ނިއުރޭޑިއަންޓް ކޭމްޕްކުރާނީ އޭދަފުށީގައި
28 އޮކްޓޯބަރު 2023 | ހޮނިހިރު 00:21ނިއު ކޭމްޕް ކުރުމުން ދަނޑު ޕްރޮމޯޓްކުރަން ފަސޭހަވާނެ: ކައުންސިލް ރައީސް
2 ވަނަ ޑިވިޝަނުގައި 2022 ވަނަ އަހަރު ވާދަކުރި ނިއުރޭޑިއަންޓްގެ ޓީމް
ދެ ވަނަ ޑިވިޝަނުގައި ކުޅެން ތައްޔާރުވަމުން އަންނަ ނިއުރޭޑިއަންޓް ސްޕޯޓްސް ކުލަބުން ބ. އަތޮޅު އޭދަފުށީގައި ކޭމްޕް ކުރަން ނިންމައިފި އެވެ.
އޭދަފުށީ ކައުންސިލްގެ ރައީސް މުހައްމަދު ފާތިހް ވިދާޅުވީ މިއަދުން ފެށިގެން ހަފުތާއެއްވަންދެން އޭދަފުށީގެ ފުޓްބޯޅަ ސްޓޭޑިއަމުގައި ނިއުރޭޑިއަންޓް ފަރިތަކުރަމުންދާނެ ކަމަށެވެ.
އޭދަފުށީގައި އަޅާފއިވާ ފުޓްބޯޅަ ސްޓޭޑިއަމަކީ ރާއްޖޭގެ ރަށެއްގައި މިހާތަނަށް އެޅި އެންމެ ފުރިހަމަ ސްޓޭޑިއަމެވެ. ކައުންސިލްގެ ރައީސް ފާތިހް ވިދާޅުވީ ނިއު އޭދަފުށީގައި ކޭމްޕް ކުރުމަކީ ޒަމާނީ ވަސީލަތްތަކާއެކު އެޅި އޭދަފުށީ ފުޓްބޯޅަ ސްޓޭޑިއަމް ބޭރުގެ ފަރާތްތަކަށް މާކެޓް ކުރަން ލިބޭ ފަސޭހައަކަށްވާނެ ކަމަށެވެ.
ދެ ވަނަ ޑިވިޝަނުގައި ވާދަކުރަން ތައްޔާރުވި ނަމަވެސް ނިއު އަކީ ރާއްޖޭގެ އެންމެ ކާމިޔާބު އަދި އެންމެ ސަޕޯޓަރުންގެ ގިނަ ފުޓްބޯޅަ ޓީމެވެ. ނިއު ދެ ވަނަ ޑިވިޝަނަށް ތައްޔާރުވަމުންދަނީ އީގަލްސްގެ ކުރީގެ ކޯޗު އަހުމަދު ނިމާދުގެ ބެލުމުގެ ދަށުންނެވެ.
