ބަރުދަން ލުއިކުރާ ފުރަތަމަ ގުޅަ ބޭސް އަންނަ އަހަރު ޖެނުއަރީ ގައި ބާޒާރަށް ނެރޭނެ

ބަރުދަން ލުއިކުރުމަށް ބޭނުންކުރާ ފުރަތަމަ ގުޅަ ބޭހަށް އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ހުއްދަ ދީފި ކަމަށް ފާމަސޫޓިކަލް ދާއިރާގެ ބޮޑު ކުންފުނި ނޮވޯ ނޯޑިސްކުން ބުނެފި އެވެ.

މިއީ ބަރުދަން ލުއި ކުރުމަށް ގުޅަ ބޭހަކަށް ހުއްދަ ދިން ފުރަތަމަ ފަހަރެވެ. އެއާއެކު މިއީ ބަރުދަން ލުއި ކުރުމަށް ބޭނުން ކުރާ ބޭހުގެ މުޅިން އައު ޒަމާނެއްގެ ފެށުން ކަމަށް ރިޕޯޓުތަކުގައި ސިފަ ކޮށްފައިވެ އެވެ. 

ވިގޯވީ ބޭސް އުފައްދާ ޑެންމާކުގެ ނޮވޯ ނޯޑިސްކުން ބުނެފައިވަނީ، ދުވާލަކު އެއް ފަހަރު ބޭނުންކުރާ މި ގުޅައަކީ އިންޖެކްޝަނުގެ ބަދަލުގައި ބޭނުން ކުރަން ފަސޭހަ ގޮތެއް ކަމަށާއި، އިންޖެކްޝަނުން ލިބޭ ބަރުދަން ލުއިވުމުގެ ނަތީޖާ މި ގުޅައިން ވެސް ލިބޭނެ ކަމަށެވެ. އެފްޑީއޭ އިން ކުރިން ވަނީ ވެގޯވީ އިންޖެކްޝަނަށް ބަރުދަން ލުއިކުރުމުގެ ޚާއްސަ ކޮށް ހުއްދަ ދީފަ އެވެ. .

އޮޒެމްޕިކް (Ozempic) ފަދަ އެހެނިހެން ބޭސްތަކުން ވެސް ބަރުދަން ލުއިކުރުމުގެ ނަތީޖާ ލިބޭ ނަމަވެސް، އެ ބޭސްތަކަށް މައިގަނޑު ގޮތެއްގައި ހުއްދަ ދީފައިވަނީ ޓައިޕް 2 ޑައިބެޓީސް އަށް ފަރުވާ ދިނުމަށެވެ.

ނޮވޯ ނޯޑިސްކުން ހޯމަ ދުވަހު ބުނި ގޮތުގައި، ވިގޯވީ ގުޅަ ބޭނުންކޮށްގެން ކުރި ތަހުލީލުތަކުގައި، މީހުންގެ ބަރުދަން އެވްރެޖްކޮށް 16.6 އިންސައްތަ ލުއިވެފައިވާކަން ފާހަގަ ކުރެވިފައިވާ ކަމަށެވެ.

އެ ތަހުލީލުގައި ބައިވެރިވި 1,300 އެއްހާ މީހުންގެ ތެރެއިން ތިންބައިކުޅަ އެއްބައި މީހުންގެ ބަރުދަން 20 އިންސައްތަ ނުވަތަ އެއަށްވުރެ ބޮޑަށް ލުއިވެފައިވާކަން ވެސް އެ ކުންފުނިން ފާހަގަކުރި އެވެ.

މި ބޭހުގެ ގުޅަ 2026 ވަނަ އަހަރުގެ ޖެނުއަރީ މަހުގެ ކުރީކޮޅު އެމެރިކާގެ ބާޒާރަށް ނެރެވޭނެ ކަމަށް ވަނީ ލަފާކުރެވިފަ އެވެ.