި އިނާމަކީ ވެސް ޖުވާކުޅުން ނޫން ކަމަށް ވަނީ ބިލުގައި ކަނޑައަޅާފަ އެވެ.
ޖުވާކުޅުން ނުވަތަ ޖުވާކުޅޭ ތަނެއް ހިންގައިފި ނަމަ އެއީ ޖިނާޔަތުގެ 4 ވަނަ ދަރަޖައިގެ ކުށެއް ކަމަށް ބިލުގައިވެ އެވެ.
