ސާޖަރީ ކުރުމަށް، ޖަލުގައި ހުންނެވި ބޮލްސޮނާާރޯ ހޮސްޕިޓަލަށް ބަދަލު ކޮށްފި

ބްރެޒިލްގެ ސަރުކާރާ ދެކޮޅަށް ބަޣާވާތް ރޭވި ކަމުގެ ކުށް ސާބިތުވެ ޖަލުގައި ހުންނެވި އެ ޤައުމުގެ ކުރީގެ ރައީސް ޖައިރް ބޮލްސޮނާރޯ ހޮސްޕިޓަލަށް ބަދަލު ކޮށްފި އެވެ. 

ބުދަ ދުވަހު ބޮލްސޮނާރޯ ހޮސްޕިޓަލަށް ބަދަލު ކޮށްފައި ވަނީ ޑޮކްޓަރުންގެ އިރުޝާދުގެ ދަށުން ސާޖަރީ ފުރިހަމަ ކުރުމަށެވެ. އެގޮތުން ހޮސްޕިޓަލްގައި އެޑްމިޓް ކުރުމަށް ފަހު، ބުރާސްފަތި ދުވަހުގެ ވަގުތެއްގައި ބޮލްސޮނާރޯގެ ސާޖަރީ ކުރާނެ ކަމަށް ވަނީ ރިޕޯޓު ކޮށްފަ އެވެ. 

ފުލުހުންގެ ބެލުމުގެ ދަށުގައި ހުރި ބޮލްސޮނާރޯ އެޑްމިޓު ކޮށްފައި ވަނީ ޑީއެފް ސްޓޭ ހޮސްޕިޓަލްގައި ބުދަ ދުވަހުގެ ހެނދުނު އެވެ. ފުލުހުންގެ ޚާއްސަ ބެލުމުގެ ދަށުން ބޮލްސޮނާރޯ ހޮސްޕިޓަލަށް ގެނައިއިރު، އޭނާ އަންނަނީ ބަޣާވާތުގެ ކުށް ސާބިތުވެ 27 އަހަރު ދުވަހުގެ ޖަލު ޙުކުމެއް ތަންފީޒު ކުރައްވަމުންނެވެ. 

ހޮސްޕިޓަލްގެ ސާޖަން ކްލައުޑިއޯ ބިރޮލިނީ ބުނެފައި ވަނީ، ބޮލްސޮނާރޯގެ ސާޖަރީ ގާތް ގަނޑަކަށް ތިން ގަޑިއިރު، ނުވަތަ ހަތަރު ގަޑިއިރަށް ދިގު ދެމިގެން ދާނެ ކަމަށެވެ. ނޫސްވެރިންނަށް މައުލޫމާތު ދެމުން އޭނާ ބުނީ އެއީ ކޮމްޕްލެކްސް އޮޕަރޭޝަނެއް ކަމަށާއި، އެއީ ކުރިން ވެސް ހަމަޖެހިފައިވާ އޮޕަރޭޝަނެއް ކަމަށެވެ. އަދި އުންމީދު ކުރަނީ ހުރިހާ ކަމެއް ވެސް އެންމެ ފުރިހަމަ އަށް ދިޔުން ކަމަށް އޭނާ ބުންޏެވެ.

ސާޖަރީ އަށް ފަހު، ފަސް ދުވަސް ނުވަތަ ހަތް ދުވަހުގެ މުއްދަތެއް ވަންދެން ބޮލްސޮނާރޯ ހޮސްޕިޓަލްގައި އެނދު މަތި ކޮށްފައި ބާއްވާނެ އެވެ. އޭނާ ބުނީ ސާޖަރީ ކުރަން ޖެހުމުން ބޮލްސޮނާރޯ ހުރީ ކަންބޮޑުވެފައި ކަމަށާއި، އެކަމުގެ ސަބަބުން އޭނާގެ ޕްރެޝަރު ވެސް މައްޗަށް ގޮސްފައިވާ ކަމަށެވެ. މީގެ އިތުރުން ފާއިތުވި 40 ދުވަހަށް ބަލާއިރު ވެސް، ބޮލްސޮނާރޯ ހުންނެވީ އާންމު ޙާލަތެއްގައި ނޫން ކަމަށް އޭނާ ބުންޏެވެ. 

ޖަލުގައި ހުންނެވި ނަމަވެސް، ބޮލްސޯނާާރޯ އަށް ބޭނުންވާ ފަރުވާ ދިނުމަށް އަމުރު ކޮށްފައި ވަނީ ސުޕްރީމް ކޯޓުންނެވެ. އެ ކޯޓުގެ ފަނޑިޔާރު އެލެގްޒެންޑާ ޑި މޮރައިސް ކުރެއްވި އުމުރުގައި ވިދާޅުވެފައި ވަނީ، ބޮލްސޮނާރޯ އަށް ބޭނުންވާ ފަރުވާ ދިނުމާއި، ސާޖަރީ ފުރިހަމަ ކުރުމަށް އޭނާ އަށް ފުރުސަތު ދިނުމަށެވެ. 

އުމުރުފުޅުން މިހާރު 70 އަހަރުވެފައިވާ ބޮލްސޮނާރޯ ވަނީ މީގެ ކުރިން ހަމުގެ ކެންސަރަށް ވެސް ފަރުވާ ހޯއްދަވައިފަ އެވެ. އަދި މިއަހަރުގެ އޭޕްރީލް މަހުގެ ތެރޭގައި އޭނާ ވަނީ 12 ގަޑިއިރުގެ ކުއްލި އޮޕަރޭޝަނެއް ވެސް ކުރައްވައިފަ އެވެ. ބޮލްސޮނާރޯގެ ޞިއްޙީ ޙާލަތަށް ރިއާޔަތް ކުރުމަށް ފަހު، އޭނާ ޖަލު ބަންދުން ސަލާމަތް ކޮށްދިނުމަށް ޤާނޫނީ ވަކީލުން އެދިފައި ވީ ނަމަވެސް، ފަނޑިޔާރުން އެ ފުރުސަތު ދީފައި ނުވެ އެވެ. 

ބަޣާވާތް ހިންގަން އުޅުނު ކަމުގެ ކުށް ބޮލްސޮނާރޯގެ މައްޗަށް ސާބިތު ވެފައި ވަނީ ސެޕްޓެމްބަރު މަހުގެ ތެރޭގަ އެވެ. ސުޕްރީމް ކޯޓުން އޭނާގެ މައްޗަށް ކުރި ޙުކުމުގައި ބުނެފައި ވަނީ، ރިޔާސީ އިންތިޚާބު ކާމިޔާބު ކުރެއްވި މިހާރުގެ ރައީސް ލޫލާ ޑަ ސިލްވާ އާއި، އޭނާގެ ނައިބު ރައީސް ޖެރާލްޑޯ އަލްކްމިން އަވަހާރަކޮށްލަން ރޭވުމުގެ މައުލޫމާތު ބޮލްސޮނާރޯ އަށް ލިބިފައިވާ ކަމަށެވެ.

އެކަމާ ގުޅިގެން ބޮލްސޮނާރޯ ވިދާޅުވެފައި ވަނީ، އެއީ އޭނާއާ ދެކޮޅަށް ރޭވިގެން ހިންގާ ކަމެއް ކަމަށެވެ. އަދި އެއީ ސިޔާސީ ގޮތުން އޭނާއާ ދެކޮޅަށް ކޮށްފައިވާ ދައުވާއެއް ކަމަށާއި، އެކަމުގެ މަޤުސަދަކީ އޭނާގެ ސިޔާސީ ޙަޔާތަށް ހުރަސް އެޅުން ކަމަށް ވެސް ބޮލްސޮނާރޯ ވިދާޅުވެފައިވެ އެވެ.