މަޝްހޫރު ފިލްމް ޑައިރެކްޓަރ ފައްތާހު ކުއްލި ގޮތަކަށް ނިޔާވެއްޖެ
އާއިލާއިން ބުނި ގޮތުގައި ފައްތާހު ހއ. ދިއްދޫ ހޮސްޕިޓަލަށް އަންގާރަ ދުވަހު ހަވީރު ގެންދިޔައީ ހއ. ކެލާގައި ހުއްޓާ މެޔަށް ތަދެއް އަރައިގެން.
ކުރީގެ މަޝްހޫރު ފިލްމު ޑައިރެކްޓަރު، އަބްދުލް ފައްތާހު
މަޝްހޫރު ފިލްމް ޑައިރެކްޓަރ އަބްދުލް ފައްތާހު ވަރަށް ކުއްލި ގޮތަކަށް މިއަދު ނިޔާވެއްޖެ އެވެ.
އާއިލާ އިން ބުނި ގޮތުގައި ފައްތާހު ދިއްދޫ ހޮސްޕިޓަލަށް އަންގާރަ ދުވަހު އިރުއޮއްސުނު ހާއިރު ގެންދިޔައީ ހއ. ކެލާގައި ހުއްޓާ މެޔަށް ތަދެއް އަރައިގެން ކަމަށެވެ.
ފައްތާޙު އިމަރޖެންސީ ކޮށް ދިއްދޫ އަށް ގެންދިޔައީ ކެލާ ހެލްތު ސެންޓަރުގައި ފަރުވާ ދިނުމަށްފަހު ކަމަށް މައުލޫމާތު ލިބިފައިވެ އެވެ.
6 ޑިސެމްބަރު 1971 ގައި އުފަންވި، ފައްތާހު އަކީ މަގުބޫލު ދިވެހި ފިލްމު ޑައިރެކްޓަރެއް، ޕްރޮޑިއުސަރެއް، އެޑިޓަރެއް، ސްކްރީންރައިޓަރެއް އަދި ކޮރިއޮގްރާފަރެކެވެ. ދިވެހި ސިނަމާގެ އެންމެ ކާމިޔާބު ފިލްމުތައް އުފެއްދި ފަރާތްތަކުގެ ތެރޭގައި ހިމެނޭ ފައްތާހަށް، ހަތަރު ގައުމީ ފިލްމު އެވޯޑާއި ދެ މޯލްޑިވްސް ފިލްމު އެވޯޑު ހިމެނޭހެން ގިނަ އަދަދެއްގެ އެވޯޑު ލިބިފައިވެއެވެ. 2004 ވަނަ އަހަރު ދިވެހި ސަރުކާރުން ވަނީ ގައުމީ އިނާމު ދެއްވައި އޭނާގެ އަގު ވަޒަންކުރައްވާފައެވެ.
އިންޓަރ-އޮފީސް ޓެލެޑްރާމާ މުބާރާތެއްގައި ކާމިޔާބު ހޯދުމަށްފަހު، ފައްތާހު ވަނީ "ދަން ދަން ދަންވަރު" މި ނަމުގައި ވީޑިއޯ ސިންގަލް އަކާއެކު ފިލްމީ ދާއިރާއަށް ޑައިރެކްޓަރެއްގެ ގޮތުގައި ފުރަތަމަ ފަހަރަށް ނުކުމެފައެވެ. 2000 ވަނަ އަހަރު އޭނާގެ ފުރަތަމަ ފިލްމު "ހިމޭން ދުނިޔެ" ޑައިރެކްޓް ކޮށް، އެއަށްފަހު "ރަންމުތް" ޑައިރެކްޓްކޮށްފައިވެ އެވެ. ދިވެހި ސިނަމާގައި އޭނާ މަޝްހޫރުވީ ވިޔަފާރީގެ ގޮތުން ކާމިޔާބުވެފައި، ފާހަގަކޮށްލެވުނު ރޮމޭންޓިކް ޑްރާމާ "އާން... އަހަރެންވެސް ލޯބިވިން" (2002) އާއި، ހޮރޯ ފިލްމު "އޭނާ" (2004) އާއެކުއެވެ. އޭގެފަހުން އެވޯޑު ލިބުނު "ވޭހޭ ވާރޭ ތެރެއިން" (2003) ޑައިރެކްޓް ކުރިއެވެ. މި ފިލްމުން އޭނާއަށް ބެސްޓް ޑައިރެކްޓަރުގެ ގައުމީ ފިލްމު އެވޯޑު ލިބުނެވެ. ފައްތާހުގެ އަމިއްލަ ޕްރޮޑަކްޝަން ސްޓޫޑިއޯ، ރެޑް ޕްރޮޑަކްޝަންސް، ގާއިމުކުރުމަށްފަހު،
ފައްތާހު ވަނީ ޓެލެވިޒަން ޑްރާމާ ސީރީޒް "ހިނިތުން ވެލާށޭ ކަލާ" އާއި ރޮމޭންޓިކް ޑްރާމާ "ވާލޯބީ އެނގޭނަމަ" (2006) ޑައިރެކްޓްކޮށްފައެވެ.
އޭނާގެ އެންމެ ކާމިޔާބު ފިލްމަކީ 2010 ވަނަ އަހަރު ނެރުނު ރޮމޭންޓިކް ހޮރޯ ފިލްމު "ޖިންނި" (2010) އެވެ. މި ފިލްމަށް މޯލްޑިވްސް ފިލްމު އެވޯޑްސް ބެސްޓް ޑައިރެކްޓަރަށް ނޮމިނޭޓްވެފައިވާ އިރު، އޭގެ ފަހުން އަނެއްކާ ވެސް ރޮމޭންޓިކް ހޮރޯ ފިލްމު "14 ވިލޭރޭ" (2011) ޑައިރެކްޓް ކުރިއެވެ. ފައްތާހުގެ ރޮމޭންޓިކް ފިލްމު "ލޯބި ސްޓޯރީ" (2012) އިން އޭނާ އަށް ދެވަނަ ފަހަރަށް ބެސްޓް ޑައިރެކްޓަރުގެ ގައުމީ ފިލްމު އެވޯޑަށް ނޮމިނޭޝަން ލިބުނެވެ. ޖެހިގެން ނެރުނު ފިލްމު، ފެމިލީ ޑްރާމާ "އާދޭސް" (2014) އަށް ފާޑުކިޔުންތެރިންގެ ތަފާތު ރިވިއުތަކެއް ލިބިފައިވާއިރު، ވިޔަފާރީގެ ގޮތުން ކާމިޔާބުވި ފިލްމު "ހައްދު" (2017) އާއެކު އޭނާ ވަނީ ފިލްމީ ދާއިރާއިން ރިޓަޔަރ ކުރުމަށް ނިންމާފައިވާކަން އިއުލާނުކޮށްފައެވެ.
