ކުރީގެ ރައީސް ޞާލިހު ތ.ހިރިލަންދޫގައި ވިދާޅުވީ ސަރުކާރުން ލާމަރުކަޒީ ނިޒާމް ނެތިކޮށްލަން މަސައްކަތް ކުރާ ކަމަށާއި ދެ އަހަރު ތެރޭ ނަތީޖާ އެއް ނުނެރެވޭ ކަމަށް.
ކުރީގެ ރައީސް އިބްރާހިމް މުހައްމަދު ޞާލިހު ތ. ހިރިލަންދޫ އަށް ކުރެެއްވި ދަތުރުފުޅުގެ ތެރެއިން އެރަށުގެ ބީޗް ހުޅުއްވައިދެއްވަނީ
ރައީސް ޑރ. މުހައްމަދު މުއިއްޒު މަސައްކަތް ކުރައްވަނީ ބާރުތައް މުށުތެރެ އަށް ލާ، ކަންކަން ކުރެވޭ މީހާ އަކީ ހަމަ އެކަނި ތިމާކަމަށް ދެއްކުމަށް ކަމަށް ކުރީގެ ރައީސް ކުރީގެ ރައީސް އިބްރާހިމް މުހައްމަދު ޞޯލިހު ވިދާޅުވެއްޖެ އެވެ.
ރައީސް ޞޯލިހު އެފަދައިން ވިދާޅުވީ ހޯމަ ދުވަހު ހިރިލަންދޫ އަށް ކުރައްވި ދަތުރުފުޅުގެ ތެރެއިން، އެ ރަށުގެ"ހިރިވެލި ބީޗް" ހުޅުވައިދެއްވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ލާމަރުކަޒީ ނިޒާމުގެ ވިސްނުމުގެ ބޭނުމަކީ އެ ނިޒާމުގެ ތެރެއިން މަސައްކަތް ކުރެވޭނެ މަގު ފަހިކޮށް ދިނުން ކަމަށާއި އެ ނިޒާމުގެ އެންމެ މުހިންމު އެއް ބޭނުމަކީ އެއީ ކަމަށް އެ މަނިކުފާނު ވިދާޅުވި އެވެ. ލާމަރުކަޒީ ނިޒާމް ނެތިކޮށްލަން މަގުފަހިވާ ގޮތަށް ސަރުކާރުން މަސައްކަތް ކުރާ ކަމަށް އެ މަނިކުފާނު ވިދާޅުވި އެވެ.
"ރާއްޖޭގެ އެއްވެސް ކަމެއް ނެތް ކުރެވިފައި ދެ އަހަރު ތެރޭ. ދައްކަނީ ހުސް ވާހަކަ. ނަތީޖާ އެއް ނުނެރެވޭ. ކުރިއަށް އޮތީ ލޯކަލް ކައުންސިލް އިންތިޚާބު. މި ހުރިހާ ކަމަކާއި މެދު ވިސްނާ ރައްޔިތުންނާއި އެކީ މަސައްކަތް ކުރާނެ ބަޔަކަށް ވޯޓު ދިނުން މުހިންމު. އަނެއްކާ ވެސް މި ދައްކަނީ އެއް ވައުދުތަކެއްގެ ވާހަކަ ސަރުކާރުން." ރައީސް ޞޯލިހު ވިދާޅުވި އެވެ.
ރައީސް ޞޯލިހު ވިދާޅުވީ އެރަށުގެ ބީޗް ހުޅުވުމުގެ ރަސްމިއްޔާތުގެ ބައްދަލުވުމަށް ސަރުކާރުން ހުރަސް އެޅުމަށް މަސައްކަތް ކުރި ކަމަށެވެ. އަދި ރައްޔިތުން އެ މަނިކުފާނާއި ބައްދަލުކުރުމަށާއި، މަރުހަބާ ކިޔުމަށް ދިޔަ ނުދިނުމަށް ނުފޫޒު ފޯރުވި ކަމަށް ފާހަގަކުރެއްވި އެވެ.
ސަރުކާރުން މިފަދަ ފިއްތުންތައް ކުރިމަތިވި ނަމަވެސް ރައީސް ސޯލިހް ހިރިލަންދޫ އަށް ވަޑައިގަތުމުން، އެރަށު ރައްޔިތުން ވަރަށް ފުރިހަމަ މަރުހަބާ އެއް ވަނީ ކިޔާފަ އެވެ.
ރައީސް ސޯލިހްގެ ވެރިކަމުގައި ހިރިލަންދޫ ގައި ތަރައްގީ ގެ ގިނަ މަސައްކަތްތަކެއް ފައްޓަވައި ނިންމަވައިފައިވެ އެވެ. އެގޮތުން އެރަށުގެ ފެނާއި ނަރުދަމާ ޤާއިމުކުރުމާއި ފެނަކަ އައު އޮފީހެއް އިމާރާތްކުރުމާއި ހިރިލަންދޫ އައު އިންޖީނުގެ އިމާރާތްކުރުމުގެ މަސައްކަތް ފެށުން ހިމެނެ އެވެ. އަދި އިންޖީނުގެ އަށް 1000 ކިލޯވޯޓުގެ ދެ ޖެނެރޭޓަރ ސެޓް ފޯރުކޮށްދިނުމާއި ސޯލާ ޕީވީ ނިޒާމު ގާއިމުކުރުން ވެސް ހިމެނެ އެވެ.
މީގެ އިތުރުން ހިރިލަންދޫ ސްކޫލަށް ދިމާވެފައިވާ ޖާގައިގެ ދަތިކަން ހައްލުކުރުމުގެ ގޮތުން މަލްޓި ޕާޕަސް ހޯލަކާއެކު 8 ކްލާސްރޫމް ހިމެނޭ 3 ބުރީގެ އިމާރާތުގެ މަސައްކަތް ފަށައިފައިވެ އެވެ. ނަމަވެސް ވެރިކަން ބަދަލުވުމާއެކު މި މަޝްރޫއު ވަނީ ވަރަށް ބޮޑަށް މަޑުޖެހިފަ އެވެ.
