ބޭސް ލިބުމުގެ މައްސަލަ ހައްލު ނުކުރެވި ވަނީ ސަރުކާރުން އެކަން ކުރަން ބޭނުން ނުވާތީ - އާދިލް
ސަރުކާރުން ކުރަންވާ ވަރަށް ދިރާސާ ނުކޮށް އެކުލަވާލާ ތަންފީޒު ނުކުރެވޭ ޤަވާއިދުތަކުގެ ސަބަބުން ގެއްލުން ވަނީ އާއްމުންނަށް ކަމަށް އާދިލް ވިދާޅުވި
ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު އަހްމަދު އާދިލ، ފަލަސުރުޚީގައި ވާހަކަދައްކަވަނީ
ބޭސް ލިބުން ދަތިވަނީ ސަރުކާރުގެ ސަބަބުން ކަމަށާއި ބޭސް ލިބުމުގެ މައްސަލަ ހައްލު ނުކުރެވި ވަނީ ސަރުކާރުން އެކަން ކުރަން ބޭނުން ނުވާތީ ކަމަށް ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު އަހްމަދު އާދިލް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުންނެވެ. ސަރުކާރުން ކުރަންވާ ވަރަށް ދިރާސާ ނުކޮށް އެކުލަވާލާ ތަންފީޒު ނުކުރެވޭ ޤަވާއިދުތަކުގެ ސަބަބުން ގެއްލުން ވަނީ އާއްމުންނަށް ކަމަށް އާދިލް ވިދާޅުވިއެވެ.
ބޭހުގެ މައްސަލައަށް ހައްލު ލިބޭނެ ކަމަށް ރައީސް ޑރ.މުހައްމަދު މުއިއްޒު ދެއްވި މި މަހުގެ 15 އަށް ވަނީ ހަމަވެފައެވެ. ނަމަވެސް އެ މައްސަލަ އަށް ހައްލެއް ލިބިފައެއް ނުވެއެވެ.
މިއަދު ރާއްޖޭގެ އުތުރާއި ދެކުނަށް ބެލިޔަސް ދައްކަނީ ބޭސް ނުލިބޭ ވާހަކަ ކަމަށް އޭނާ ވިދާޅުވިއެވެ. ރައީސް މަސައްކަތް ކުރައްވަނީ ސިނާއަތްތައް ހިންގާ މީހުންނާއި ޖެހިގަނެގެން ކަމަށާއި ސިނާއަތްތައް ފުނޑާލުމުގެ ނުރަނގަޅު އަސަރު ކުރަނީ އެ ސިނާއަތްތަކަށް ކަމަށް އޭނާ ވިދާޅުވިއެވެ. އޭނާ ވަނީ ޓުއަރިޒަމް ދާއިރާ އާއި ސިއްހީ ދާއިރާ އަކީ އެއީ އެފަަދަ ދާއިރާތައް ކަމަށް އޭނާ ވިދާޅުވިއެވެ.
މީގެ އިތުރުން ސަރުކާރުން ބޭސް އެތެރެކުރާ ފަރާތްތަކަށް އެއްވެސް ލުޔެއް ނުދޭ ކަމަށް އޭނާ ވަނީ ވިދާޅުވެފައެވެ. މީގެ އިތުރުން އެމްއެފްޑީއޭއިން މަދުވެގެން 5 ފަހަރު ބަދަލުގެންނަވާފައިވާ ކަމަށް އޭނާ ފާހަގަކުރެއްވިއެވެ. މިހާރު ބޭސް އެތެރެ ކުރުމުގެ 10 ދުވަސް ކުރިން އެއާވޭ ބިލް އާއި ޕެކިން ލިސްޓް އަދި އިންވޮއިސް އެމްއެފްޑީއޭ އަށް ހުށަހަޅަން ޖެހޭ ކަމަށް އާދިލް ވިދާޅުވިއެވެ.
އެ އުސޫލު އެގޮތަށް އޮތުމަކީ ބޭސް އެތެރެ ކުރާ މިހުންނަށް ދިމާވާ ވަރަށް ބޮޑު ދައްޗެއް ކަަމަށް އޭނާ ވިދާޅުވިއެވެ. ވިޔަފާރިވެރިންނަށް އެކަމުގެ ސަބަބުން ވަރަށް ބޮޑަށް ގެއްލުންވާ ކަމަށް އާދިލް ވިދާޅުވިއެވެ. ނަމަވެސް ތަކުރާރުކޮށް މަޝްވަރާކޮށްގެންވެސް ސަރުކާރުން އެކަން ހައްލުކުރަން މަސައްކަތް ނުކުރާ ކަމަށް އޭނާ ވަނީ ވިދާޅުވެފައެވެ.
ރާއްޖޭގެ ބޭސްފިހާރަތަކުން ބޭސް ލިބުން ދަތިވެ އެތައް ބަޔަކު ތަކުލީފުތަކެއް އުފުލަން ޖެހުމުގައި ސަރުކާރުގެ އެއްވެސް ދައުރެއް ނެތް ކަމަށް ރައީސް ވަނީ ދ. މީދޫގައި ވާހަކަ ދައްކަވަމުން ވިދާޅުވެފައެވެ. ފެބްރުއަރީ 24، 2025 ވަނަ ދުވަހުގެ ރޭ ރައީސް ވިދާޅުވީ ބޭސް މަދުވެ ރާއްޖެ ބޭހަށް ޖެހުނީ އެ ވިޔަފާރި ކުރާ ފަރާތްތަކުން ދަތިކުރަން ފެށުމުން ކަމަށެވެ.
އެގޮތުން ބޭސް ލިބުމުގައި ދިމާވެގެން އުޅޭ ބޭހުގެ ދަތިކަމަކީ އެ ވިޔަފާރި ކުރާ އަމިއްލަ ވިޔަފާރިތަކުން ރާވައިގެން ކުރާ ކަމެއް ކަަމަށް ރައީސް ވިދާޅުވިއެވެ. އެއީ ރައްޔިތުންނަށް ދަތިކުރަން ކުރި ކަމެއްގެ ގޮތުގައި ރައީސް ވަނީ ސިފަކުރައްވާފަ އެވެ. އަދި ބޭހުގެ އަގު ކޮންޓްރޯލް ކުރުމަށް ސަރުކާރުން ނިންމި ނިންމުމުގެ ސަބަބުން "މެޑިކަލް މާފިއާ" އިން އެކަން ކުރާ ކަމަށް ވެސް ރައީސް ވަނީ އޭރު ވިދާޅުވެފައެވެ.
