ރެއާލް މެޑްރިޑަށް ކުޅެމުންއަންނަ ފްރާންސްގެ އިތުބާރު ފޯވާޑް ކަރިމް ބެންޒެމާ އަށް އަނިޔާގެ މައްސަލަ ކުރިމަތިވެ، ހަ ހަފުތާ އަށް ކުޅުމާ ދުރުގައި ހުންނަން ޖެހިއްދާނެ ކަމަށް ސްޕެއިންގެ މީޑިއާ ރިޕޯޓްތައް ބުނެފިއެވެ.

ސްޕެއިންގެ މީޑިއާ ރިޕޯޓްތަށް ބުނާގޮތުން ބެންޒެމާއަށް ލިބުނު އަނިޔާއާ ގުޅިގެން މަދުވެގެން 6 ހަފްތާ ނޫނީ ދެމަސްދުވަހު ކުޅުމާ ދުރުގައި ހުންނަން ޖެހިދާނެއެވެ.

ސްޕެއިންގެ މީޑިއާއިން މިގޮތަށް ޚަބަރު ފެތުރިނަމަވެސް ރަސްމީކޮށް ރެއާލް މެޑްރިޑުން ބެންޒެމާ ކުޅުމާ ދުރުގައި ހުންނަންޖެހޭނެ ވަކި މުއްދަތެއް ހާމަކޮށްފައެއް ނުވެއެވެ. އެހެން ނަމަވެސް ބެލެވޭ ގޮތުގައި މަދުވެގެން އެއް މަސް ދުވަސް ކުޅުމާއި ދުރުގައި ހުންނަންޖެހޭނެއެވެ.

ބެންޒެމާގެ ފަލަމަސްގަނޑަށް އަނިޔާވީ ސްޕެނިޝް ލީގުގައި ހޮނިހިރު ދުވަހު ލެވަންޓޭއާ 1-1 އިން މެޑްރިޑް އެއްވަރުވި މެޗުގަ އެވެ. އެ މެޗުގެ 24 ވަނަ މިނެޓުގައި އޭނާ ވަނީ އަނިޔާވެގެން ބަދަލުކޮށްފައެވެ.

މެޑްރިޑުގެ އިތުބާރު ފޯވާޑް ކްރިސްޓިއާނޯ ރޮނާލްޑޯ ވެސް ސަސްޕެންޝަނުގައި ހުއްޓާ ބެންޒެމާ ކުޅުމާ ދުރަށް ދާން ޖެހުމަކީ އެ ޓީމަށް ކުރިމަތިވާނެ ފޫބައްދަން އުނދަގޫ މައްސަލައެކެވެ. ބެންޒެމާ އަށް ޗެމްޕިއަންސް ލީގުގައި ބުދަ ދުވަހުގެ ރޭ ސައިޕްރަސްގެ އެޕޮއެލްއާ ދެކޮޅަށް ކުޅޭ މެޗާއި ބޮރޫޝިއާ ޑޯޓްމަންޑާ ދެކޮޅަށް ކުޅޭ މެޗު ގައި ނުކުޅެވޭއިރު، ސްޕެނިޝް ލީގުގެ މުހިންމު ބައެއް މެޗުތައްވެސް ބެންޒެމާއަށް ގެއްލޭނެއެވެ.

ބެންޒެމާއަކީ ރެއާލްގެ ފޯވާޑް ލައިންގައި މުހިންމު ދައުރެއް އަދާކުރާ ކުޅުންތެރިއަކަށް ވާއިރު، ބެންޒެމާ ނެތުމަކީ ޒިދާންއަށް ހިތްދަތި ކަމަކަށް ވާނެ ކަމަށް ރިޕޯޓްތައް ބުނެއެވެ.