ހިދުމަތާއި ތަކެތި ހަމައަށް ލިބުނުކަން ލިޔެކިޔުމުން ކަށަވަރުނުކޮށް ދަރަވަންދޫ ކައުންސިލުން ފައިސާ ދެއްކި - އޮޑިޓް
7 އޯގަސްޓު 2025 | ބުރާސްފަތި 04:49ދައުލަތުގެ މާލިއްޔަތު ގަވާއިދުގައި ވާގޮތުން ފައިސާ ދެއްކުމުގެ ކުރިން ތަކެއްޗާއި ހިދުމަތް ލިބުނުކަން ކަށަވަރުކުރަންޖެހޭ
ދަރަވަންދޫ ކައުންސިލުން ރައްޔިތުންނާއި ބައްދަލުކުރައްވަނީ
ހިދުމަތާއި ތަކެތި ހަމައަށް ލިބުނުކަން ލިޔެކިޔުމުން ކަށަވަރުނުކޮށް ދަރަވަންދޫ ކައުންސިލުން ފައިސާ ދެއްކި ކަމަށް ކައުންސިލްގެ 2023 ވަނަ އަހަރުގެ އޮޑިޓް ރިޕޯޓުން ހާމަވެއްޖެއެވެ.
2023 ވަނަ އަހަރުގެ ބ. ދަރަވަންދޫ ކައުންސިލްގެ ކޮމްޕަލަޔަންސް އޮޑިޓް ރިޕޯޓުގައި ބުނެފައިވަނީ ދައުލަތުގެ އެއްވެސް އެކައުންޓަކުން ފައިސާ ހަރަދުކުރުމުގެ ކުރިން ތަކެއްޗާއި ހިދުމަތް ފުރިހަމައަށް ލިބިފައިވޭތޯ ބެލުމަށާއި، މަސައްކަތް ނިމިފައިވޭތޯ ބެލުމަށް ދައުލަތުގެ މާލިއްޔަތު ގަވާއިދުގެ 6.01 ވަނަ މާއްދާގެ (ނ) ގެ 6 ވަނަ ނަންބަރުގައި ބަޔާންކޮށްފައިވާ ކަމަށެވެ. އަދި ޕޭމަންތް ވައުޗަރު ހަދަންވާނީ މުދާ ނުވަތަ ހިދުމަތް ލިބިފައިވާ ކަމުގެ ލިޔުން އޮތްތޯ ބަލައި، އިންވޮއިސްގައިވާ އަގުތަކާއި، ޕާޗޭސް އޯޑަރު ނުވަތަ ކޮންޓްރެކްޓްފަދަ ގުޅުންހުރި ލިޔުންތަކާ އަޅާބަލައި، ހިސާބުތައް ޗެކްކޮށް ރަނގަޅުތޯ ބެލުމަށްފަހުގައި ކަމަށް އެ ގަވާއިދުގައި ބަޔާންކޮށްފައިވާ ކަމަށެވެ.
ނަމަވަެސް ކައުންސިލް އިދާރާއިން 2023 ވަނަ އަހަރު ހޮދާފައިވާ ތަކެއްޗާއި ހިދުމަތްތަކުގެ ބިލުތަކަށް ފައިސާ ދެއްކުމުގެ ކުރިން އެ ތަކެތި ނުވަތަ ހިދުމަތްތައް އިދާރާއަށް ފުރިހަމައަށް ލިބުނުކަން ލިޔެކިޔުމުން ކަށަވަރުނުކޮށް 162،765 ރުފިޔާ ހަރަދުކޮށްފައިވާ ކަމަށް އޮޑިޓް ރިޕޯޓުގައި ބުނެފައިވެއެވެ.
ހަރަދުތަކުގެ ތަފްސީލު
- މަގުތައް ދިއްލުމަށް ބޭނުންވާ ހޮޅިދަނޑު ޖެހުމަށް - 81،500ރ
- ސެކިއުރިޓީ ހިދުމަތަށް - 8000ރ
- މިސްކިތް ސާފުކުރުމަށް - 6990ރ
- ބަދިގެ ޑަސްޓްބިން އުކާލުމުގެ ހަަރަދަށް - 6000ރ
- ވާރކް ޕާމިޓް ހުއްދަ ނެގުމުގެ ހިދުމަތް - 38،650ރ
- ކުއްޔަށް ޕިކަޕް ހިފުމަށް - 21،625ރ
އޮޑިޓް ރިޕޯޓުގައި ބުނެފައިވަނީ މި މައްސަލައަކީ 2022 ވަނަ އަހަރުގެ އޮޑިޓް ރިޕޯޓުގައި ވެސް ފާހަގަކޮށްފައިވާ މައްސަލައެއް ކަމަށެވެ.
މީގެ އިތުރުން ހަރަދުކުރަން އެންމެ އެކަށޭނެ ބަޖެޓް ކޯޑުން ހަރަދުކޮށްފައި ނުވާ އިރު، އެންމެ އެކަށޭނެ ބަޖެޓްކޯޑް ނޫން ކޯޑުތަކުން ޖުމްލަ 505،017 ރުފިޔާ ހަރަދުކޮށްފައިވާ ކަމަށް ވެސް އޮޑިޓުގައި ވަނީ ފާހަގަކޮށްފައެވެ. އަދި މިއީވެސް 2022 ވަނަ އަހަރުގެ އޮޑިޓުގައި ފަހަގަކޮށްފައިވާ ކަމެކެވެ.
