ކުމުންދޫ ފުޓުބޯޅަ ދަނޑުގެ މަސައްކަތް ނިމޭނެ ދުވަހެއް ނޭނގެ: ކައުންސިލް ރައީސް

ކުރީ ސަރުކާރުން ފެށި ހދ. ކުމުންދޫ ފުޓުބޯޅަ ދަނޑު ގެ މަސައްކަތް ސަރުކާރު ބަދަލުވި ފަހުން މަޑުޖެހިފައި ވާކަމަށާއި، މަސައްކަތް ނިމޭނެ ދުވަހެއް ވެސް ނޭނގޭ ކަމަށް އެ ރަށު ކައުންސިލް ގެ ރައީސް އަމީން އަހުމަދު ވިދާޅުވެއްޖެ އެވެ.

ކުމުންދޫ ފުޅުބޯޅަ ދަނޑުގެ މަސައްކަތާއި ގުޅޭގޮތުން ރާއްޖެ އެމްވީ އަށް މައުލޫމާތު ދެއްވަމުން އަމީން ވިދާޅުވީ، ދަނޑުގެ މަސައްކަތް ކުރިޔަށްދަަނީ ވަރަށް މަޑުން ކަމަށެވެ. އަމީން ވިދާޅުވީ ދަނޑުގައި އަޅާ ޓާފް ރަށަށް ގެނެސްފައިވިޔަސް، ޓާފް އެޅުމުގެ މަސައްކަތް އަދިވެސް ފެށިފައި ނުވާކަމުގަ އެވެ.

 ކުމުންދޫ އަކީ ފުޅުބޯޅަ އަށް ލޯބިކުރާ ރައްޔިތެއް ދިރިއުޅޭ ރަށެއްކަން ފާހަގަކުރައްވާ އަމީން ވިދާޅުވީ، އެސަހައްދުގައި ކުމުންދޫ އަކީ ފުޓުބޯޅައިން އަބަދުވެސް ކާމިޔާބީ ހާސިލް ކުރާ ރަށެއް ކަމަށެވެ. އެގޮތުން އެންމެ ފަހުން ބޭއްވި ތިލަދެކުން ފުޓްސެލް މުބާރާތުގެ ޗެމްޕިއަން ކަން ހޯދީ ކުމުންދޫ އަންހެނުން ޓީމު ކަން އަމީން ފާހަގަ ކުރެއްވި އެވެ. 

މުބާރާތްތަކަށް ފަރިތަކުރަން ކުމުންދޫ ރައްޔިތުން މިހާރު ބޭނުން ކުރާ ފުޓްސަލް ދަނޑު ވަނީ ވަރަށް ބޮޑަށް ހަލާކުވެފައި ކަމަށް އަމީން ވިދާޅުވި އެވެ. މި ދަނޑަކީ ރައީސް ސޯލިހު ގެ ވެރިމަހުގައި މަސައްކަތް ނިމުނު ދަޑެއްކަން އަމީން ފާހަގަކުރެއްވި އެވެ.

ރައީސް މުއިއްޒުގެ ވެރިކަމުގެ ފުރަތަމަ ދެ އަހަރު ފާއިތުވެގެން ގޮސްފައިވާ އިރު، ކުމުންދޫ ގައި ތަރައްގީ ގެ އެއްވެސް މަޝްރޫއެއް އެކަށީގެންވާ ގޮތަށް ނުހިނގާ ކަން އެ ރަށު ރައްޔިތުން ފާހަގަ ކުރެ އެވެ. އަދި ނިމިދިޔަ އެމްޑީޕީ ގެ ސަރުކާރުން އެ ރަށުގައި ފަށާފައިވާ މަޝްރޫއު ތައް ވެސް މިހާރު މަޑުޖެހިފައިވާ ކަމަށް ރައްޔިތުން ވަނީ ފާހަގަ ކޮށްފަ އެވެ.

ރައީސް ސޯލިހުގެ ވެރިކަމުގައި ހދ. ކުމުންދޫ ގެ ތަރައްގީ އަށް މުހިންމު ގިނަ މަޝްރޫއުތަކެއް ހިންގާފައިވެ އެވެ. އޭގެ ތެރޭގައި އެ ރަށު ފެނާ ނަރުދަމާ ގާއިމް ކުރުން، ކުމުންދޫ ބަނދަރު ޒަމާނީ ފެންވަރަށް ތަރައްގީ ކުރުން ހިމެނެ އެވެ. މީގެ އިތުރުން އެމްޑީޕީ ވެރިކަމުގައި ކުމުންދޫ ގައި ވަނީ އައުޓްޑޯ ޖިމް އެއް ވެސް އަޅާފަ އެވެ.

އަތޮޅުތަކުގެ ރަށްރަށުގައި އަސާސީ ޚިދުމަތްތައް ޤާއިމް ކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި އެމްޑީޕީ ސަރުކާރުން ވަނީ، ރަށްރަށުގައި އުމްރާނީ ތަރައްގީގެ ވަރަށް ގިނަ މަޝްރޫޢުތައް ހިންގާފަ އެވެ.