ޖޭއެސްސީގެ ރައީސް ރިޒާ އިސްތިއުފާ ދެއްވައިފި

ޖުޑީޝަލް ސާވިސް ކޮމިޝަން (ޖޭއެސްސީ)ގެ ރައީސްކަމުން ރައްޔިތުންގެ މަޖިލީހުގެ މާފުށީ ދާއިރާގެ މެންބަރު ހުސައިން ރިޒާ އާދަމް އިސްތިއުފާ ދެއްވައިފި އެވެ.

ޖޭއެސްސީގެ ރައީސްކަމަށް ރިޒާ އިންތިޚާބުކުރީ ޖޫން 12 ވަނަ ދުވަހު އެވެ. އޭނާ ޖޭއެސްސީގައި ހުންނެވީ މަޖިލީހުގެ މެންބަރުންގެ ތެރެއިން އެ ކޮމިޝަނަށް ކަނޑައަޅާ މެންބަރުގެ ހައިސިއްޔަތުންނެވެ. ނަމަވެސް އިސްތިއުފާ ދެއްވި ސަބަބެއް މިހާތަނަށް ހާމަކުރައްވާފައެއް ނުވެ އެވެ. މި އިސްތިއުފާއާ ގުޅިގެން ޖޭއެސްސީގެ މެންބަރުކަމާއި ރައީސްގެ މަގާމުވެސް ހުސްވާނެ އެވެ.

މީގެ ކުރިން، ޖޭއެސްސީގެ ނައިބު ރައީސްގެ މަޤާމުގައި ހުންނެވި ހައިކޯޓުގެ ފަނޑިޔާރު މުޙައްމަދު ނިޔާޒު އިސްތިއުފާ ދެއްވުމާ ގުޅިގެން، މިދިޔަ ބުރާސްފަތި ދުވަހު އެ މަޤާމަށް ޔަޒްމީދު މުޙައްމަދު ވަނީ އިންތިޚާބުކޮށްފަ އެވެ. ރިޒާގެ އިސްތިއުފާއާ ގުޅިގެން މިހާރު ޖޭއެސްސީގެ އެންމެ އިސް ވެރިޔަކަށް ހުންނަވާނީ ޔަޒްމީދު އެވެ.

ޖޭއެސްސީގެ ރައީސްގެ މަގާމުގައި ރިޒާ ހުންނެވެއިރު އެންމެ ފާހަގަކޮށްލެވޭ އެއް ނިންމެވުމަކީ ސުޕްރީމް ކޯޓުގެ ތިން ފަނޑިޔާރުން ވަކިކުރުމަށް ނިންމި ނިންމުމެވެ. މި ނިންމުމާ ގުޅިގެން ގިނަ ފަރާތްތަކުން ވަނީ ޖޭއެސްސީއަށް ފާޑުކިޔާފަ އެވެ. އޭގެ ތެރޭގައި ފަނޑިޔާރު އަޒްމިރާލްދާ ޒާހިރު، ފަނޑިޔާރު މަހާޒް އަލީ ޒާހިރު އަދި ހުސްނުއްސުއޫދު ހިމެނެ އެވެ. މީގެ ތެރެއިން ސުއޫދު ވަނީ ފަހުން އަމިއްލަފުޅަށް އިސްތިއުފާ ދެއްވާފަ އެވެ.

ރިޒާގެ އިސްތިއުފާ ދެއްވުމާ ގުޅިގެން، މިހާރު ޖޭއެސްސީގައި ތިއްބެވީ ނައިބު ރައީސް ޔަޒްމީދު މުޙައްމަދުގެ އިތުރުން، މަޖިލީހުގެ ރައީސް އަބްދުއްރަޙީމް އަބްދުﷲ، ސުޕްރީމް ކޯޓުގެ ފަނޑިޔާރު ޙުސައިން ޝަހީދު، ހައިކޯޓުގެ ފަނޑިޔާރު މުޙައްމަދު ނިޔާޒް، ދަށު ކޯޓުގެ ފަނޑިޔާރު ފަރުހާދު ރަޝީދު، އާންމުންގެ ފަރާތުން އިދްރީސް ފައުޒީ، ސިވިލް ސާވިސް ކޮމިޝަންގެ ރައީސް މުޙައްމަދު މުޖްތާޒް، ބަންޑާރަނައިބު އަޙްމަދު އުޝާމް އަދި ޤާނޫނީ ވަކީލުންގެ ފަރާތުން ޢަލީ ޢަބްދުއްލަޠީފެވެ.