ފަހަތައް ހިނގުން - ސިއްހީ އެތައް ފައިދާތަކެއް!

ދިރާސާތަކުން ދައްކާ ގޮތުގައި، ފަހަތަށް ހިނގުމަކީ ހަށިގަނޑުގެ ސިއްހަތާއި ސިކުނޑިއަށް ވެސް ހައިރާންކުރުވަނިވި ފައިދާތަކެއް ލިބިދާނެ ކަމެކެވެ. މިކަމުގެ މައްޗަށް މައިކަލް މޮސްލީ ވަނީ ބީބީސީ ޕޮޑްކާސްޓް އަދި ރޭޑިއޯ 4 ގެ ޝޯ 'ޖަސްޓް ވަން ތިންގ' ގެ ފަހުގެ އެޕިސޯޑެއް ގައި އަލިއަޅުވާލާފައެވެ.

އެކަޑެމިކް ދާއިރާގައި 'ރެޓްރޯ-ވޯކިންގ' ގެ ނަމުން މަޝްހޫރުވެފައިވާ ފަހަތަށް ހިނގުމުގެ ތާރީޚް ވަރަށް ދިގެވެ. 19 ވަނަ ގަރުނުގެ ކުރީކޮޅާ ހަމައަށް ވެސް، އެތައް ސަތޭކަ މޭލަށް އަދި ބައެއް ފަހަރު އެތައް ހާސް މޭލަށް ފަހަތަށް ހިނގި މީހުންގެ ވާހަކަތައް ހުރެއެވެ. މިކަންކަމުގެ ތެރެއިން ގިނަ ކަންކަން ކުރެވިފައިވަނީ މީހުން ދެރަ ބަސްބުނުމުން އެކަން ވާކަން ދެއްކުމުގެ ގޮތުންނާއި އަދި ބައެއް ފަހަރު މިކަންކަން ކުރެވިފައިވަނީ އާދަޔާ ޚިލާފު އާ ރެކޯޑެއް ހެދުމުގެ ބޭނުމުގައެވެ.

ނަމަވެސް، ފަހުގެ ދިރާސާތައް ދައްކާ ގޮތުގައި ފަހަތަށް ހިނގުމަކީ ހަށިގަނޑަށް ބައެއް ޚާއްސަ ފައިދާތަކެއް ލިއްބައިދޭ ކަމެކެވެ. ބުރަކަށީގެ ރިހުން، ކަކުލުގެ މައްސަލަތައް، އަދި ހުޅުހުޅުގެ ރިހުން (އާރތުރައިޓިސް) އަށް ލުއި ދިނުމަށް ފިޒިއޮތެރަޕީގައި މިކަން ގިނައިން ބޭނުން ކުރެވެއެވެ. ބައެއް ދިރާސާތަކުން ދައްކާ ގޮތުގައި، ފަހަތަށް ހިނގުމަކީ ސިކުނޑީގެ ހަނދާންބެހެއްޓުމުގެ ގާބިލިއްޔަތާއި، އަވަހަށް އިޖާބަދިނުމުގެ ގާބިލިއްޔަތާއި އަދި މައްސަލަތައް ހައްލުކުރުމުގެ ގާބިލިއްޔަތު ފަދަ ކޮގްނިޓިވް ގާބިލިއްޔަތުތަކަށް ހެޔޮ އަސަރުކުރާ ކަމެކެވެ.

ސިއްހަތަށް ފައިދާ ހޯދުމުގެ ގޮތުން ފަހަތަށް ހިނގުމުގެ އާދަ އުފަންވެފައި ވަނީ ގަދީމީ ޗައިނާއިން ކަމަށް ބެލެވެއެވެ. ނަމަވެސް، މި ފަހަކަށް އައިސް އެމެރިކާ އަދި ޔޫރަޕްގެ ދިރާސާވެރިން ވަނީ ކުޅިވަރުގެ ފެންވަރު ރަނގަޅުކުރުމާއި ހަށިގަނޑުގެ މަސްތައް ވަރުގަދަކުރުމުގެ ގޮތުން މިކަމަށް ސަމާލުކަން ދީފައެވެ.

އެމެރިކާގެ ޔުނިވަރސިޓީ އޮފް ނެވާޑާގެ ބަޔޯމެކޭނިކްސްގެ ތަޖުރިބާކާރު، ޖެނެޓް ޑުފެކް، ފަހަތަށް ހިނގުމާ ބެހޭ ދިރާސާތައް ކުރަމުން ގެންދަވާތާ 20 އަހަރަށް ވުރެ ގިނަ ދުވަސްވެއްޖެ އެވެ. އޭނާ އާއި އޭނާގެ ބައިވެރިން ހެދި ދިރާސާއަކުން އެނގިފައިވާ ގޮތުގައި، ހަތަރު ހަފުތާގެ މުއްދަތެއްގައި ދުވާލަކު 10-15 މިނިޓު ފަހަތަށް ހިނގުމުގެ ދިރާސާގައި ބައިވެރިވި 10  އަންހެން ދަރިވަރުންގެ ހެމްސްޓްރިންގގެ ފްލެކްސިބިލިޓީ އިތުރުވެފައިވެއެވެ. ފަހަތަށް ހިނގުމުގެ ސަބަބުން ބުރަކަށީގެ މަސްތައް ވަރުގަދަ ވުމާއި މައިބަދައިގެ ފްލެކްސިބިލިޓީ ރަނގަޅުވި ކަން ފާހަގަ ކުރެވުނެވެ. އަދި ޑުފެކް އިސްކޮށް ހިންގި އިތުރު ދިރާސާއެއްގައި ބައިވެރިވި ފަސް އެތްލީޓުން ވަނީ ފަހަތަށް ހިނގި ބައެއް ދުވަސްތަކަށް ފަހު އެމީހުންގެ އުނގަނޑުގެ ރިހުން ކުޑަވެފައިވާކަން ފާހަގަކޮށްފައެވެ.

ފަހަތަށް ހިނގުމާއި ފަހަތަށް ދުވުމުގެ ޓްރެއިނިންގތައް ބައެއް ކުޅިވަރުތަކުގައި، ޚާއްސަކޮށް ޓީމު ކުޅިވަރުތަކާއި ރެކެޓް ކުޅިވަރުތަކުގައި، މިހާރު ވެސް ބޭނުންކުރެވެ އެވެ. އެއީ މި ކުޅިވަރުތަކުގައި ކުރިއަށް، ފަހަތަށް އަދި ދިމަދިމާ އަށް އަވަހަށް ހަރަކާތްތެރިވުމަށް ބޭނުންވާ އެޖިލިޓީ ހޯދުމަށެވެ. ކަކުލުގެ ހުޅަށް ކުރާ ޕްރެޝަރު ކުޑަކުރަމުން މަސްގަނޑު ވަރުގަދަކުރާތީ، 'ރެޓްރޯ-ރަނިންގ' އަކީ އެތްލީޓުންނަށް އަނިޔާވުމުން ރައްކާތެރިވުމަށް ވެސް ފައިދާހުރި ކަމެކެވެ.

އެތްލީޓުންގެ އިތުރުން، ފަހަތަށް ހިނގުމަކީ އުމުރުން ދުވަސްވީ މީހުންނާއި، ކުޑަކުދިންނާއި، ފަލަ މީހުންނާއި، ހުޅުހުޅުގެ ރިހުން (އޮސްޓިއޯއާރތުރައިޓިސް) ތަހައްމަލު ކުރާ މީހުންނާއި، ސްޓްރޯކް ޖެހުމަށް ފަހު ހިނގުމުގެ މައްސަލަތައް ހުންނަ ބަލިމީހުންނަށް ވެސް ފައިދާކުރާ ކަމެއްކަން ވަނީ އެނގިފައެވެ. ފަހަތަށް ހިނގުމަކީ ކުރިއަށް ހިނގުމަށް ވުރެ ގިނައިން ކެލޮރީ އަންދާ ކަމެއްކަން ވެސް ދިރާސާތަކުން ދައްކައެވެ.