ބަރުދަން ލުއި ކުރާ ގުޅަ ބޭސް ފުރަތަމަ ފަހަރަށް ބާޒާރަށް ނެރެފި

ބަރުދަން ލުއިކުރުމަށް މަސައްކަތްކުރާ މީހުންނަށް މިހާރު ވަނީ އައު ފުރުޞަތެއް ހުޅުވިފައެވެ. އެއީ ކޮންމެ ހަފުތާއަކު އެއްފަހަރު ޖަހަންޖެހޭ އިންޖެކްޝަނުގެ ބަދަލުގައި، 'ވިގޯވީ' (Wegovy) ބޭސް ކޮންމެ ދުވަހަކު ގުޅައެއްގެ ގޮތުގައި ބޭނުންކުރުމެވެ.

މި ބޭސް އުފައްދާ ނޯވޯ ނޯޑިސްކް (Novo Nordisk) ކުންފުނިން ހާމަކުރި ގޮތުގައި، ޑޮކްޓަރީ ސިޓީ އަށް ބޭސް ގަންނަ ފަރާތްތަކަށް 1.5 މިލިގްރާމްގެ 'ސްޓާޓަރ ޑޯޒް' މިދިޔަ ހޯމަ ދުވަހުން ފެށިގެން އެމެރިކާ ގައި ލިބެން ހުންނާނެ އެވެ. އަދި މި ހަފުތާ ނިމުމުގެ ކުރިން މީގެ މަތީ ޑޯޒްތައް ވެސް ބާޒާރަށް ނެރެވޭނެ އެވެ.

މާބޮޑަށް ފަލަވުމުގެ މައްސަލައަށް ހައްލެއް ހޯދުމަށް GLP-1 ގުޅަ ބޭސް ބޭނުންކުރަން ފެށުމަކީ ބަރުދަން ކޮންޓްރޯލް ކުރުމުގެ ދާއިރާގައި ލިބުނު ބޮޑު ކުރިއެރުމެކެވެ. މީގެ އިތުރުން، އެލީ ލިލީ (Eli Lilly) ކުންފުނިން އުފައްދާ 'އޯފޯގްލިޕްރޮން' (orforglipron) ބޭހަށް ވެސް މިއަހަރުގެ ހޫނު މޫސުމުގެ ކުރިން އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (FDA) ގެ ހުއްދަ ލިބޭނެ ކަމަށް ބެލެވެ އެވެ.

މީގެ ކުރިން ޖަހަމުން އައި GLP-1 އިންޖެކްޝަނަށް އޮތް ބޮޑު ޑިމާންޑުގެ ސަބަބުން އިންޖެކްޝަން ލިބުމުގައި ދަތިތަކެއް ކުރިމަތިވި ނަމަވެސް، ވީގޯވީ ގުޅަ ބޭސް އެކަށީގެންވާ މިންވަރަށް ފޯރުކޮށްދެވޭނެ ކަމުގެ ފުރިހަމަ އިތުބާރު އެބައޮތް ކަމަށް ނޯވޯ ނޯޑިސްކުން ބުނެ އެވެ.

ޑެންމާކުގެ މި ކުންފުނިން ފާހަގަކުރި ގޮތުގައި، ބޭސް އުފެއްދުމުގެ ގާބިލުކަން އިތުރުކުރުމަށް އެ ކުންފުނިން ވަނީ ފާއިތުވި އަހަރުތަކުގައި ބޮޑެތި އިންވެސްޓްމަންޓްތަކެއް ކޮށްފައެވެ. މިގޮތުން ވިގޯވީ ގުޅަ ބޭސް އެއްކޮށް އުފައްދަނީ އެމެރިކާގެ ނޯތު ކެރޮލައިނާގައި ހުންނަ އެ ކުންފުނީގެ ކާރުޚާނާތަކުގަ އެވެ.

މި ބޭސް ގުޅަ އަކީ މިކަމަށް އޮތް ފަސޭހަ ނުވަތަ ކުރު މަގެއް ނޫންކަމަށް އެ ކުންފުނިން ވަނީ ބުނެފައެވެ. އިންޖެކްޝަން ބޭނުންކޮށްގެން ކުރިއަށްގެންދާ ފަރުވާތަކެކޭ އެއްފަދައިން، ގުޅަ ބޭސް ވެސް ބޭނުން ކުރަން ޖެހޭނީ ކެއިންބުއިމުގެ އާދަތަކަށާއި ދިރިއުޅުމުގެ ވައްޓަފާޅިއަށް ހެޔޮ ބަދަލުތަކެއް ގެނައުމާއެކުގަ އެވެ. މީގެ އިތުރުން، ފަރުވާގެ ކުރީކޮޅުގައި ބައެއް ބަލިމީހުންނަށް މޭނުބައިކުރުން ފަދަ ނޭދެވޭ އަސަރުތަކެއް ކުރިމަތިވުމަކީ އެކަށީގެންވާ ކަމެއް ކަމަށް ވެސް ކުންފުނިން ބުނެފައިވެ އެވެ.

ބޭހުގެ އަގުތައް ހުރީ ކިހިނެއް؟

ނޯވޯ ނޯޑިސްކުން ޓްރަމްޕްގެ ސަރުކާރާއެކު ވެފައިވާ އެއްބަސްވުމެއްގެ ދަށުން، އަމިއްލަ އަށް ފައިސާ ދައްކައިގެން ބޭސް ގަންނަ ފަރާތްތަކަށް 1.5 މިލިގްރާމްގެ ސްޓާޓަރ ޑޯޒް މަހަކު 149 ޑޮލަރަށް ލިބޭނެ އެވެ. އަދި 4 މިލިގްރާމްގެ ޑޯޒް ވެސް އޭޕްރިލް 15 ގެ ނިޔަލަށް މި އަގުގައި ލިބޭނެ އެވެ. ނަމަވެސް އެއަށް ފަހު އެ ޑޯޒްގެ އަގު 199 ޑޮލަރަށް ބޮޑުވާނެ އެވެ.

މީގެ އިތުރުން، 9 މިލިގްރާމް އަދި 25 މިލިގްރާމްގެ ޑޯޒްތައް ލިބޭނީ މަހަކަށް ބަލާ ނަމަ 299 ޑޮލަރަށެވެ.