ފުރަތަމަ ރައްޔިތުންނާ އެކު، މިފަހަރު ތަރުޖަމާނާ އެކު، ދެން ކާކާ އެކު؟

ރައީސް ޑރ. މުހައްމަދު މުއިއްޒު ދިވެހިރާއްޖޭގެ ވެރިކަމާ ހަވާލުވެވަޑައިގެންނެވީ ދިވެހިންނަށް ގެއްލިފައިވާ ގިނަ ހައްގުތަކެއް ހޯއްދަވައި ދެއްވާނެ ކަމަށް ވަޢުދުވެވަޑައިގަތުމަށް ފަހު، ރައްޔިތުންނަށް އެތަކެއް ފޮނި ހުވަފެންތަކެއް ދެއްކެވުމަށް ފަހުގައި އެވެ. ޕޮޑްކާސްޓަކަށް ފަހު ޕޮޑްކާސްޓެއް ގެނެސްދެއްވާ ކަށެއް ނޫނެވެ.

ރައްޔިތުން ހަޅޭފަޅޭ ޖަހަންފެށީމަ ހަމަ ޖައްސާލައްލަނީ މޮޅު ވާހަކަފުޅަ ކުންނެވެ. ސައްހަ މައުލޫމާތާއި ފަހުގެ އަޕްޑޭޓް ދިނުމުގެ ނަމުގައި އަނެއްކާވެސް ތިޔަ ފެއްޓެވީ ޕޮޑްކާސްޓެއްތާ އެވެ. ޕޮޑްކާސްޓަކަށް ފަހު ޕޮޑްކާސްޓެކެވެ. ރައްޔިތުންނަށް ލިބުނު ހަމަ އެކަށްޗެއްވެސް ނެތެވެ. މި ވެރިކަމުގެ ކުރީކޮޅު ފެށި ރައްޔިތުންނާއެކު ޕޮޑްކާސްޓް ހުއްޓިއްޖެ އެވެ. ޕޮޑްކާސްޓު ހުށަހަޅާ މީހާ ލިބުނު މޮޅާ އެކު ރައްޔިތުންނަށް މައުލޫމާތު ހިއްސާކުރަން ފެށި މަސައްކަތް ހުއްޓުނީ އެވެ. އަނެއްކާވެސް އާ މީހަކު އާނަމެއް ދީފަ އެ މަސައްކަތް ފައްޓަވައިފި އެވެ. މިފަހަރު ފެށީ "ތަރުޖަމާނާ އެކު" ނަމުގައެވެ. 

ޕޮޑްކާސްޓުތަކަށް އަރަންވާނީ މީހުން ބަލައިގަންނަ މީހެއް ނޫންހެއްޔެވެ. ފެށުނީއްސުރެ ފަތިފުށް އެގޮތް މިގޮތް ވެފަ ހުރި މީހަކު ޕޮޑްކާސްޓްތަކަަށް އެރީމަ ބަލައިގަންނާނީ މަދުމީހެކެވެ. ގަބޫލު ކުރަން ޖެހޭ ހަގިގަތަކީ މާސިންގާ ބޮޑު ވައްކަމެއް ކުރި ކަމުގެ ތުހުމަތު އެންސްޕާ ގެ ބޮލުގައި އެޅިފައިވާއިރު ރައްޔިތުންނަށް ސައްހަ މައުލޫމާތު ދޭށޭ ކިޔާފައި ހީނާ ޕޮޑްކާސްޓެއް ހުށަހަޅަން ހެޔޮވާނެ ހެއްޔެވެ. ރައްޔިތުންގެ ފައިސާ އަށް ފާޅުގައި ހިޔާނާތެރިވެފައި ހުރި މީހަކު ދައްކާވަހަކަ ރައްޔިތުން ގަބޫލުކުރާނެ ކަމަށް ހީނާ އަށް ގަބޫލުކުރެވުނީ އެވެ. 

ބޮޑެތި މަގާމުތަކަށް ދާއިރު އަދި އަމުދުން ރައްޔިތުން އަބަދުމެ ހިދުމަތް ހޯދަން ދާ ތަނެއްގެ ވެރިއަކަށް އަންހެނަކު ހުރިކަމުގައި ވިޔަސް ނުވަތަ ފިރިހެނަކު ހުރިކަމުގައި ވިޔަސް ސިއްސައިގެން ދާވަރުގެ ވައްކަމެއް އެތަނުގައި ހިނގި ކަމަށް ތުހުމަތު ކުރެވޭ ހާލަތެއްގައި ނަމަ ރައްޔިތުން އެވާހަކަ ދައްކާނެ އެވެ. ޕޮޑްކާސްޓަކުން އެކަން ހަނދާން ނައްތައެއް ނުލެވޭނެ އެވެ. 

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ވެރިކަމަށް ދެ އަހަރަށް ވުރެ ގިނަސް ދުވަސްވެގެން ދާއިރު، މި ސަރުކާރާ މެދު މާޔޫސް ނުވާ ހަމަ އެންމެ ރައްޔިތަކު ވެސް ނެތެވެ. ސަރުކާރު ދެކެ "އަލިފާން" ކަހަލަ ރުޅި ނާންނަ މީހަކާ މަގެއްގެ މައްޗަކުން ވެސް ދިމާ ނުވެ އެވެ. ރައީސް މުޢިއްޒު އެވެ. ރައްޔިތުން ހަމަޖައްސަން ކަންކަން ފޫބައްދަވަން މިނޫން މީހަކު ހޯއްދަވާށެވެ. 

ކިޔައި މިދެނީ ހަގީގަތެވެ. އެތައް ބައެއްގެ އަބުރު ކަތިލާ އެތައް ބައެއްގެ ދިރުއުޅުމާއި ބެހުމުން އެމީހެއްގެ ނަން ރީތި ނުވާނެކަން ގަބޫލުކުރަން ވާނެ އެވެ. މިވާހަކަ ދެއްކީމަވެސް ހީނާ ރައްޔިތުން ކުރިމަތީ ފަށަނި ގިސްލަ ގިސްލާފަ ރޯށެވެ. މީހުން ހީނާ އަށް ފުރައްސާރަކުރި ވާހަކަ ބޮޑު ޖަލްސާ އެއް ގައި ރޮއެ، ގިސްލަމުން ދެއްކި އިރު، ހީނާ އަކީ ދިޔަރެސް ކިޔާ ނޫހެއް ހަދައިގެން މީހުންގެ އަބުރުކަތިލަމުން ހޭބޯ ނާރާ އުޅުނު މީހެއްކަން ނޭގޭ މީހަކު ނުހުންނާނެ އެވެ. ޕޮޑްކާސްޓަކުން އެކަން ފިލައި ނުދާނެ އެވެ. މިވަރުގެ ކަންކަން ކޮށްފައި ހުރި މީހަކު ޕޮޑްކާސްޓަކަށް އަރައި މޮޅު ވާހަކަ ދެއްކީމަ އައިބު ގޮތެއް ހުރެ އެވެ. 

ރައްޔިތުންނަށް ހަގީގަތް ކިޔައިދޭކަށް ސައްހަ މައުލުމާތު ދޭކަށް ޕޮޑްކާސްޓެއް ބޭނުމެއް ނުވެ އެވެ. އެއަށްވުރެ ދިވެހި ރައްޔިތުން މިހާރު ރޯފިލައިފި އެވެ. މިހާތަނަށް ސަރުކާރަށް ދެ އަހަރަށް ވުރެ ގިނަ ދުވަސް ވީއުރު، ވައުދުވެފައިވާ ޕްރޮޖެޓްގެ ތެރެއިން ކުނި ކޮއްޓެއްވެސް އަދި އަޅާ ނިންމައެއް ނުލެވެއެވެ. ހާރަކަސް ތަރާވީހަކަސް ސަރުކާރަށް ނިންމުނު މަޝްރޫއުއަކަށް އޮތީ ކެޓް ޝެލްޓަރއެވެ. 

ޤަބޫލުފުޅުކުރައްވާށެއެވެ. ދިވެހި ރައްޔިތުންނަކީވެސް ތިޔަ ހީފުޅު ކުރައްވާހާ ގަމާރު ބައެއް ނޫނެއެވެ. އެހާ ޖާހިލުބައެއްވެސް ނޫނެއެވެ. ފާޑު ފާޑު ނަންނަމުގައި ޕޮޑްކާސްޓު ބާއްވައިގެން ފާޑު ފާޑު ކުރެހުންތައް ދައްކަވައިގެން ފާޑު ފާޑު ވާހަކަ ދައްކަވައިގެން ސަރުކާރުން ދަމާހާ ގުއިރޯނެއްގައި ޖެހޭނެ މާގިނަ ބަޔަކު މިއަދަކު ނޫޅެ އެވެ.