ލައިބީރިއާގެ ދިދައިގެ ދަށުން ރަތް ކަނޑުގައި ދަތުރުކުރި، ގްރީކުން އޮޕަރޭޓްކުރާ، ބަލްކް ކެރިއަރ އީޓަރނިޓީ ސީ އަށް ދިން ހަމަލާ އެއްގައި އެ ބޯޓުގެ ގެ ދެ ފަޅުވެރިން މަރުވެއްޖެ އެވެ.

ބޯޓަށް ހަމަލާ ދިނީ ހޯމަ ދުވަހުގެ ރޭ ޔަމަނުގެ ކައިރިން ޑްރޯންތަކާއި ބާރު ދުވެލީގެ ބޯޓުތަކުން ކަމަށް ރިޕޯޓްތައް ބުނެއެވެ. މިކަން ހާމަ ކުރީ ލައިބީރިއާގެ ޝިޕިންގ ޑެލިގޭޝަނުން އަންގާރަ ދުވަހު އދ.ގެ ޝިޕިންގ އޭޖެންސީ އައި.އެމް.އޯގެ ބައްދަލުވުމެއްގައެވެ.

މިއީ ޖޫން 2024 ގެ ފަހުން މި ބާވަތުގެ ހާދިސާ އެއްގައި ބައެއްގެ ފުރާނަ ގެއްލުނު ފުރަތަމަ ފަހަރެވެ. މިއާއެކު ރަތް ކަނޑުގައި ދަތުރުކުރާ އުޅަނދުތަކަށް ދެވުނު ހަމަލާތަކުގައި މަރުވި ސީމަނުންގެ އަދަދު 6 އަށް ވަނީ އަރާފައެވެ.

ގެއްލުން ލިބިފައިވާ މި އާގު ބޯޓަށް "ހުއްޓުމެއް ނެތި ހަމަލާތައް އަމާޒު ވަމުން" ދާ ކަމަށް ކަނޑުމަތީގެ ހަރަކާތްތައް ބަލަހައްޓާ ފަރާތަކުން އަންގާރަ ދުވަހު ވަނީ ބުނެފައެވެ.

އީޓަރނިޓީ ސީ އަށް ފުރަތަމަ ހަމަލާ އަމާޒުވީ ހޯމަ ދުވަހުއެވެ. މި ހަމަލާ ދިން ކަމަށް ރިޕޯޓު ކުރެވުނީ ޔަމަނުގެ ބޮޑު ބައެއް ކޮންޓްރޯލް ކުރާ ހޫތީން އެހެން އާގު ބޯޓެއް ކަމުގައިވާ މެޖިކް ސީސް އަށް ކުރިން ދިން ހަމަލާއެއްގެ ޒިންމާ ނެގިތާ ކުޑަ އިރުކޮޅެއްގެ ތެރޭގައެވެ.

"(އީޓަރނިޓީ) އަށް ވަނީ ބޮޑެތި ގެއްލުންތަކެއް ލިބި، އަދި އުޅަނދު ދުއްވުމުގެ ހުރިހާ ޤާބިލުކަމެއް ގެއްލިފައެވެ،" ބްރިޓިޝް ނޭވީގެ ބައެއް ކަމުގައިވާ ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސްއިން ބަޔާނެއްގައި ބުނެފައިވެއެވެ.

"އުޅަނދުގެ ވަށައިގެން ކުދި އުޅަނދުތަކެއް ޖަމާވެ، ހުއްޓުމެއް ނެތި ދަނީ ހަމަލާ ދެމުންނެވެ."

އުޅަނދުގެ ބްރިޖަށް ވަނީ ހަމަލާ އަރާފައި ކަމަށާއި މުވާސަލާތީ ވަސީލަތްތަކަށް އަސަރުކޮށްފައިވާ ކަމަށް ކުންފުނީގެ އިސް ވެރިއެއް ބުނެފައިވެއެވެ.

އެންމެ ފަހުގެ މި ހަމަލާގެ ޒިންމާ ހޫތީން ނަގާފައެއް ނުވެއެވެ. އެހެން ނަމަވެސް ހޯމަ ދުވަހު އާގު ބޯޓަށް ދިން ހަމަލާގެ ޒިންމާ ނަގަމުން ހޫތީން ބުނި ގޮތުގައި މެޖިކް ސީސް އަށް ދިން ހަމަލާ ގައި ބޭނުން ކޮށްފައި ވަނީ ޕައިލެޓް ނުލާ ހަރަކާތްތެރިވާ ބޯޓުތަކާއި، މިސައިލްތަކާއި އަދި ޑްރޯންތަކެވެ. މިއީ މިއަހަރު އާގު ބޯޓަކަށް އެމީހުން ދިން ފުރަތަމަ ހަމަލާއެވެ.

އީޓަރނިޓީ ގައި ތާށިވެފައިވާ 22 ފަޅުވެރިންގެ ތެރެއިން އެކަކު ފިޔަވައި އެހެން އެންމެންނަކީ ފިލިޕީންސްގެ ރައްޔިތުން ކަމަށް މެނީލާގެ އޮފިޝަލުން އަންގާރަ ދުވަހު ބުނެފައިވެއެވެ.

ބޮޑެތި ގެއްލުންތަކެއް ލިބުނު މެޖިކް ސީސްގެ ފަޅުވެރިން ހޯމަ ދުވަހު ވަނީ ސަލާމަތް ކުރެވިފައެވެ.

ހޫތީން ރަތް ކަނޑާއި އަދަނުގެ ކަނޑުގައި އިސްރާއީލާއި ގުޅުން ހުރި އުޅަނދުތަކަށް އަމާޒުކޮށް ހަމަލާ ދޭން ފެށީ އޮކްޓޯބަރ 2023 ގައި ޣައްޒާ ހަނގުރާމަ ފެށުމާ ގުޅިގެންނެވެ. އެމީހުން ބުނާ ގޮތުގައި މިއީ ފަލަސްތީނުގެ ރައްޔިތުންނާ އެއްބައިވުމުގެ ގޮތުން ދޭ ހަމަލާ ތަކެކެވެ.

މިކަމަށް ރައްދު ދިނުމުގެ ގޮތުން އިސްރާއީލުން ވަނީ ޔަމަނަށް އެކި ފަހަރު މަތިން ހަމަލާ ދީފައެވެ. މީގެ ތެރޭގައި އާދީއްތަ ދުވަހު ހުދެއިދާ ބަނދަރު ސިޓީއާއި އެ ސަރަހައްދުގެ އެހެން ތަންތަނަށް ދިން ހަމަލާތަކެއްވެސް ހިމެނެއެވެ.

މޭ މަހު، ހޫތީން ވަނީ އެމެރިކާ އާއެކު ހަނގުރާމަ ހުއްޓާލުމުގެ އެއްބަސްވުމެއްގައި ސޮއިކޮށްފައެވެ.